Hosea 3 - Nobonob Baibel

Hosea nug wau qagaiettakppanu eɗua awom

¹ Aakku Yawe nug da Hosea, da amelppa aum. “Danab laa nug na waatnu oo hette, nug nug ele oittep. Na waat nug am ah ewau pakkua gappai hette me, na nug omalna, nagatop uɗin, na nuhignu oot mauhaɗ! Da Yawe, da Israel danab ah ag kayak laala noolagppa dup nona binalag metteb, ag keeke ena ena kayak amu ahilag daakkunu hamu madatteb me, da Israel dilagnu ool mauhtte. Aakku, da hettem bia amu, na waatnu oot mauhaɗ!”

² Yawe Nug anam aum amunu, da ah dahil, da nuhignu 170 gram silwa, amu 250 kilogram bali ele, amuppa da daden mein, eɗue aomi.

³ Da anam hein amu, da nug amegppa ami. “Gemu na dahilnuib daakkut. Na ib baag ah ii daakkutoitte; na danab laa ele ii niimna. Da nahipnu ele anamib daakkul,” awe ami.

⁴ ⌊Amu bia amu⌋ Israel danab ah ag geha haen elabnab king iitta, anuqak danab iitta, Kayaknu dabmak doyaknu men aɗit iitta, ag mana mettak danab iitta, ag kayak hambuppuak dottog laa iitta, amu ag doɗ manadna, Kayak mettaglagnu ele, elele iitta daaglag amunu, ⌊ag Kayaknu dabmak pehettak aon, Nugib ag atognoadtte dabmekkulag⌋.

⁵ Anam amu, amu dimppa amu, Israel danab ah ag eɗun, Yawe, ahilag Kayak, ag Nug, amu ahilag king, Dawit buɗubppanu ele anatna dim lamatkkulagnu mattialatkkulag. Ag geha, gog tak haenppa Yawenu, nuhig itittak enanu ele ebehilag oh bodoetta le mekku.