Hosea 14 - Nobonob Baibel

Oo eɗuak ha, ehanittak awak

¹ O Israel, ag eɗun, Yawe, ahilag Kayak, ag Nug waappa dayeg! Aɗinu? Ag hipunin heppig, amuppa ag nena qeppig.

² Ag eɗun, Yawe waappa daaglagnu wana, ag nai inam aig! “Mana mettak ou daakkunu, ig oɗenigppa na binan mekkunignu, ig na ihinig hipunin oh uhuqna megakkutnu oɗ medattem. Ao, na oo bodoette enanag maɗoɗ ele hak kobol dim lamidna awigkkutnu unuqidttem.

³ Asiria ag ig ehanigkkulagnu elele iitta. Ao, ig ban haknu hosppa ban hetata, ena daagnignu ii dabmemata. Ig keeke dottolkad eppenigppa hak, ig amu dilagnu baula, ‘Am ihinig kayak,’ ii amata. Aɗinu? Na aakkuib nid anilkad mamelkad iitta dilagnu oot bodoetta, le mette.” Ag anam aig!

⁴ Amu Yawe Nug ⌊danab anam unuqidkkulagnu dimppa inam akkunu⌋ atte. “Dahil oo nauhak am iitta ma, qeta awom. Qeta awom amunu, da heppi, ag baula da di-ii-meɗona, kayak hambuppuak laala ii dim lamidmana. Ao, da oo qak iittappa ahilagnu ool mauhkku,” awa atte.

⁵ Am Yawe Nug ele atte. “Baito habppanu wanppa na, ena ehanidtte, amubia da, Yawe, da Israel danab ah ehanadkkul; da anam heppi, Israel danab ah ag geha lili laa bia, nug haɗag mappata, bala enanag bette, ag amubia daaglag. Israel danab ah ag geha Lebanon appa ad sida laa bia nug diɗiud wan unuqagnab noak ele daatte, ag amubia daaglag.

⁶ Ao, Israel danab ah ag am geha ad laa ebekkud elab ukkak bia daaglag. Ag olip ad, nuhig neekkak enanag, ag amubia daaglag. Israel danab ah ag Lebanon wanppa ad sida muttuɗig enanag otte, ag amubia daaglag.

⁷ Am dahilad danab ah ag eɗun, ahilag wanppa da lokkolppa daaglag. Appa ag ee aeg ena bena, meulkad otteb, ag amubia daaglag. Ag muɗi grep bala huanak mappate, ⌊meu otte,⌋ ag amubia daaglag. Lebanon wanppa danab ag wain enanagnab heeg, danab kuɗumnab ag amunu nai dootteb amu, Israel danab ag amubia daaglag.

⁸ O Israel, ag dottolkad eppelagppa hak, ag amu dilagnu awaidna dayeg! Da aakkuib, ag dabmadette atognoadttem. Da am ad pain ena laa bia, ⌊ag da waalppa ena daaglagnu elele⌋. Ahilag meu wak am dahilppanu ahilagppa uɗitte.” Yawe Nug anam atte.

⁹ Laa ag danab doyak dabmak ena ele, ag keeke imu ohnu diignu doyak tutukku aweg! Ao, laa ag oo maittak awaknu ehah aoppig daatteb ele, ag keeke imunu diignu doyak tutukku aweg! Aɗinu? Yawenu ib amu genab tutukku ele, amu genab tutukku hak danab ah ag amuppa daanna oitteb; amge nai tappe nak danab ah ag amuppa taataɗ qetteb.