Hosea 13 - Nobonob Baibel

Yawe Nug Israel dilagnu oo nauhom

¹ Anukka, Israel dilag huu okkai laa, ag Israel dilag huu okkai Epraim dilagnu baɗan hahaɗppig. Ag Epraim dilagnu, “Ag binalag ele,” dooppig. Amge danab ah Epraimnu ag kayak hambuppuak Bal noobppa dup nona binag mena, hipunin heppig amunu, ag nauhppig daatteb.

² Gemu amu, ag tuɗidna, hipunin henan henan daatteb; ag kayak hambuppuak dottolkad danab ah ag amu noolagppa dup nona binalag mekkulagnu silwa ahilagppa hetteb. Ag dottolag amu eppelagppa kobol kobol ele hattana autna aotteb. Ao, danab uɗat amu haknu doyak okkai ele, ag dottolkad amu oh hetteb. Am danab ah laala ag Israel danab ah dilag atteb. “Ag nid naunau ahilkad manan, kayak hambuppuak mattanna; ag makau gaiɗ dottolkad eppelagppa hadappig, ag ag ootuqadtteb,” aon atteb.

³ Israel danab ah ag anam hetteb amunu, ⌊ag bu aoglag.⌋ Ag buttuanu bud paha qaɗaiedatte bia iitta mekkulag. Ao, ag geha buttua baito paha qaɗaiedatte bia qettoɗkkulag. Ag geha ulah iwale, ee aeg dappunkkeg ee aeg mumuɗaknu abenppanu laih gotte, amubia ag iitta mekkulag. Ao, ag geha aab laa kahug qatia taata ukka, iitta mette bia hekkulag.

⁴ Amu Yawe Nug atte. “Da Yawe, ahilag Kayak, da ag Isipnu diien, omalatti uɗippig. Ag laanu, ‘Nug Kayak,’ aib appig. Ao, ag laanu, ‘Nug danab ah ehanatte, padal ii metteb,’ aib appig. Iitta! Daib.

⁵ Da ag atu taɗakppa atognoadmi; aben amuam gakkaɗak naunab ele.

⁶ Amge Israel dilagnu amu, da hei, ag Kanan wan aon daanna, ag ee kuɗum ele daan, ag laeg oolag aɗom; ag oolag aɗe, ag dada danab beppig. Ag anam bena, ag dahilnu daulag atiom.

⁷ Anam amunu, gemu da ag aqattaknu laion laa bia ahilagppa banelag uɗikkul. Ao, da lepad laa ib aɗa daatte bia hekkul.

⁸ Da geha bea, laa nug nag aɗidna aon ukkaeg hette bia; da banelag ukken, ban hein, kattiɗadkkul. O iitta, da laion laa enug qe, ee awa laum bia, da ahilagppa anam hekkul. Ge, doɗ dakkuɗ nug laiyag kattiɗe huppu naunau netteb, amubia da ahilagppa hekkul.

⁹ O Israel, ag nauhkkulag. Aɗinu? Ehanittak ahilag am daib, ⌊amge ag uuiɗppig⌋.

¹⁰ Ahilag king amu, nug adeppa daatte? Ag padal memananu, nug ag ehanattaɗ! Aabppa danab okkai amu, ag adeppa daatteb? Ag Israel, ag danab am anam daaglagnu wagai mena, ‘Na king, anuqak danab ele mekke!’ appig, ⌊amunu, ag ag ehanatteg⌋!

¹¹ Ag anam appig amunu, da ool nauhehe, da ag king mattami. Ge, da oppoɗil be, da ahilag king eɗue aɗidmi.

¹² Israel danab ah ag beɗulagppa aab ele; da ahilag hipunin oh, da doottem.

¹³ Israel danab ah ag am bau daaglagnu ib ele, amge ag ib amuppa ukkaknu ag doyak dabmak ena ele iitta; appa ii oitteb. Aɗinu? Ag am nid yuɗ laa menuaknu daatte, amge nid loabppan dokkunu uua daatte, ag amubia daatteb.

¹⁴ Da geha ehanittak okkaippa ag moɗnu qagaiettakppanu uhuqadkkul. Ao, da mauhaknu qagaiettakppanu eɗua uhuqak hein madakkul. Da anam heppi, danab ah ag akkulag. ‘O Mauhak, na attem heppe, danab ah ag oɗe nau danab kuɗum aqe mauhtteb ele digdig amu aon mauhkkulag? O Boumak Aben, na attem heppe, danab ah ag nauhkkulag?’ aon akkulag. Haen amuppa da ag ehanadkkulnu dabmettem amu, dabmak amuam iinab baolima.

¹⁵ Epraim danab ah ag am Israel danab ah laa oh oolagppa enatai daaglag, ⌊amge diig amunu da geha ag bu madakkulnu ii uupa⌋. Amuam geha da heppi, kekeɗ ag kaɗag ulah atu taɗakppan, keeke kuɗum he nauhtte ele uɗitte, ag amubia uɗiglag. Le qeppuɗia bette am iitta mekku. Le moɗ ele qaɗaiedakku. Amu geha kekeɗ ag uɗin, ag ag Israel, ahilkad en aɗadna, akkan gokkulag.

¹⁶ Israel danab ah ag tappe nak hena, da, Kayak, ahilag Kayak, ag da oɗel ii dim lamidppig, ag beɗulagppa aab daatte amunu, ag bu aoglagoitte. Ahilkad kekeɗ dilag ban danab geha ag qep elabppa aqaglag. Ao, kekeɗ ag nid yuɗ, nid naunau ele aɗualadna, buɗiadppeg wanppa noppeg, ag beɗulag oh aoɗeb, huppu huppu nekku. Ge, ag geha qep elabppa ah oolkad ele oppatadppeg mauhkkulag.” Yawe Nug anam atte.