Hosea 12 - Nobonob Baibel

¹ Israel danab ah ag am danab laa nug ulah lanan daakkunu hette bia hetteb. Ao, ag am danab laa nug kaɗag ulah deɗ ohppa dim lamittattaib hette bia hetteb. Ag hambuppuak kuɗumnab mattinna; ag danab ah guittak nau mauhnoak madatteb. Ag nug tituana nai qakkak Asiria danab ah ele heeg; ag ⌊Isip ahilagnu, “Ig lainig,” dooglagnu, ag amu daden nob daakkunu⌋ olip goɗen meeg, Isip gotte.

² Aria, gemu amu Yawe Nug danab ah Judanu naippa yaaladtte. Jakop buɗub ag kobol nau heppig amunu, ag bu aoglag. Ao, Nug geha ag hipunin heppignu bu madakku.

³ Jakop nug ii menuak dayeye, nug awag ele nug mehqepiɗ. Amu nug danab okkai me, nug Kayak ele nug mehqepiɗ.

⁴ Am genab, nug engel ele wagai mak heya, wagai maknu ii uuom; nug gaya, itittak ena aokkunu ɠagattag oɗ mettom. Betel appa amu nug Kayak ele nug uɗa teya, appa Kayak nug ele nai madipiɗ.

⁵ Kayak Nug am Yawe Kayak Nukka Ɠagattag Oh Ele. Nug onig amu Yawe!

⁶ Anam amunu, gemu amu, ag Israel danab ah ag ahilag Kayak toppa eɗun gokkulagoitte! Ag haen ohppa oo mauhaknab kobol, nai doya mala hettoɗia epeɗia elele mettak kobol ele dim lamidkkulagoitte. Laa amu, ag haen oh, Kayak, Nugib am ahilag Kayak, ag Nug doon, nuhignuib oolagppa genab dooglagoitte.

⁷ Ag Israel ag amu hekkulagoitte, amge keeke laihnu awa, daden maknu danab laa ag hambuppuna, ag skel melemel elele iitta ele, ag amuppa uɗat hena, danab ah dilag keeke yab kobol amuppa aotteb; ag kobol amunu oolag okkai daatte. ⌊Amu ag Israel, ag danab amubia daatteb.⌋

⁸ Israel ag enaen mena, akka binalag mena, ag atteb. “Ig am enunig okkai ele, ig keeke kuɗumnab aomut! Ig enunig naɗi ele, amge laa nug ig hipunin aɗitai hetat aomut akkunu elele iitta,” aon atteb. ⌊Amge amuam genab iitta.⌋

⁹ Yawe atte. “Da am Yawe, da ag Israel, da ahilag Kayak. Da ag Isipnu diien, omalatti beppig, amge da geha heppi, ag eɗun, anukka ag daadppig bia, ag pehppa baula daaglag.

¹⁰ Da ⌊ag nau aomnanu, da⌋ dahil propet amelagppa nai mattimi. Da hei, ag tulegleg kuɗum anidppig. ⌊Da amu hein, da hei, propet ag uɗin, ag amelagppa mattiegeg, ag dooppig⌋. Ele amu, da propet keeke danab ag dootteb ii dootteb ele ouaqatta, ippunittak nai kuɗum ippuanatti, ag mattiegeg dooppig.” Yawe Nug anam aakku atte.

¹¹ Gileat danab ah ag am nau hak huana hettebte? Ge, appan danab ah ag kobol amu huanaknab hetteb. Danab ah ag Gilgal appa, menppa qaɗab hattak amuppa mana mettak hena, makau dawai manadttebte? Ag hetteb, amge men amu geha nena, dad okkai laa daugppa men hamu qagmak daatteb bia daaglag.

¹² Jakop nug awag baɗitta, nug oola ukka, Aram wanppa dayom. Nug appa dayaya, nug ah laa aweb, wau daakkunu haaha, nug danab laanu maɗi nid daya, nuhig uɗat heum. Ao, nug ah daden mekkunu, nug danab laanu sipsip gumattom.

¹³ Dimppa amu, Yawe Nug he, propet laa nug Jakop buɗub, am Israel danab ah, nug ag Isipnu omalatta uɗiom. Ao, Yawe nug propet amu eppegppa Israel danab ah dabmadatta, atognoattette uɗippig.

¹⁴ Amge Israel danab ah ag hipunin henan daaegeg, Yawe Nug ahilagnu oppoɗi beum daatte. Ag danab aqaeg mauhppig amunu, Naɗi Nug ag bu madakku. Israel ag Yawenu, “Nug am keeke hamunab,” dabmeppig amunu, Nug heeb, amunu nob ahilagppa daakku.