Hosea 11 - Nobonob Baibel

Yawe Nug Israel dilagnu oo mauhtte

¹ Yawe Nug atte. “Haen Israel danab ah ag nid nakok daatteb bia daappig, da ahilagnu ool mauhom. Ao, da ool mauhom, da Israel dilagnu, ‘Nid danab dahil,’ doomi amunu, da nug Isip uua dokkunu onigppa emi.

² Da amu hewoya, haen kuɗum laa ele da ⌊propet oɗelagppa⌋ Israel danab ah ag uɗin, da dim lamiɗkkulagnu onilagppa emi; amge ag da anam heiyi, ag da oɗel ii doon, ag da dimeɗan, uuiɗna tuɗidna umanab goppig. Dahilad danab ah ag doɗ main, kayak hambuppuak Bal iɗu iɗu madappig. Ao, ag kalu danab ile muttuɗig enanag bette ele ahilag kayak hambuppuak dottolkad binalag mekkulagnu main medappig.

³ Da dakka da danab nug bekka baegppa oikkunu ippunidtte, da amubia ag Israel ippuanatten ehanadmi. Da danab bekka eppeg aɗa omala gotte, amubia da ag eppelag aɗualatte omaladmi. Da ag atognoatten autenab aomi, amge ag da uɗat hemi amu, ag amu diignu doyak tutukku iitta ele. Iitta.

⁴ Da ahilagnu oo bodoettak doyak kobolppa hein; da ahilagnu oo mauhak ele doomi. Da ag kobol nau waappa daamnanu diiatti, dahilppa uɗippig; danab nug nuhig nid bahi qette bia, da ag ena daaglagnu ehanadmi.

⁵ Amge dahilad danab ah ag oolag eɗueb, da dim lamiɗkkulagnu uuppig amunu, ag eɗun, Isip waalagppa daappig bia, laa waalagppa daaglag. Ao, ag Asiria waappa daaglag.

⁶ Geha ahilkad kekeɗ ag aab okkai ahilkadnu aɗnu od manak qaknu keeke loppaɗadppeg neppeg, aab ooppa nona, ban hena danab ah aqaglag. Geha danab ah ag aɗi hekkulagnu maidppig amu, ag hekkulagnu elele iitta daaglag.

⁷ Danab ah dahilad ag da dimeɗan, kayak hambuppuak laala dim lamadkkulagnu dabmak aoeg ɠagattag eppom daatte. Propet ag Israel ag eɗun dagattolppa uɗiglagnu onilagppa etteb, amge laippu laa da binal mekkunu ii hette.

⁸ O gadon, ag Israel ag am dahilad; da attem hein uuadppi, ag laa eppegppa daaglag? Ao, ag Israel, ag dahilad; da attem hein uuadppi, laa nug ahilagnu, ‘Dahilad,’ dookku? Da attem hein uuadppi, ag Atma danab iitta meppig bia iitta mekkulag? Ao, da attem hein uuadppi, ag Seboim danab ah padal meppig bia padal mekkulag? Da oolppa kobol laa hekkulnu doottem. Ao, ahilagnu amu, da ool bodoetta le mette.

⁹ Da ahilagnu oo nauhak huanaknab doottem, amge oo nauhak amu da ag bu naunab madakkulnu ippuniɗtte, da bu anamnab ii madapa. Ge, da Israel eheɗ nau madappi, ag padal mena autnanab ii aomna; iitta. Aɗinu? Da danab iitta, da am Kayak. Ao, da am Kayak Oppiaawak Ele, da ag oolagppa daattem. Ge, da oppoɗi be ameg kokoɗ eppak ele ii uɗipa.

¹⁰ Geha, haen amuppa Israel danab ah ag da, Yawe, ag da dim lamiɗkkulag. Geha da laion huana gaatte, da anambia huana onilagppa ekkul. Da anam hekkul amunu, danab ah dahilad, ag qaban uɗitteppanu, beɗulag hahaɗebeb uɗiglag.

¹¹ Ag ai Isipnu hagagaɗna uɗitteb, amubia ag beɗulag hahaɗebeb uɗiglag. Ao, uppuɗil beɗulag nakok ag hagagaɗna, Asirianu uɗitteb, ag amubia beɗulag hahaɗebeb uɗiglag. Ag uɗippeg, geha da ag omalatte, eɗue appalagppa uɗie maadkkul.” Yawe anam atte.

Israel, Juda ele naippa daapiɗ

¹² Israel danab ah ag hanhan buppuiɗtteb. Ge, Israel danab ah ag hanhan nai genab iitta da amelppa maditteb. Amge Juda danab ah ag Yawe ele ɠagattag daatteb. Ao, ag tuɗidna, oo metta ii uuak kobol dim lamidna, Kayak Oppiaawak Ele oɗe dim lamidtteb.