Hosea 10 - Nobonob Baibel

Yawe Israel hettoɗiadkku

¹ Israel danab ah ag am en kuɗum ele daappig. Ao, ag am grep muɗi ena meu huana oa daatte, ag amubia daappig. Ag keeke kuɗum ele tuɗidna aon daan; ag keeke amu kayak laa madappig. Ag ee huanak aonna, ag men doɗo ele huanak aona; ag men doɗo amuppa men gappi, amuam kayak hambuppuak ahilkad amu, ahilag neekkak ena daaglagnu hena bappaidppig.

² Israel danab ah ag hambuppuak danab ah daatteb; ag eheɗ hetteb amunu, ag bu aoglagoitte; Yawe Nug geha kayak hambuppuak dilag qaɗab loppaɗatta; Nug men gappi ahilag ele maduduɗeb nekkulag.

³ Anam beeb, diig amunu, ag akkulag. “Ig am Yawenu ebehinig oh ii bodoetta le ii meum amunu, ihinigppa king laa iitta; amge ihinig king laa daalolob, nug ihinignu attemtai helo?” akkulag.

⁴ Israel ag nai hamu hamu maditteb. Ag nai ɠagattag qettan, ag dim lamidkkulagnu ii dabmenan, nai amu atteb. Ag nug tituanna nai qakkak ⌊ele dim lamidkkulagnu ii dabmenan⌋ hetteb. Diig amunu hettoɗiakppa lailkad naippa yaalattak huanak, uud tiig mua nau ele dad okkai wan buuakppa betteb bia betteb.

⁵ Am danab ah Samaria daatteb ele ag kekeɗ uɗin, makau gaiɗ dottog golppa hak, Bet Awen appa daatte amu, ag uɗin, dottog amu ahilag wanppanu aon gomananu baɗan daatteb. Amge kekeɗ ag uɗin anam hekkulag amunu, kayak hambuppuak amu dilag mana mettak danab, danab ah laa ag dottog amu dim lamidtteb ele, ag geha nuhignu oolag dookku. Ge, danab ah oh ag dottog amu, nuhig neekkak enanagnab ele, ag amunu gamag ahak okkai dooppig, gemu ele hetteb amu, haen kekeɗ ag appalagppa maon gobeppeg, ag diig amunu geha oo doyak aoglag.

⁶ Laa ag kayak hambuppuak dottolkad adppa hoyattak amu aon gona, king naɗi Asirianu, nuhig daakkunu hamu mettaglag. Israel ag geha uɗa nak nau guittak ele doon; ag kayak hambuppuak dottolkad eppelagppa hak ahilkad, ag amunu uɗa nak dooglag.

⁷ Samaria danab ah, ahilag king ele geha ad eppeg nagnag laa le laappa maiya ma gotte bia, ag hena qettoɗkkulag.

⁸ Betawen appa kayak hambuppuak dilag mettid lag nakok am, laa ag heppeg nauhak daaglag; Israel ag appa hipunin hetteb. Lag amu nauhak daappeg, uud keeke qaun ele amu, keeke amuam geha qaɗab amu oh teguadkkulag. Amu oh beeb amu, Israel danab ah ag geha qauko dilagnu, “Ag nena tonikkeg,” akkulag. Ao, ag qauko nakok dilagnu, “Ag nena, qaɗenigppa qeig!” aon akkulag.

⁹ Yawe atte. “O Israel danab ah, anukka Gibea appa ag hipunin naunab laa heppig; ag amu heeg uɗie uɗie, gemu ag tuɗidna hipunin henan daatteb. Gibea appa danab eheɗ heeg, Israel laa oh ag ahan, ban heeg, Gibea aɗi ag iite nauhppig? ⌊Amu Israel danab ah ag gemu eheɗ henan daatteb amu, ag ele bu iite aoglag?⌋

¹⁰ Da bu madakkul doottem; Ao, da geha heppi, ban danab, wanppan wan laalappanu ag banelag uɗiglag. Ge, Israel ag ahilag hipunin kuɗumnab ele, amu ag amunu bu mattaglagnu uɗiglag.

¹¹ Israel danab ah ag gemu attem daatteb, ag amubiaib daaglagnu hetteb. Ag am makau balat laa, nug mameg nug ee aeg mumuɗaknu uɗat ippunitte, amu haknu oo hette bia daatteb. Ag anam daatteb amunu, gemu amu da heppi, Israel danab ah ag keeke ag hekkulagnu oolag ii hette ele amu hekkulag. Ag makau balat nug doɗnu duugppan tuqai uug ele nug baag enanagppa qakkak daye, nug wagai maama, wan buuaknu keeke tuqai amuppa eeɗe, wan buutte bia daaglag. Danab nug makau balat duttune, nug wan buuaknu keeke eɗaɗa, bahi yaak guittak ele dootte bia, Israel danab ah ag uug nau anam aakku dooglag. Ao, danab laa nug he, makau balat nug wan buua buua, bahi yaatte bia, Juda danab ah ag guittak dooglag. Genab, danab laa nug he, makau balat laa wan ɠagattag buutte bia, Jakop buɗub ag uug, guittak ele digdig dooglag,” awa atte.

¹² Ag Israel, ag genab tutukku hak kobol ag oolagppa ebappeg, Yawenu oo mauhaknab ag tonadkku. Ag oolag ɠagattag eppak daamanu, ag heppeg, ag oolag gai-iitta dayaɗ! Aɗinu? Gemu am ag Yawe anidna, Nug dim lamidkkulagnu mattiglagnu haen aakku daatte. Ag amu hekkulagnu diig am, ag amu heppeg, Nug gu digittig bia he ne, dattan keeke ena bette, amubia Nug heeb, ag genab tutukku hak danab ah bena daaglag.

¹³ Ag ahilag ban danab ag ahilag ɠagattagppa heppeg, ag ena daaglagnu dabmeppig. Ge, ag ahilkad ban danab ebqak okkai ele dilagppa ehanittak aoglagnu dabmeppig. Anam amunu, ag danab nug ee aeg nau eppa, meu eheɗ aotte, ag amubia daatteb. Ge, diig amunu ag nai hambuppuak, ag amunu genab doon, ag eheɗ aoppig daatteb.

¹⁴ Anam amu, ban naɗi ahilagppa uɗieb, geha kekeɗ ag ahilkad aab aɗ ɠagattagnab ele oh heppeg nauhkkulag. Haen amuam ⌊King⌋ Salman, nuhikkud daup ele ag Betarbel heeg nauhom, kekeɗ ag amubia ahilagppa hekkulag. Betarbel appa ban danab o danabib ii mauhppig. Iitta. Kekeɗ ag ah, nid ahilkad ele laippu aɗualadna buɗiatteg, wanppa noeg, ag beɗulag oh aoɗatte, hupu hupu neppig.

¹⁵ O Betel danab ah, ag nau hak ahilag am okkainab amunu, kobol amubia ahilagppa bekku. Deɗ amuppa Kayak Nug Israel bu mattebeb, Israel dilag king am nauha autanab awa, iitta mekku.