Hosea 1 - Nobonob Baibel

¹ Yawe Nug Beri bekka Hosea amegppa nai imu, Usia, Jotam, Ahas, Hesekaia ele, ag Juda dilag king baadna daaeg ukkom, aria Jehoas bekka Jeroboam nug Israel dilag king ba dayeye, haen amuppa Hosea nug nai imu mattiom.

Hosea wau bekkod ele

² Yawe Nug digma Hosea oɗeppa nai nuhig imu Israel danab ah amelagppa mattieb dooglagnu haaha, Nug nai imu Hosea amegppa aum. “Na gona, ah laa awe! Na aoppe, nug geha nahip ah daakku, amge nug ah nau dayebeb, nuhig nid laala amu ag mamelkad laappan daaglag. Aɗinu? Kobol amuam Israel danab ah ag dahilppa ewau pakkua gappai hak kobol uɗig wak naunab heegeg uɗie, gemu ele hetteb ⌊danab ah ippunadkku⌋. Israel ag kayak hambuppuak laala noolagppa dup nona binalag meegeg uɗie, gemu ele hetteb amu, kobol amuam gappai kobol ah nahip hekku, amubia,” awa aum.

³ Yawe Nug anam amegppa a amu, Hosea nug Diblaim aɗeg Gomer awe oiyya, Gomer nug oo ele daya, Hosea bekka menuom.

⁴ Aakku Yawe aum. “Nid onig Jesril ataɗe! Amunu diig am, da King Jehu, amu nug buɗuppud ele ag bu madakkulnu hettem. Aɗinu? Jehu nug danab ah kuɗum Jesril appa aqe mauhppig. Da ele geha heppi, laa ag Israel tabappeg nob, Israel am baula wanppan wan laa ii daama.

⁵ Da geha heppi, ahilag kekeɗ ag tappaladppeg noppeg, oolnu noak onig Jesril, appa ban danab ahilkad hadappeg nauhkkulag,” awa aum.

⁶ Amu Gomer nug baula oo ele daya, nid ah laa menuom. Menue amu, Yawe Nug Hosea amegppa aum. “Na nug onig Lo Ruhamah ataɗe! Aɗinu? Da geha Israel danab ah dilagnu oo bodoetta le mak kobol ii dim lamidpa; da genab heppi, ag bu naunab aoglag.

⁷ Amge da, da Yawe, ahilag Kayak, da geha oo gai-iitta doya oo metta ehanittak kobol Juda danab ah dilagppa hekkul. Da dakka geha ahilkad kekeɗ eppelagppanu eɗuen diiadkkul. Da amuam latppa, o qep elabppa, o banppa, o hosppa, o bannu karisppa ii hepa. Iitta. Da dakkaib, da hekkul,” awa aum.

⁸ Dimppa Gomer nug Lo Ruhamah huh aɗitta amu, nug eɗua oo ele daya, nid danab laa menuom.

⁹ Menue, Yawe Nug Hosea amegppa aum. “Na nug onig ‘Lo Ami’ ataɗe! Aɗinu? Gemu Israel danab ah ag dahil danab ah iitta, da am ahilag Kayak iitta.

¹⁰ Anam aakku, me geha haen laa uɗieb, Israel am wan laa onig okkai ele daakku. Deɗ amuppa nuhig danab ah geha yu ihippa abuɗ huanak daatte, amubia ag huanak daaglag. Geha huanaknab, ebaqaknu elele iitta daaglag! Amu aben da ag amelagppa, ‘Ag amu dahil danab ah iitta,’ ami, aben amuppa geha da ahilagnu, ‘Ag amu da Kayak bauklel ele, ag da bekkalad,’ akkul.

¹¹ Anam dayeb, geha Juda, Israel danab ah ele ag laippu tamanin, ikki danab laippu waappa daan, ag diia ukka, laih me dayakppanu eɗun uɗin, tamanin daaglag. Deɗ amuam geha deɗ naɗinab daakku. Deɗ amunu amu, ag geha, ‘Jesrilnu deɗ,’ akkulag. Aɗinu? Deɗ amuppa, Kayak nug geha danab ah nuhikkud baula nuhig wanppa maatteb daaglag,” awa aum.