Hibru 9 - Nobonob Baibel

Mana mettak tatamnu amu ag doɗ tiigppa heppig

¹ Aria, nug tituana nai qakkak tatamnuppa amu Kayak Nug ɗo laala mettid haknu, amu danab ah ag wan imuppa mettid hekkulagnu danab ag Kayaknu mettid lag doɗ gaɗappa hena galaglagnu ele meum.

² Ag mettid haknu peh lag amu galaeg ooppa, makkulak anuqakppa amu lam maattaknu balal, balal laa, amu bret ag Kayak medappig ele, keeke amu oh aguppa daappig. Lag oo makkulak amuam onig, “Oo Gun Ele.”

³ Aria lag ooppa, lamen naɗi dimugppa, lag oo makkulak laa, makkulak amunu ag, “Oo Gunnab Ele,” atteb, amuppa dayom.

⁴ Aben amuppa kalu danab ileb muttuɗig enanag baknu qaɗab golppa hak, amu nug tituana nai qakkak kunup, ag amu adppa hewona, ad amu qaɗeppa ooppa ele gol mewona, ag nug ameg am golppaib heppig amu, keeke aɗit amu aa aguppa daapiɗ. Amu kunup amu ooppa gol id laa, amuppa ag maana inappig, aria Aronnu bu ita beum ele, amu men otala aɗit, amuppa ɗo nai yaalattak ele, keeke amu oh kunup amu ooppa daappig.

⁵ Kunup amu attan am engel okkai-Kerubim aɗit aa dottolah daapiɗ. Aa Kayak aben amuppa daatte amu danab ah ippunadpiɗ. Aa waalahppa Tituanak Nainu Kunup ameg, amuam eheɗ haknu nob nau tiigppa iitta me elele medatte ippunadtte, ameg amu dayom. Amge gemu amu keeke amunu oh mehuqaknu haen iitta.

⁶ Aria, keeke oh anam babaittak daye amu, mana mettak danab ag haen oh lag oo makkulak dimittim amuppa maɗi ahilag hekkulagnu nodappig,

⁷ amge mana mettak ikki danab, nugib am lag oo makkulak ooppanab, amuppa hipunin nuhig amu danab oh dilag ele doɗ tiilagppa mana mettak hekkunu maɗ laippu ooppa, haen laippuib noa hettom. Nug hamu iinab nottom. Iitta! Nug doɗ tiig awa ele gottom.

⁸ Kobol amuppa Kayak Ouɗi Nug inam ippunigtte. Haen danab ah ag lag amuppa Kayak binag meppig ele amu, danab ah oh ag Kayak noobppa tutukku wakkulagnu ib iitta. Ib amuam oo nak.

⁹ Amu oh am ig gemu haen imu daattem am keeke ippunigtte. Amuam danab ah ag ɗo iɗu iɗu Kayak mettanna, mana mettak iɗu iɗu ele heppig, amge keeke amu oh, danab heppig ele am heeb, danab amu dilag hipunin uhuqa mettak daaglagnu elele iitta.

¹⁰ Keeke amu oh am ee lanak keeke, le lanak keeke, amu le laaittak kobol digdig ele. Ɗo amu oh am danab beɗulagnuib. Kayak Nug ɗo amu oh danab ag dim lamidppeg ukkeb, dimppa Nug ib bau ooɗaknu haen uɗieb batak daaglagnu he daappig.

¹¹ Anam dayom, amge Kristus Nug itittak ena digdig, Kayak megakkunu dabmette ele amu, Nug amunu mana mettak ikki danab daakkunu uɗia dayom. Amu Nug Kayaknu mettid haknu peh lag elelenab, Kayaknu mettid haknu peh lag tatamnu eɗittak amu, uɗat nuhig hekkunu ooppa noum. Kayaknu mettid haknu peh lag amu danab ag eppelagppa ii heppig; am wan imuppan keeke iitta.

¹² Kristus Nug meeme tiilkad, amu makau nakkud tiilkad ele awa, Oo Gunnab eleppa ii noum. Iitta! Nug nukka Nug tiig awa, haen laippu aakkuib Oo Gunnab Ele, Nug amuppa noa, Nug tiigppa Nug qagaiettakppanu eɗua uhuqak hanhannu ha mekkom.

¹³ Am inam bia. Ɗo alagppa danab ag Kayak ele ouqak daaglagnu elele iitta daappig amu, mana mettak danab ag meeme tiilkad, makau dawai tiilkad, amu makau balat manaeg, uhuɗ meum ele amu, ag tiig, uhuɗ amu ele aon, danab Kayak ele ouqak daaglagnu elele iitta amu qaɗelagppa tauɗeg, Kayak amegppa danab amu ag beɗulagib oppiaawak daappig,

¹⁴ amge gemu, ig Kayak bauklel ele waappa daat Nug oɗe dim lamidkkunignu ig Kristus tiigppa genab oppiaawak daagnignu elelenab. Aɗinu? Kristus Nug beɗuppa eheɗ laa iittanab, Nug Kayak Ouɗi hanhan daatte ele, nuhig ɠagattagppa, Nug nukka Nug beɗu, mana mettak bia, Kayak mettom amunu, Nug tiig ig beɗunigib ii ihom. Iitta! Ig Kayak bauklel waappa daat, nuhig uɗat hekkunignu Nug tiigppa ihinig hak nau, hak amuam danab mauhakppa omaladna gotteb amu, am hak nau amu oh uhuqa mekkak daatteb.

Kristus tiig am, nug tituana nai qakkak bau ɠagattag qettom

¹⁵ Amunu Kayak Nug danab onilagppa eum ele, danab amu ag itittak ena haen ohnu ele, Kayak anukka Nug bekkod madakkunu nai qakka aum amu, ag amu aoglagnu elele daaglagnu, Kristus Nug nug tituana nai qakkak baunu gamag danab daatte. Kayak Nug amu madakkunu elele daattenu diig am Kristus Nug danab ag nug tituana nai qakkak alag waappa daana, hipunin heppig ele, ag hipunin amuppanu uhuqak aoglagnu mauhom.

^16-17 Danab nug dimppa mauhkku doya, nug bau dayaya aun en nuhig aokkunu dabmette amu nug nai amu uɗugppa ya, onig ele ye, danab laa ele nug antta onig ye, aria nai aakku ɠagattag aakku daatte. Anam amu, keeke mameg mauheb amu, danab ag tatam nug genab mauhom dooppeg amu, keeke mameg nug laa, nuhig keeke aokkun yom ele amu, nug keeke aokku. Keeke mameg ii mauhom haenppa amu laa nug keeke ii aoma. Nai amuam mauhak dimppa aakkuib keeke mamegnu dabmak ɠagattag qedatte.

¹⁸ Diig amunu nug tituana nai qakkak tatamnu ele am doɗ tiig gokkaɗakppa ɠagattag qettak ba dayom.

¹⁹ Tatam amu Moses nug ɗo oh danab dooglagnu mehuqa malowa, dimppa nug makau nakkud tiilkad amu meeme tiilkad ele awa, le ele kabolia, nug sipsip uɗig kokoɗnab amu uud laa onig hisop gumuppa ita, amu amuppa nug tiig le ele nug tituana nai qakkaknu ɗo yaak buk itoɗiak qaɗeppa tauɗ qettowa amu danab oh ele tauɗ aqom.

²⁰ Nug aum. “Tiig imu am, nug tituana nai qakkak, Kayak ag dim lamidkkulagnu aum amu, am tituanak nai amu ɠagattag qedatte,” awa aum.

²¹ Anamib nug tiig amuppa Kayaknu mettid haknu peh lag tauɗ qetta, uɗat lag amuppa hetteb ele, amunu keeke naunau laa oh ele tauɗ aqattom.

²² Aria ɗo kobolppa, tiigppaib keeke oh bia oppiak daakkunu daatte. Amu tiig ii ne amu, Kayak Nug hipunin ii uhuqtte.

Kristus haen laippuib hipunin uhuqa megakkunu mauhom

²³ Amu wan imuppan keeke ag am hab aabppan keeke genab dottolkad amu, ag mana mettak doɗppa hak, ag amuppa heppeg oppiak daaglagnu daappig, amge hab aabppan keeke, ag digmen uɗat mettaglagnu am doɗ tiilag tauɗ aqakkunu am elele iitta. Iitta! Keeke laa doɗ tiig eɗittaknab aakkuib am elele.

²⁴ Amuam Kristusnu mauhakppa beum. Kristus Nug Kayaknu mettid lag ooppa, danab ag eppelagppa heppig ele, Nug amu ooppa ii noum. Iitta! Nug hab aabppanab ukkom amunu, gemu Nug Kayak noobppa miag atia teum dayaya, danab ig ehanikkakka daatte.

²⁵ Maɗ ohppa wan imuppa mana mettak ikki danab nug doɗ tiilag awa, lag Oo Gunnab Ele, aben amuppa qaɗabppa tauɗtte. Tiig amuam, nug tiig iitta, am doɗ tiilag. Wan imuppan mana mettak ikki danab, ahilag uɗat am anam, amge Jesus Nug amubia ii heum. Iitta. Nug nukka Nug beɗu mana mettak bia Kayak mettom amu, Nug kobol amu he, haen kuɗum hekkunu ii daatte, laippuib heum.

²⁶ Nug laa hetteb bia helo amu Nug haen kuɗum, Kayak wan heum uɗie, gemu haen imu ele guittak awawa daalo, amge anam iitta. Haen nakok malele, Kristus Nug haen laippu aakkuib wanppa na, hipunin uhuqkkunu nukka Nug beɗu mana mettak bia Kayak mettom.

²⁷ Danab oh ag haen laippuib mauhkkulagoitte; amu dimppa ag hettoɗiakppa tekkulagoitte,

²⁸ amubia Kristus Nug danab kuɗum dilag hipunin uhuqa madakkunu Nug nukka haen laippu aakkuib, Nug beɗu mana mettak bia Kayak mettom. Nug anam heum amu dimppa Nug baula eɗua uɗikku, amge hipunin uhuqkkunu iitta. Nug danab ameg mena daatteb ele amu eɗua diikkunu uɗikku.