Hibru 8 - Nobonob Baibel

Jesus Nug hab aabppa ihinig mana mettak ikki danab daatte

¹ Aria, nai ig attem ele, nuhig diig am inam. Ig mana mettak ikki danab Melkisedek bia ele, Nug matu hab aabppa Kayak, dagom onig ɠagattag ele, Nug eppeg naɗiap-ppa heɗep neum daatte.

² Nug am mana mettak danab dilag uɗat, Kayaknu mettid lag ooppa, appa hette. Amuam Kayaknu mettid haknu peh lakka genab; danab laa lag amu ii heum. Iitta! Naɗi nukka lag amu babaittom.

³ Mana mettak ikki danab anen anen amu, ag ahilag uɗatppa ag mana mettak digdig hetteb amunu, Jesus Nug ele mana mettak laa hekkununab dayom. ⌊Nuhig mana mettak am Nug beɗu.⌋

⁴ Amu Nug wanppa gemu daalo amu, Nug mana mettak danab laa ii daalo. Aɗinu? Mana mettaknu danab laala matu beppig daatteb, ag mana mettak digdig, ɗo niitte amubia hetteb. Ag uɗat amu gumatteb, laa ele dayaya gumakkunu ib ii daatte.

⁵ Mana mettak uɗat, ag wan imuppa hetteb ele amu, ag hab aabppa Kayaknu mettid lag ooppa kobol niitte amubia dottog aakku hetteb. Nai laa amu ippunigtte am nai anukka Kayak Nug Moses amegppa aum. Nai amuam haen Moses nug Kayaknu mettid haknu peh lag digma hekkunu heehe, Kayak aum. “Da na qaukoppa dottog ippunidmi bianab na heppe, ag keeke amu oh anamib heig!” awa aum.

Nug tituana nai qakkak bau, am nug tituanak alag eɗidtte

⁶ Jesus Nug mana mettak uɗat awom ele amu, uɗat amuam mana mettak uɗat alag eɗidtte, Nug tituana nai qakkak bau, Jesus Nug amunu gamag danab daatte amu, nai qakkak bau amuam nug tituana nai qakkak alag eɗidtte, amubia. Ele amu, nug tituana nai qakkak bauppa keeke Kayak heeb bekkulagnu nai qakka aum ele amu, ag alag amunu eɗadtte.

⁷ Amu nug tituana nai qakkak tatamnuppa uug laa ii daalo amu, Kayak Nug nug tituana nai qakkak baunu ii dabmelo.

⁸ Amge Kayak Nug nug tituana nai qakkak alag, amunab danab ehanadkkunu elele iitta, Nug amu nai laappa ippunikka, miag atia aum. Nai amuam inam. “Naɗi atte. ‘Haen laa uɗitte, haen amu uɗieb, haen amuppa da heppi, Israel danab ah, am Juda danab ah ele, da ag ele ig nug tituana nai qakkak bau hekkunig.

⁹ Nug tituana nai qakkak bau amu, da tatam ag mamelkad aɗi anukka haen da eppelag aɗen omalatti, Isip wan uun, ahan goppig ele, haen amuppa da ag ele nug tituanta nai qakkamut, am amubia iitta. Haen amuppa amu, ag nug tituana nai qakkak nai dahil ii dim lamidppig amunu, da dimattami.’ Naɗi anam awa atte.”

¹⁰ Amu Naɗi Nug tuɗitta inam ele aum. “Nug tituana nai qakkak bau, da heppi, ag Israel danab ah, da ag ele haen amuppa hekkunig am inam. Da heppi, dahil ɗo oh ahilag dabmakppa daakku. Ao, da heppi, dahil ɗo oh ag oolagppa daakku. Geha da Kayak ahilag daakkul; ag am dahil danab daaglag.

¹¹ Amu da heppi, ig nug tituana nai qakkak amu heta malota, danab laa nug layagtai, o awagtai, o amagtai baula amegppa, ‘Na Naɗi doye!’ ii ama. Iitta. Ag anam ii amananu diig am, ag ohnab, danab onig iitta, danab onig okkai ele, ag oh da dooiɗna oiglag amunu, ag laa nug laa amegppa, ‘Na Naɗi doye!’ akkunu ii hema.

¹² Aɗinu? Da ahilag nau hak uhuqen madakkul. Yo, da ahilag hipunin daul atikku.” Naɗi Nug nai amu mattiom.

¹³ Nug nug tituana nai qakkak baunu anam anana, nug tituana nai qakkak tatamnu amu Nug he, alag meum. Amu keeke nug alag ma, nug kaino bia nakoknab dayaya, iitta mette.