Hibru 7 - Nobonob Baibel

Melkisedek nug mana mettak danab dayomnu nai

¹ Melkisedek, Salem dilag king, nug am Kayak Attannab Laa Oh Eɗattaknu mana mettak danab. Anukka Abraham nug ban ha, king aqowa, eɗua appagppa ugekke, Melkisedek nug Abraham ibppa nug uɗa ta, itittak ena mettom.

² Mette amu, Abraham nug keeke oh awom, nug amunu obatak eblaih tanig ele ooppanu obatak laippu Melkisedek mettom. Melkisedek onignu mehuqak am, “Genab tutukku hak kobolnu king.” Melkisedek nug am Salemnu king. Amunu meu am, “Maɗoɗnu king.”

³ Kayak nai am nug anig mameg amu nug memetab ele ii ippunigtte. Menuak deɗ nuhig amu mauhak deɗ nuhig ele ii ippunigtte. Nug am Kayak Bekka bianab daatte. Nug am mana mettak ikki danab hanhannu daatte.

⁴ Aria Melkisedek nug am danab onig okkai ele amu, ag antteg! Nug am onig okkai iitta ele daalo amu Abraham nug ban ha, keeke awom amu ameg 10 oolagppanu laippu nug ii mettalo amge anam iitta. Nug ameg 10 oolagppanu ameg laippu mettom.

⁵ Amu Jakop bekka Lewi buɗub ooppanu laala ag mana mettaknu uɗat aotteb ele amu, ɗo ag keeke ameg eblaih tanig ele ooppanu laippu, Israel dilagppanu aoglagnu atte. Amu Israel laa oh ele ag am Abraham buɗub amunuib, ag lailkadnab, ag oh am Abraham buɗub daatteb, amge ɗo nug ag mana mettak danab keeke ameg 10 oolagppanu ameg laippu mattaglagnu atte.

⁶ Melkisedek nug am Lewi buɗub ooppanu iitta, amge nug Abrahamnu keeke ameg 10 oolagppanu ameg laippu awowa, nug danab, Kayak nug amegppa keeke laa heeb bekkunu nai qakka aum ele amu, nug itittak ena mettom.

⁷ Aria ig doottem, danab nug itittak ena medatte ele, nug am okkai, onig ele. Nug laa itittak ena aotte ele eɗidtte.

⁸ Am gemu mana mettak danab, ag am danab mauhtteb ele, ag keekenu ameg 10 oolagppanu ameg laippu aotteb, amge Melkisedek, Nai Ena ippunigtte bia, nug bauib daatte ele, nug keekenu ameg laippu amu awom ⌊amunu, nug mana mettak danab gemu daatteb eɗadtte⌋.

⁹ Amunu ig inam akkunignu elele. Lewi buɗub ag gemu keeke ameg 10 oolagppa ameg laippu aotteb, amge Melkisedek, nug anukka keeke ameg 10 oolagppa ameg laippu Abraham eppegppanu awom amunu, nug aakku Lewi eppegppanu keeke ameg 10 oolagppa ameg laippu ele awom bia daatte.

¹⁰ Aɗinu? Haen Melkisedek nug Abraham ibppa uɗa te, Abraham nug keeke ameg 10 oolagppa ameg laippu mettom. Amu Abraham nug am Lewi dokkiab amunu, Lewi nug Abraham beɗuppa aakku dayom.

Jesus amu mana mettak danab hanhannu, Melkisedek bia

¹¹ Aria, Israel ag Lewi buɗub laa ag mana mettak danab, ag ahilag uɗatppa ɗo aoppig, amge mana mettak danab amu ag maɗi ahilag amu heeb, danab ag elelenab bena daalob amu, aɗinu mana mettak danab laa, Aron bia iitta, Nug am Melkisedek bia, bekkunu dayom?

¹² Aria, ɗo nug Lewi buɗub ooppanu laa ag mana mettak danab daaglagnu atte amunu, buɗub laa ooppanu laa nug mana mettak ba daakkunu dayeb amu, Kayak Nug ɗo ele baolikkuoitte.

¹³ Amu danab imu, Kayak Nug Nug amegppa, “Na am hanhan mana mettak danab Melkisedek bia daattem,” aum amu, Nug am Israel dilag huu okkai laappan; Israel dilag huu okkai amuppa amu danab laippu laa anukka qaɗabppa mana mettaknu uɗat laa ii heum.

¹⁴ Amu ig doot autta aottem. Ihinig Naɗi, Nug Juda buɗubppa doum. Amu Moses nug buɗub amuppanu mana mettak danab laa bekkunu amu, nug laa ii aum.

¹⁵ Aria, nai imu diig am miag atiaknab daye, ig anidta doottem. Mana mettaknu danab laa Nug beum amu Melkisedek bia daatte.

¹⁶ Laa amu Nug ɗo laappa, o iitta aun tiigppa, o iitta aun buɗubppa keeke, Nug amuppa Naɗinu mana mettak danab ii beum daatte. Iitta! Nug bauklel hanhan dayaknu, gogtak nuhig iitta ele, ɠagattag amunuppa mana mettak danab beum daatte.

¹⁷ Am Kayak naippa nuhignu yaak daatte amubia. Nai amuam inam. “Na am Melkisedek bia, mana mettak danab hanhannu daattem.”

¹⁸ Mana mettaknu danab baknu ɗo anukkanu am ebehi iitta, am meu enanag laa he ii beum amunu, Kayak Nug qe iitta meum.

¹⁹ Aɗinu? Ɗo nug he, keeke laa elelenab ii beum, amge Kayak Nug ib laa ooɗom. Ib amu nug ɗo eɗittak, enanag. Amu ib amuppa ig Kayak toppa wakkunignu elele daattem.

²⁰ Aria, Kayak Nug Jesus Nug mana mettak danab daakkunu kobol hamuppa ii tituanom daatte. Iitta! Nug nukka Nug onigppa nuhig nai ɠagattag qetta anana tituanom.

²¹ Mana mettak danab anukka ag am anamnab iitta. Anukka auntai laa Kayak Nug Nug onigppa nuhig nai ɠagattag qetta anana he, mana mettak danab beum? Laa iitta, amge Jesus nuhignu aakkuib Kayak Nug nukka Nug onigppa nuhig nai ɠagattag qetta, mana mettak danab daakkunu a, Nug beum daatte. Kayak Nug Jesusnu inam aum. “Naɗi Nug nukka Nug onigppa nuhig nai ɠagattag qetta, ‘Na amu mana mettak danab hanhannu daattem,’ aum amu, Nug dabmak nuhig iinab baolima.”

²² Kayak Nug Jesus mana mettak danab daakkunu, nuhig nai ɠagattag qetta aum, laa ag anukka mana mettak danab daappig, ahilagnu anam ii aum, diig amunu ig ⌊Jesusnu oonigppa genab doottem, ig dimppa nug tituana nai qakkak nai bau, ig nob ena aɗi aɗi aognignu atte amu, ig genab aognignu doottem.

²³ Aria, anukka mana mettak danab kuɗum ag daaeg uɗiom. Aɗinu? Ag am danab aakkuib, ag mauhadppig amunu, ag hanhan anamib daaglagnu elele iitta.

²⁴ Amge Jesus Nug am hanhan bauklel daatte amunu, Nug mana mettak danab hanhan daakku. Baoliak laa iitta. Mana mettak dayak amuam danab laa eppegppa iinab wama

²⁵ amunu, Nug danab ag nuhigppa Kayak gukkuidna watteb ele, Nug ag eɗua diieb, bauklel hanhan daaglagnu elele. Aɗinu? Nug hanhan ahilagnu Kayak unuqidkkunu bauklel daatte.

²⁶ Mana mettak ikki danab anam nug ig ehanigkkunu daakkunu am enanag. Nug am oppiaawak, ooppa kaliak laa iitta. Nug oppiak ele, hipunin danab bia ele iitta. Nug onig attannab tak daatte.

²⁷ Jesus Nug am mana mettak ikki danab anukkanu, ag deɗ oh doɗ main, Kayak Nug hipunin ahilag tatam uhuqa mattowa, danab dilag ele uhuqa madakkunu medappig bia ii hette. Nug uɗat nuhig anam iitta. Kayak Nug danab ah dilag hipunin uhuqa madakkunu, Jesus Nug haen laippu aakkuib Nug nukka Nug beɗu oh Kayak mettom amunu Nug baula ii hema.

²⁸ Amu ɗo tatamnu am danab gai-iitta tituanatte, ag mana mettak ikki danab daappig, amge nai Kayak Nug nukka Nug onigppa ɠagattag qetta aum, ɗo nai dayeye nai amu beum amu, nai amuppa Kayak Nug Bekka tituanom. Kayak Nug he, Nug Bekka amu Nug mana mettak ikki danab daakkunu elelenab ba, Nug hanhan anamib daatte.