Hibru 6 - Nobonob Baibel

Kayak aɗi aum am genab hekku

¹ Amunu ig Kristusnu nai digmakppan baubau haen oh ii mattimta. Ig danab kalu mettak ele nai maditte, amubia daagnignu hetu! Amu ig digmaknu nai, amuam ig oonig eɗueb, kobol nau oh genab iitta ele dimettagnignu nai, ig Kayaknu oonigppa genab doognignu nai,

² layattak digdignu nai, eppeg danab qaɗeppa maknu nai, Kayak Nug mauhak danab maɗetteb eɗua hibaittaknu nai, Kayak Nug danab ah oh ag epeɗiatteb, ag hanhan nob ena o iitta nob nau aon daaglagnu nai ele amu, ig nai amuib ii mattimta.

³ Iitta! Kayak Nug ig ehanikkeb, ig nai unuqag daatte ele, amunu mattignig.

⁴ Danab ag Kayak nai ena aoppig, ag matu hab attannu ɗo ena aon oolagppa meppig, ag Kayak Ouɗi ele aoppig,

⁵ ag Kayaknu nai doona enanag anana, kobol enanag butti aɗi haen amuppa ahilagppa bekkunu ele dooppig amu,

⁶ danab amu ag nena qena, Kayak dimettaglag dayeb amu, ag anam henana, ag oolag eɗueb, Kayak toppa wakkulagnu ib laa iitta. Aɗinu? Ag kobol amuppa Kayak Bekka baula ad emaitakppa atulna, ag Nug ad emaitakppa danab ag nuhignu uɗa laaittak nai akkulagnu aihtteb.

⁷ Am imubia. Kayak Nug wan laa, gu haen kuɗum wan amuppa ne, wan nug leppu amu awa, danab wan amuppa uɗat hena, ee ebatteb ele ehanatte, ee ena ba meu otte amu, Kayak Nug wan amu itittak ena medatte.

⁸ Amge wan uud keeke qaun ele, keeke amu amuppa betteb, wan amu uɗat ena ii hette amu, wan amuam eheɗ laa awaknu anak waappa daakkunu miagnab daatte. Danab ag maiglagnu daatte.

⁹ O lailad, genab gemu ig nai uug ele ag dooglagnu madittem, amge ig genab doottem, ag padal mak anam bia ii aomna. Iitta! Kayak Nug eɗua diiom amuppa ag ehanittak aotteb.

¹⁰ Kayak Nug epeɗiak eheɗ laa ii hette amunu, ag uɗat nuhig heppig, ag nuhignu oolag mauhtte dabmenana, nuhikkud danab ah oppiaawak ele ehanattegeg uɗie gemu ele anam hetteb amu, Nug amu oh daug ii atima.

¹¹ Amu ag dimppa gogtak haenppa aɗi aɗi aoglagnu dabmak aɗan oitteb ele amu, ag amuib aoglagnu elele daaglagnu, ig ag maɗi ahilag gemu pehettak hetteb amu, ag anamib heppeg ukkeb, gogtak haenppa malaglagnu oonig daatte.

¹² Ig ag bahilag iitta daaglagnu oonig ii daatte. Iitta. Ag danab ag oolagppa genab doona, ag oo maɗoɗ doon Kayak oɗe dim lamidna, amu kobol amuppa ag keeke Kayak Nug anukka bekkod madakkunu nai qakka aum, ag amu aotteb amu, ag danab anam baelag mattan ukkeg!

¹³ Aria, auntai laa nug Kayak eɗittak iitta amunu, anukka haen Kayak Abraham amegppa keeke hekkunu nai qakka aum amu, Kayak Nug, Nug onigppa nuhig nai ɠagattag qetta aum.

¹⁴ Nug inam aum. “Da genabnab genab na itidkkul. Da itidppi, na buɗunad ag appatna, kuɗum daaglag,” awa aum.

¹⁵ Amunu Abraham nug oo makppaib, bahi yaak ele iittappa nai amu meu okkunu ameg ma dayaya, keeke anukka Kayak medakkunu nai qakka aum amu aakku awom.

¹⁶ Aria, nai ɠagattag qetta anak kobol am inam. Danab nug nai nuhig danab laa onigppa ɠagattag qedatte. Danab laa am danab nai ɠagattag qedatte ele eɗittak amunu, danab laa nai nuhig ɠagattag qedatte amu, laanu nai nuhig nai eɗidmanu, nug laa nug eɗittak onig awa, attan ma nuhig nai onig amuppa ɠagattag qedatta, laanu nai okkultte.

¹⁷ Anukka Kayak Nug ig Nug bekkod ehanigkkunu nai ɠagattag qetta aum, Nug nai amu iinab baolimanu ippunikka auta aokkunu, Nug nai nuhig Nug onigppa ɠagattag qettom.

¹⁸ Aria, gemu keeke aɗit amu aakku daattep; laa am Kayak Nug keeke genab hekkunu nai qakka aum, laa am Nug nuhig nai Nug Nug onigppa ɠagattag qettom. Keeke aɗit amu aa baolikkulahnu elele iitta. Kayak ele hambubukkunu elele iitta. Aria, ig laa, ig Kayak Nug ig gog tak haenppa bauklel mekkeb aognignu dabmak aɗat daat, ameg mettem ele amu, keeke aɗit amu aa ig oonig ɠagattag qedattep.

¹⁹ Amu gog tak haenppa ig genab bauklel aognig, dabmak amuam ig dabmak digdig dim lamidmatanu, uub mameg nug uubnu anka eum daatte, amubia aɗaikke daattem. Ihinig ehanittak amuam keeke genab, hab attannu Kayaknu mettid lag Oo Gunnab Eleppa omaikka gotte.

²⁰ Jesus Nug tatam lag oo amuppa ig ehanigkkunu noum. Nug am mana mettak ikki danab, Melkisedek bia hanhannu beum daatte.