Hibru 5 - Nobonob Baibel

Kristen laa nug Kristus dimettamanu nai

¹ Aria, mana mettak ikki danab tituanaknu kobol amu inam. Kayak Nug danab oh oolagppanu danab laa, nug danab ah oɗelag awa, Kayak amegppa akkunu, Kayaknu uɗat ele hekkunu, tituana mette. Danab amunu uɗat am nug Kayak ɗo medakkunu, amu Kayak Nug danab ah dilag hipunin uhuqa madakkunu, nug doɗ ele mana, Kayak medakkunu daatte.

² Nug ele hipunin hekkunu eeɗak aotte amunu, nug danab ag ootot daatteb, ag ib apiɗidtteb ele amu, nug oo bodoettakppa atognoadkkunu elele daatte.

³ Amu mana mettak danab amu, nug ele hipunin hekkunu eeɗak aotte amunu, Kayak Nug danab amunu hipunin uhuqa medakkunu, danab laa oh dilag hipunin ele uhuqa madakkunu, mana mettak danab amu nug doɗ mana Kayak medakkuoitte.

⁴ Aria, mana mettak ikki danab, amu dayaknu am binag ele, amu danab laa nug nukka nug nuhig dabmakppa nug binag amu awa, anam daakkunu ii hema. Iitta! Kayak Nug tatam, anukka Aron uɗat amu hekkunu onigppa eum amubia, Nug danab uɗat amu maokkunu, danab amu onigppa ekkuoitte.

⁵ Amu Kristus Nug ele am anam. Nug nukka binag amu awa, mana mettak ikki danab ii beum. Iitta! Kayak Nug Nug amegppa aum. “Na am da Bekkal. Gemu da na Mamen bemi daattem,” awa aum.

⁶ Kayak naippa yaak laappa amu, Nug inam ele aum. “Na am Melkisedek bia, mana mettak danab hanhannu daattem,” awa aum.

⁷ Aria, anukka Jesus Nug danab beɗu awa wanppa dayom, haen amuppa Nug Kayak unuqittatta, Nug ele Kayak keeke laala hekkunu oɗ mettom. Nug mauhowa, ib laappa eɗua hippaidkkunu elele iitta, Kayak Nugib anam ehanidkkunu elele dayom amunu, Jesus Nug Kayak amu hekkunu ɠagattag oɗ medatta, ameg leb ne, Nug nukka binag qe ne, Kayak oɗe dim lamittom amunu, Kayak Nug nuhig oɗmak amu oɗeppa awom.

⁸ Jesus Nug am Kayak Bekkanab, amge Nug uug mawa, Kayaknu nai dim lamitta mauhom, amuppa Nug oɗe dim lamittaknu ippunittak awom.

⁹ Jesus Nug uug amu oh mawom amuppa Nug mana mettak ikki danab daakkunu elelenab mettom, amu Nug danab oh nuhig nai dim lamidtteb ele amu, Nug am ahilag ehanatta eɗua diiak hanhannu diig beum daatte.

¹⁰ Nug anam dayeye, Kayak Nug Nug mana mettak ikki danab, Melkisedek bia daakkunu tituanom.

¹¹ Aria, Melkisedeknu nai am unuqagnab, ig nota apput, ag nai imu aotteb ele ag dooglag am ena, amge ag oolag ootot ele daatteb, ag paha oolag maidkkunu elele iitta amunu, ig apput dooglagnu am uug ele.

¹² Ag ippunittak danab bena daaglagnu haen elelenab dayom amge iitta, ag doyak ahilag qakub amunu, laa nug ag Kayak nainu diig eɗua ippuanatteb aoglagnu daatteb. Ag am ee ɠagattag lakkulagnu elele iitta, ag huhib lanana daaglagnu elele.

¹³ Ig doottem, laa oh ag huhib latteb ele, ag am nid yuɗ daatteb. Amu ag genab tutukku hak kobol iinab dootteb.

¹⁴ Amge ee ɠagattag am danab kalulag ele, ahilagnu daatte. Danab anam amu, ahilag dabmak am okkai meum, ag dabmak elele aon oitteb amunu, ag kobol ena, nau ele epeɗin dooglagnu elele.