Hibru 4 - Nobonob Baibel

Kayaknu hik awak, nuhikkud danab ah dilagnu

¹ Aria, Kayaknu hik awaknu nai, nug amunu nai qakka aum amu, nai amu gemu ele daatte amunu, danab laa ag oolagppanu nug hik awak amu etta ii aomanu amu, ig dabmeta autta aotu!

² Aɗinu? Ig anukka Israel ag Nai Ena dooppig bia, ig ele doomut, amge ag am hamu bia doonna, ag oolagppa genab ii dooppig amunu, Nai Ena ag dooppig ele amu, ii ehanattom.

³ Aria ig Jesusnu oonigppa genab doomut ele amu, ig amunu Kayak aum bia aakku Kayaknu hik awak aottem, amge laa ag oolagppa genab ii dootteb ele, Kayak Nug ahilagnu inam aum. “Anam amunu, da ool nauhe, da keeke laa hekkulnu dahil nai ɠagattag qein ami. ‘Danab ah amu ag hik awak dahil iinab aomna.’ ” Nug hik awak amu ii babaittom amunu, ag ii aoppig am iitta. Nug hik awak amu matu digmak haenppa babaittom daatte. Ag oolagppa genab ii dooppig amunu, ag ii aoppig.

⁴ Amu Kayak naippa aben laappa Kayak Nug deɗ eblaih aɗitnu inam atte. “Kayak Nug uɗat nuhig oh ha mala, amu deɗ ebqak eblaih aɗitppa Nug uɗat heum ohppanu hik awom.”

⁵ Amu Kayak nai attan yaak daatte, nai amuppa Kayak Nug ⌊danab ah nuhignu oolagppa genab ii dooppignu⌋ inam atte. “Ag hik awak dahil iinab aomna,” ⌊amge amuam danab ah haen amuppanu ippunigtte,⌋

⁶ amunu, ig anidttem, danab ag hik awak aoglagnu elele, amge danab ag anukka Nai Ena doona, tappaeg ne, ag nona Kayaknu hik awak ii aoppig, amge hik awak amu babaittom daatte amunu, laa ag aoglag.

⁷ Amunu Kayak Nug deɗ baula, deɗ amuam onig, “Gemu,” meum. Tatam meum, dimppa maɗ kuɗum laa uue, Kayak Nug Dawit oɗeppa nai tatam anak daatte amubia aum. Nai amuam inam. “Ag gemu ag Kayak Nug nai inam atte amu, ag daulag human doyeg! Ag heppeg, oɗe ii dim lamidmananu dabmak ahilag ɠagattag aib eppom.”

⁸ Amu Josua nug danab amu Kayaknu hik awak mattalo amu, Kayak Nug dimppa deɗ laanu ii mattilo

⁹ amunu, Kayak Nug nuhikkud danab ag hik aon daaglagnu hik awak ⌊enanag, hanhannu ele⌋ babaittom daatte. Amuam deɗ eblaih aɗit elenu hik awaknab ahilag.

¹⁰ Aɗinu? Aun nug Kayaknu hik awak aotte, nug uɗat nuhig ii hette. Nug hik aotte, Kayak Nug hab wan ele ha malowa deɗ eblaih aɗitppa hik awom amubia.

¹¹ Amunu ig ele hik awak amu aot daagnignu Kayak Nug amunu aɗi atte amu ig hetu! Ig anukka Israel ag Kayak oɗe tappaeg neum bia padal mekkunignu ii hemata.

¹² Kayak nai am bauklel, uɗat haaha daatte. Nug am qep laa aeg laih laih ele, uɗat nuhig enanag hette amu, Kayak nai nug uɗat nuhigppa qep amubia eɗidtte. Nug keeke qataiettaknab daattep am okkula aokkunu elele. Danab nug dabmakppa aɗi dabmette, nug ooppa aɗi dootte amu, Kayak nai keeke amu oh epeɗiadtte.

¹³ Amu keeke laippu laa Kayak Nug amegppa lokkumak iinab daatte. Iitta. Keeke oh am Nug amegppa miagib amahlakppa daatteb. Amu dimppa ig Nug noobppa daata, ihinig haknu Nug amegppa mattignig.

Mana mettak ikki danab amu Jesus

¹⁴ Anam daatte amunu, ig ooppa genab doyak ihinig, ig heut miag atitte ele amu, ig amu aɗat auta aotu! Aɗinu? Ig ihinig mana mettak ikki danab, Nug hab aabppa teum daatte. Nug am Jesus, Kayak Bekka.

¹⁵ Ele amu ihinig mana mettak ikki danab, Nug am danab laa ihinignu oo ii dookkunu laa iitta. Hipunin haknu eeɗak kobol oh ihinigppa bette amu, amu ele nuhigppa beum, amge Nug hipunin laa iinab heum amunu, keeke nuhigppa beum bia ihinigppa beebe, ig gai-iitta bia daautut amu, Nug ihinignu oo doyak dookkunu elelenab daatte.

¹⁶ Amunu uug haenppa Kayak Nug ihinignu oo gai-iitta doya oo mekka ehanikkunu, Nug ig ehanittak okkai hamu megakkunu amu, ig ii baɗatta, Kayak gumitta gotu!