Hibru 3 - Nobonob Baibel

Jesus Nug Moses eɗidtte

¹ Amunu O ig lainkad, ag Kayaknu danab ah oppiaawak ele, Nug ag ig ele hab aabppa daagnignu tituanikkom amu, ag Kristus Jesus, Nug am ihinig ooppa genab doyaknu mana mettak ikki danab, Nug am ihinig ooppa genab doyaknu totol danab daatte ele amu, ag nuhignu atognona dabmena autna aweg!

² Kayak Nug uɗat amuppa meum amu Nug Kayak oɗe oo metta ii uuak kobolppa dim lamitta heum. Amu Nug anukka Moses Kayaknu danab oolagppa Kayak oɗe tutukku dim lamitta, uɗat heum bia heum.

³ Amge Kayak Nug Jesus binag okkai, Moses binag eɗittak ele, binag amu mettom. Aɗinu? Jesus Nug am lag hak danab bia dayeye, Moses nug am lag bia dayom. Amu danab nug lag hette ele, nug binag am lag binag eɗittak daatte, amubia Jesus binag am Moses binag eɗidtte.

⁴ Amu lag oh danab heeg daatteb, amge keeke ohnu hak diig am Kayak.

⁵ Moses nug am Kayaknu danab ah tamaniak ooppa maɗi nid dayaya, oo metta ii uuak kobol dim lamitta, dimppa keeke bekkunu amu Kayak oɗeppanu awa madittom.

⁶ Amge Kristus Nug am Kayak Bekkanab, Nug oo metta ii uuak kobol dim lamitta, Kayaknu danab dilag ikki dayaya ag gumadtte. Amu ig ihinkad oo ɠagattag qettak aɗat, amu ig Kristus, Nug am ena bekkunu dabmak aɗa oiyaknu diig, ig amunu mehuqttem amu, ig Nug ele aɗat amu, ig Kayaknu danab ah daattem.

Ooppa genab ii doyak kobol aib dayom

⁷ Amunu Kayak Ouɗi Nug atte bia: “Ag gemu Kayak Nug nai inam atte amu, ag daulag human doyeg!” Nai amuam inam.

⁸ “Ag mamelkad aɗi ag da oɗel dim lamidmananu dahil nai tappaeg ne heeg, ahilag dabmak am ɠagattag eppom. Ao, haen ag atu taɗakppa ma anttak da meɗappig amu, ag heeg, ahilag dabmak ɠagattag eppom. Amge ag gemu daatteb, ag aib heppeg, ahilag dabmak ɠagattag eppom.

⁹ Aben amuppa ag mamelkad aɗi ag da ma anttak okkai meɗanna, ag da aɗi aɗi hemi maɗ 40 aakku anidppig.

¹⁰ Amu diig amunu da danab amu dilagnu ool nauhe inam ami. ‘Danab ah imu ag haen oh dahil ib apiɗidna oitteb. Ag dahil kobol ii doyadppig, gemu ele ii doyadtteb.’

¹¹ Anam amunu, da ool nauhe, da keeke laa hekkulnu dahil nai ɠagattag qein ami. ‘Danab ah amu ag hik awak dahil iinab aomna.’ ” Kayak Nug anam aum.

¹² O lailad, ag lailag laa ag oolagppanu nug dabmak nau, amu ooppa genab doyak ele iitta, amubia oiyaya, Kayak bauklel dimettamanu, ag dabmena autna aweg!

¹³ Ag gemu haen imuppa Nug baag dooglagnu elele daatteb amunu, Nug haen imunu, “Gemu,” awa atte amunu, ag haen imuppa deɗ ohppa eheɗ hak kobol laa ag oolag bubuitteb, ag oolag ɠagattag eppamnanu amu, ag ag lailkad Nai Ena amelagppa mattinna, dabmak ahilag maɗatteg!

¹⁴ Aɗinu? Ig Kristus ele tamanit, laippu daagnignu ib am laippuib. Laa iitta. Ib amuam inam. Ig tatam Kristusnu oonigppa genab doomut amu, ig amuib aɗapput ukkeb, mauhak haen ihinigppa ele ooppa genab doyak nuhignu amu aakkuib aɗagnig dayeb, amuppa ig genab Kristus ele tamanit daattem.

¹⁵ Amuam nai ig geha iikku anidmut amubia. Nai amuam inam. “Ag gemu Kayak Nug nai inam atte amu, ag daulag human doyeg! Ag mamelkad aɗi ag da oɗel dim lamidmananu dahil nai tappaeg ne heeg, ahilag dabmak am ɠagattag eppom, amge ag gemu daatteb, ag aib heppeg, ahilag dabmak ɠagattag eppom!”

¹⁶ Anukka aun aɗi ag Kayak oɗe doona, hibguitta hena, nai nuhig tappaeg neum? Amuam danab oh Moses nug omalatte, Isip uun, ahan goppig ele. Ag kobol amu heppig.

¹⁷ Kayak Nug maɗ 40 haen amu ohppa aun aɗi dilagnu oo nauhak doyom? Amuam danab ah ag hipunin qenana, mauhna atu taɗakppa niippig. Kayak Nug ahilagnu oo nauhak doyom.

¹⁸ Amu Kayak Nug aun aɗi dilagnu ag genabnab nuhig hik awak ii aomnanu nai ɠagattag qetta aum? Amuam danab ah ag nuhig nai ii dim lamidppig ele. Kayak Nug amu dilagnu anam aum

¹⁹ amunu, ig anidta doottem, ag oolagppa genab ii dooppig amunu, ag Kayaknu hik awak aoglagnu elele iitta.