Hibru 2 - Nobonob Baibel

Kayaknu eɗua diiak am keeke okkainab

¹ ⌊Kristus Nug onig binag okkai ele amu awom daatte, Nug Kayak nai ippunikkom,⌋ diig amunu amu ig Nai Ena dim lamidkkunignu bodoettamtanu, ig nai doomut ele, nai amu ig aɗat dabmeta autanab aot dim lamidtu!

² Anukka Kayak Nug engel oɗelagppa ɗo nai aawo be, nai amu ɠagattag daattom. Ɗo nai anam ɠagattag daye, danab ag uun, tappaeg neum amu, ag nob nau, ahilag eheɗ hak eleleppa aodppig.

³ Aria gemu amu Kayak Nug ig eɗua awigkkunu ib babaittom, uɗat naɗi nuhig aakku daatte amunu, ig Kayaknu uɗat amu dimettagnig dayeb, ig eheɗ hak ihinignu nob naunu dekkaɗta oolta gokkunignu elelete? Iitta! Ig elele iittanab. Naɗi Jesus Nug nukka, eɗua awikkak amunu amu Nug tatam a, danab ag Nug oɗeppa aawo dooppig ele ag ig amenigppa nai amunu am genabnab ippunigppig.

⁴ Kayak Nug nuhignu dabmettaknu kobol danab haknu elele iitta hattomppa, aria kobol danab haknu elele iitta laalappa, amu Nug nuhig Ouɗinu ɗo digdig ele, Nug oo niiom bia, danab mattom eleppa nai amu ɠagattag qettom.

Jesus nukka Nug Eɗua Awikkak Danabnab daatte

⁵ Aria ig gemu wan laa, butti aɗi bekkunu attem amu, Kayak Nug engel ag amu gumaglagnu laa ii maattom. ⌊Iitta. Nug nuhikkud danab ag gumaglagnu maattom.⌋

⁶ Kayak naippa, laa nug amunu inam yom. “Danab ah amu, ag am aɗi daatteb amunu, na ag dabmattanna daattem? Ao, danab bekkalkad, ag am aɗi daatteb amunu, na ag atognoadttem?

⁷ Na engel nakokib anuqak hattame; danab ah ag ag nakokib waappa daatteb. Na danab ah binag amahlak oppiaawak ele, aria dagom onig ɠagattag ele ag mattame.

⁸ Na ag keeke oh gumadkkulagnu ag eppelagppa meme.” Nai anam daatte. Amu Kayak Nug keeke oh ag eppelagppa meum, keeke laippu laa ii uuittom daatte, amge gemu ig anidttem, danab ag keeke oh ii gumadtteb.

⁹ Amge ig Jesus anidttem. Engel ag onig okkai ele, danab ag onig amu nakok waappa aoppig daatteb. Amu Kayak he, Jesus Nug onig engel onig nakok waappa awa dayeye, Kayak Nug nuhig ehanittak okkai hamu mettak dabma danab oh eɗua diikkunu dabmeum, amu diig amunu Jesus Nug ig danab oh ig ehanigkkunu mauhom amunu, Kayak Nug humitta, binag amahlak oppiaawak ele, aria dagom onig ɠagattag ele mettom.

¹⁰ Kayak, Nug keeke oh diig, keeke oh Nug hattom ele, amu Nug bekkod kuɗum oh diia attan teeb, binag amahlak oppiaawak ele daaglagnu dabmaama, Nug Jesus Nug guittak doyaya, ib amuppa Nug Eɗua Diiaknu Anuqak Danab elelenab ba daakkunu aum. Amuppa Kayak Nug kobol elelenab heum.

¹¹ Laa amu, Jesus Nug he, danab oppiaawak betteb. Amu danab oppiaawak betteb ele, ag Nug ele oh am Mamelag laippu waappa daatteb amunu, Jesus Nug amu dilagnu, “Da lailad,” akkunu Nug uɗa ii nette.

¹² Nug atte. “O Kayak, da geha da lailad amelagppa nahipnu madikkul. Yo, nahipad danab ah noolagppa, da na binan humakkul.”

¹³ Nug ele inam atte. “Da nuhignu oolppa genab dookkul.” Nug laa ele inam atte. “Aria da, amu nid naunau, Kayak Nug da meɗom ele amu, da ag ele ig oh iikku daattem,” awa atte.

^14-15 Nid naunau amu ag anilkad mamelkad ag beɗulag bia beɗulag aon oitteb amunu, Jesus Nug Satannu ɠagattag, ɠagattag amuppa Satan nug he danab mauhtteb amu, Nug ɠagattag amu heeb iitta mekkunu, Nug danab ag wan imuppan oiyak ahilagppa haen oh mauhaknu baɗak doon, ag amuppa hippalak daappig ele amu, ag amunu uhuqak ele madakkunu, Nug ele danab beɗu awa, Nug mauhom.

¹⁶ Genabnab Jesus Nug ⌊nuhig mauhakppa⌋ engel ii ehanadtte. Iitta. Nug Abraham buɗuppud ehanadtte.

¹⁷ Amunu, diig amunu, Nug Kayak noobppa oo gai-iitta doya oo metta ehanittak kobol, oo metta ii uuak kobol ele dim lamata mana mettak ikki danab daakkunu, amu Nug danab dilag hipuninnu eheɗ haknu nob nau Nug tiigppa iitta mekkunu heeb elele medakkunu elele daakkunu, Nug ib ohppa Nug laikkud bia bekkununab dayom.

¹⁸ Amu Nug nukka hipunin hekkunu eeɗak doyaya, uug mawa guittak doyom amunu, haen danab ag hipunin hekkulagnu eeɗak dootteb ele amu, Nug ag ehanadkkunu elele.