Hibru 12 - Nobonob Baibel

Jesus dim lamittaknu nai

¹ Aria, ihinignu amu ig anukkanu danab kuɗumnab ag ig ooppa genab doyak kobol ippunikkeg anidttem amunu, ig ooppa genab doyak ippu tutukku dim lamidtu! Ig danab laa ag nug eɗid eɗid qaiettan gotteb ele ag keeke oh beɗulag uug medatte ele, ag amu buɗieg ukke, qaiettan gotteb, amubia ig aɗi keeke, ig amu aɗat ooppa genab doyaknu ippu tutukku ii dim lamidkkunig amu, ig keeke amu buɗipput ukkeb, ig aɗi hipunin, nug ig beɗunigppa ta aɗaikkom daatte ele, ig amu ele qepput na ukkeb, ig Kayak Nug ippunig mekkom amu, amuppa bahi yaak ele iittappa qaiettat gotu!

² Amu ig amenig ukkeb, Jesus, Nug am ooppa genab doyaknu diig daatte, Nug ooppa genab doyak ihinig elelenab medakku diig ele amu, ig Nug anidtu! Jesus Nug anukka maɗoɗppan gamag ahak geha dimppa anidkkunu dabmeum amunu, Nug ɠagattag dayaya, ad emaitakppa uug doyaya, guittak awa mauhom. Ad emaitakppa mauhaknu amu uɗa nak ele, amge Nug dimppa maɗoɗppan gamag ahak okkai aokkunu dabmaama, uɗa nak amunu dab-ii-meum; am keeke hamu bia doyom. Nug amu hewowa, Nug hab aabppa, Kayak eppeg naɗiap-ppa heɗep na dayom.

³ Ag Jesus aɗi ippunigtte am antteg! Hipunin danab anukka ag Jesus kekeɗ okkai medappig, amge Nug ɠagattagnab dayom. Ag gemu oolagppa genab dootteb amu, ag keeke amu dabmena, ag ele aib bahilag yom; ag ebehilag ele aib bodoettom.

⁴ Ag am hipunin qeppeg nekkunu ban heppig, amge ban amuppa ag tiilag ii ne mauhppig.

⁵ Ag oolag ɠagattag qedakkunu Kayak Nug nai laa aum amu ag nai amu ag daulag atiomtai? Nug nai amuppa ahilagnu am Nug bekkod doyaya aum. Nai amuam inam. “O nid dahil, Naɗi Nug na ena bekkutnu tolitta bu nitteb amu, na amunu keeke hamu bia aib doome. Ge, Nug na ena bekkutnu daut bateb amu, na oot bai aib noum.

⁶ Aɗinu? Naɗi Nug danab laa, Nug ahilagnu oo mauhtte amu, Nug danab amu ena daaglagnu toliatta bu madatte. Ao, Nug danab laa awa, nuhignu, ‘Nid dahil,’ atte ele amu, Nug danab amu ena bekkunu bu medatte.”

⁷ Nai anam daatte amunu, Kayak ag ena bekkulagnu uug madatte amu, ag anen anen haen amuppa, “Kayak ehaniɗtte,” doona, ɠagattag dayeg! Kayak Nug ahilagnu, Nug bekkodnab doyatta atognoadtte. Danab aun laa nug nid nuhig, nug ena bekkunu ii tolitta, bu ele ii qette? Laa iitta.

⁸ Danab oh ag nid ahilkadnab ena bekkulagnu toliadna bu aqatteb amunu, Kayak Nug ag oolagppa genab dootteb ele, Nug ag ii toliatta bu ele ii aqatte dayeb amu, ag Nug bekkodnab iitta; ag am ib imuagnu nid bia daatteb.

⁹ Amu ag imu ele antteg! Ig oh mamenkad wan imuppanu amu, ag ig ena bekkunignu toligna, bu iqaeg, ig ag hepppignu ahilagnu ena elele doomut. Anam amunu, ig Mamenig hab aabppa daatte ele amu, ig Nug waappanab daatu! Ig anam daatta, bauklel aognig.

¹⁰ Ig mamenkad ag ig ena bekkunignu amu haen tutuib, ag oolag anam daatte ele, amu dim lamidna toligna, bu iqappig, amge Kayak Nug ig ehanigkkunu, Nug oppiaawak daatte, ig ele amubia daagnignu tolikka bu iqatte.

¹¹ Danab nug ena bekkunu tolitta, bu qak aotte ele amu, haen nug aotte danab amu nug maɗoɗppan gamag ahak ii dootte. Iitta. Nug ooppa guittak dootte, amge Kayak Nug danab amu nug ena bekkunu uɗat amu ha male, danab aun nug tolitta bu qak amu pehettak aotte ele amu, nug genab tutukku hak kobol dim lamitta oiyaya maɗoɗ ele daatte.

¹² Anam amunu ag danab nug eppegte, iitta nug gategte gai-iitta meum ɠagattag qedatte, amubia ag akka ɠagattag aqeg!

¹³ Amu ag oolagppa laa ag baelag nau autaut oitteb ele amu, ag nauhna autna aomnanu, ag eɗun ena daaglagnu, ib ag oh tappan gotteb ele, ag ib amu bappaidna autna aweg!

Dabmettaknu nai

¹⁴ Amu ag danab laala ele ag oh maɗoɗ ele daanna oiglagnu uɗat ɠagattag hena, ag oppiaawak kobolppa daaglagnu ele wagai meig! Aɗinu? Danab laa nug oppiaawak iitta ele, nug Naɗi anidkkunu elele iitta.

¹⁵ Danab laa nug Kayaknu ehanittak okkai hamu megatte ele amu dimetta na qemanu dabmeig! Ag oolagppa danab laa nug ad laa tiig mua ele, danab lanana mauhtteb ele, amubia dayaya, nug heeb, uug aqeb, ag kuɗum ag Kayak amegppa dubuttid ele daamnanu ele dabmeig!

¹⁶ Danab laa nug gappai kobol dim lamidmanu, o laa nug Esau, nug Kayaknu nuhig haknu ele uuak danab, nug nid danab tatamnu itittak ena amunu hamu doya, Jakop nug ee nakoknab, geha iikkunuib metteb, nug itittak ena amu Jakop medakkunu a mette lawowa, itittak mettom ele amu, laa nug Esau bia oimanu ele dabmeig!

¹⁷ Aɗinu? Ag dootteb bia, dimppa Esau nug Aisak eppegppa itittak ena aokkunu heum, amge nug elele iitta dayom. Esau nug itittak ena aokkunu gayak huana heum, amge nug ib nakoknab laa ii anttom.

Tituanak aɗit dilah nai

¹⁸ Israel ag anukka Sinai qaukoppa wappig. Ag qauko amu aɗan dooglagnu elele, appa aab naɗi ewa dittiak ele dayom. Appa gatatu teppu ele dayeye, ulah naɗinab ele dayom, amge ag gemu daatteb, ag qauko amubiappa ii wappig.

¹⁹ Qauko amuppa trampet huana iwalak dayom, amu Israel ag amu oh doon anidppig. Ag qauko amuppa amu oh doon anidna, ag ele Kayak baag doon, ag baɗana Moses amegppa inam appig. “Ig baula baag amu doyak uuttem,” aon appig.

²⁰ Haen amuppa ag Kayak nai mattom, ag nai amunu baɗan autna aoppig. Nug nai inam aum. “Danab laa nug eppeg bahia qauko imu aɗeb, o doɗ laa nug qauko nakoknab tappeb amu, ag menppa qeppeg mauhaɗ!” awa aum.

²¹ Yo, Israel danab ag keeke amu anidna, oolag huana baɗom. Amu Moses nug ele aum. “Da baɗen hahaɗttem,” awa aum. Israel ag keeke amu oh gumidna wappig.

²² Amge ag gemu daatteb, ag oolagppa genab dootteb ele amu, ag keeke anamppa ii wappig. Iitta! Ag amu Sion qaukoppa teppig. Ag am Jerusalem hab aabppanu, Kayak bauklelnu appagppa teppig. Ag amu engel tausen tausen maɗoɗppan gamag ahak okkai ele qagmena daatteb ele, amuppa teppig.

²³ Amu ag Kayak bekkod tatamnu, Kayak Nug ag onilag matu hab aabppa yom daatteb, ag amu dilag qagmak naɗi amuppa wappig. Ag Kayak, Nug am danab oh epeɗiadtte ele amu, Nug gukkuidna wappig. Amu ag danab anukkanu, Kayak Nug ahilagnu, “Genab tutukku hak danab,” aum, ag mauhadna hab aabppa elelenab daatteb ele amu, ag gemu daatteb, ag oolagppa genab dootteb ele, ag amu gumadna, ahilagppa teppig.

²⁴ Amu ag Jesus, Nug am gamag danab, Nug nug tituana nai qakkak bau heum daatte ele amu, ag nuhigppa wappig. Kain nug Abel qe mauhom, haen amuppa Abel tiig neum, amunu nob nau mak dayom, amge Jesus ehanigkkunu he, Nug tiig neum amu, ag amuppa wappig.

²⁵ Amunu ag dabmeig! Ag aib daulag itun, Kayak nai maditte qeppeg neum. Anukka wan imuppa Sinai appa amu, Kayak Nug nai ɠagattag danab amelagppa aum, amge ag nuhig nai tappaeg neum. Ag tappaeg neum amunu, ag ahilag hipuninnu nob nau qe-eɗidna gokkulagnu elele iitta daappig. Gemu Kayak Nug hab aabppa dayaya, nai ɠagattag ig megatte amunu, ig Nug dimettata, ig oolta hipunin ihinignu nob nau qe-eɗidkkunignu elelete? Iittanab!

²⁶ Anukka Kayak Nug oɗeppa nai aawo, wan uɗalom, amge geha Nug nai qakka inam aum daatte. “Da geha baula wan heppi uɗalkku, amge wanib iitta, hab ele oh uɗalkkulah,” awa aum.

²⁷ Amu, “Baula,” nai amu inam ippunigtte. Kayak Nug anukka keeke hattom ele amu, keeke amu oh geha uɗalkkulag. Keeke oh diignab iitta ele daatte amu, uɗalak amu heeb, iitta mekku, baula ii daamna. Keeke laa, diignab ele amu, keeke amu aakkuib geha daakku.

²⁸ Keeke diignab ele aakkuib daakku, amu ig ɗo maɗoɗ amuppa daattem amunu, ig Kayak amegppa, “Ena hen mekkame,” aot atu! Amu ele ig ebehinig oh nuhignu bodoetta, le ma aut auta aweb, ig Nug oo niitte bia Nug noobppa dup nota binag metu!

²⁹ Aɗinu? Ihinig Kayak Nug am aab dittiak naɗi, keeke oh ewatte iitta metteb, Nug amubia daatte.