Hibru 11 - Nobonob Baibel

Ooppa genab doyak nai digdig

¹ Danab nug ooppa genab doyak ele amu, nug aɗi keeke aokkunu dabmak aɗa daatte ele, nug genabnab genab aokkunuib dabmette; nug ii aomanu nakok laa ii dabmette. Amu ele nug keeke amegppa ii anidtte ele, nug anamib genab anidkkunu dabmette.

² Amu danab anukkanu, ag am oolagppa genab dooppig amunu, Kayak Nug ahilagnu oo ena doyaya, ahilagnu ena aum.

³ Ig Kayaknu oonigppa genab doottem amunu, ig imunu maittak aottem. Kayak Nug oɗeppa haknunab nai aawo, wan, hab, atu, keeke oh ele beppig daatteb amunu, keeke ig gemu anidttem, keeke amu oh am keeke ig anidkkunignu elele, am amuppa ii beum.

⁴ Abel nug Kayaknu ooppa genab doyom amunu, nug mana mettak, Kain eɗittak, mana mettak enanag heum, amu Kayak nuhig mana mettaknu amu enanag antta nuhignu, “Genab tutukku hak danab,” awa aum. Abel nug am anukka mauhom, amge nuhig ooppa genab doyak am ig aɗi hekkunignu gemu ele ig ippunigtte.

⁵ Amu Enok nug ele Kayaknu ooppa genab doyom amunu Kayak he, nug bau dayaya, Kayak toppa waum; diig amunu nug ii mauhom. Kayak Nug Enok awom amunu, laa ag nug baula ii anidppig. Enok hab aabppa ii ukkom haenppa, tatam Kayak Nug nuhignu oo ena daye he, amu miag atiom.

⁶ Danab laa nug ooppa genab ii dootte ele amu, Kayak Nug nuhignu oo ena dookkunu elele iitta. Aɗinu? Danab ag nuhigppa wakkulagnu oolag hette amu, ag Kayak Nug daatte, amu danab ag oolag unuqagppanu Nug mattin oitteb ele, Nug ag nob ena madatte oolagppa genab dooglagoitte. Ib laa iitta.

⁷ Noa nug Kayaknu ooppa genab doyom, amu Kayak Nug keeke laa, Noa nug deɗ laa ii anttom bekkunu nug amegppa nau aomanu nai mattie, Noa nug ebehi oh Kayaknu bodoetta le meum ele amu, nug nuhig nai amu doya, nug baekkudppa ele ena daaglagnu nug uub itom. Ooppa genab doyak nuhig amuppa amu nug danab laa oh, ag oolagppa genab ii dooppig ele, ag eheɗ heppig aakku ippuanatta, ooppa genab doyak amuppa ele nug am genab tutukku hak danab beum.

⁸ Abraham nug ele Kayaknu ooppa genab doyom amunu, nug Kayak oɗe dim lamitta, Kayak Nug wan atu laa nug aug daakkunu medakkunu aum, amuppa ukkom. Amu nug appag diignab uua aha, aab attenppanab ukka daakkunu amu, nug oo ii maittette ukkom.

⁹ Amu nug Kayaknu ooppa genab doya ukka, wan Kayak medakkunu nai qakka aum, nug atu amuppa aab diig danab iitta laa dayom. Nug peh lag, amuppaib daattom. Aria, nug bekka Aisak, nug alag Jakop ele, aa nug buɗub amu, Kayak Abraham amegppa keeke medakkunu nai qakka aum ele amu, aa nai amu ele aopiɗ. Amu aa ele wan amuppa peh lag ahilti, amuppaib wan amuppa daadttapiɗ.

¹⁰ Abraham nug aab okkai laa, Kayak dabma heum, aab amuam hanhan daakku ele amu, aab amuppa daakkunu ameg ma dayom amunu, nug wan amuppa peh lagppa daakkunu uug ii doyom.

¹¹ Sarah nug am ah mattoi, nug kaino ma, nid aokkunu haen nuhig iitta meum, amge Kayak Nug nug nid menukkunu nai qakka a, Sarah nug Kayaknu ooppa genab doyom amunu Kayak he, Sarah nug nid menukkunu elele dayom

¹² amunu, danab laippu amu nuhigppa danab appatna, kuɗumnab daatteb. Nug am mauhom bia dayom, amge nug buɗub ag gemu ebqaknu elele iitta daatteb. Ag hoɗoppai habppa daatteb dilag ebqak bia, amu yu ihippa abuɗnu ebqak bia daatteb.

¹³ Abraham aɗi amu ag ahilag ooppa genab doyak amuib aɗan mauhppig. Ag Kayak keeke madakkunu nai qakka aum, nai amuib aoppig daanna mauhppig; keeke amu ii aoppig, amge butti aɗi keeke amuam bekkunu genab anidppig. Ag appig. “Ig am wan laihnu danab uɗit daatteb bia daattem; wan imuam ig appanig diignab iitta,” aon appig.

¹⁴ Danab ag akka ahilagnu anam atteb amu, ag amuppa miag atiak ippunigtteb; ag appalag diignab anidkkulagnu neegna daatteb.

¹⁵ Ag wan imuppan appalag tatamnu uun Kanan wanppa uɗippig ele, ag amun ii dabmeppig. Ag anam dabmelob amu ag eɗun gokkulagnu elele daalob,

¹⁶ amge anam am iitta. Ag appalag ena dimppanu, hab aabppa amunuib dabmeppig amunu Kayak Nug, “Da ahilag Kayak,” akkunu amu uɗa ii nette. Iitta. Nug aab enanag, ag daaglagnu babaittom daatte.

^17-19 Abraham nug Kayaknu ooppa genab doyom amunu, haen Kayak Nug Abraham ma anttak mettom, haen amuppa Abraham nug bekka mana, Kayak medakkunu keeke oh babaitta, ⌊Kayak medakkunu⌋ heum. Anam ha dayeye, Kayak he, nug bekka ii qeum, amge Kayak Nug Abraham amu oh helo bia doyom. Tatam Kayak Nug Abraham amegppa Aisaknu inam aum. “Na buɗunadnab am Aisak, nuhigppa bekkulag,” awa aum. Yo, Kayak anam nai qakka a, Abraham nuhig nai amu awom, amge dimppa nug Kayak oɗe dim lamidkkunu, Aisak mana, Kayak medakkunu keeke oh babaittom. Aɗinu? Abraham nug anam hekkunu haaha, nug Kayaknu inam dabmeum. “Da bekkal mauha, eɗua hippaidkkunu amu, Kayak Nug amu hekkunu elele.” Nug anam dabma, keeke oh Aisak mana, Kayak medakkunu babaitta mala dayom amunu, ig inam akkunignu elele. “Abraham nug bekka mauhak abenppanu eɗua awom,” aot akkunig.

²⁰ Aisak nug Kayaknu ooppa genab doyom amunu, dimppa ahilahppa aɗi keeke bekkunu amu, nug Jakop, Esau ele itittak ena matom.

²¹ Jakop nug Kayaknu ooppa genab doyom amunu, nug mauhkkunu haen miag dayeye, nug Josep bekoɗ aɗit itittak ena matom. Nug mata male, nug dudqaknu hokkat nuhig ikki aɗe ehanitte dayaya, Kayak noobppa dup noa binag meum.

²² Josep nug Kayaknu ooppa genab doyom amunu, haen nug mauhkkunu haaha amu, nug Israel ag dimppa Isip uun ahan gokkulagnu ana, nug beɗu attem boumkkulagnu ele aum.

²³ Moses anig mameg ele aa ele Kayaknu oolahppa genab doopiɗ amunu, anig nug Moses menue, nid enanag anidya, kalam ewam lokkumeh niittom. Aa Paronu oolah ii baɗeɗe hepiɗ.

²⁴ Moses nug Kayaknu ooppa genab doyom amunu, haen nug okkai ma dayom ele, nug ag nuhignu, “Nug am Paro aɗeg bekka,” akkulagnu oo ii dayom.

²⁵ Iitta. Nug amu uua, amu Kayaknu danab ah ele ag oh uug laippu maoglagnu oo dayom. Nug hipunin kobol dim lamitta oiyaya, oo gamag ahak haen tutunuib aokkunu amu, nug oo ii niiom.

²⁶ Nug nob ena, butti aɗi Kayak medakku amunuib dabmeum amunu, nug Kristus onigppa uɗa nak aokkunu ena doya, Isip enubnu amu, nug keeke hamu doyom.

²⁷ Moses nug Kayaknu ooppa genab doyom amunu, nug Isip wan uua, aha ukkom. Nug Paronu oo nauhak amunu oo ii baɗom. Amu danab ag Kayak amelagppa anidkkulagnu elele iitta, amge Moses nug anttom bia daya, nug uug doyaya eɗittaknuib dabmak awak kobol dim lamitta dayom.

²⁸ Moses nug Kayaknu ooppa genab doyom amunu, aqaknu engel nug Israel dilag nid danab tatamnu menuattak gukkuatta ii wamanu, nug Israel ele ag Pasowanu Hobul hena, ag sipsip tiilkad laulkad od uguppa tauɗ qedappig.

²⁹ Israel danab ag Kayaknu oolagppa genab dooppig amunu, ag wan qaɗaiettakppa oittem, amubia ag le kokoɗ mataɗna laih wappig. Amge Isip ag anam hekkulagnu heegeg, le tonatte ag oh mauhppig.

³⁰ Israel ag Kayaknu oolagppa genab dooppig amunu, ag Jeriko aabnu aɗ haen eblaih aɗit ele talilidna oin malaeg, aɗ pana na qeum.

³¹ Rahap, nug am ib baag ah, nug Kayak aɗi hekkunu aum doya amu, nug Kayaknu ooppa genab doyom amunu, nug lokkumakppa atu italak danab aɗit laa, aab italaknu uɗipiɗ ele, nug aa ele laippu dayaknu ooppa eleleib doya ehanatom amunu, nug padal mak eheɗ hak danab ag aoppig ele amu, nug amuppa padal ii meum.

³² Amu oh ag anam heppig amunu, gemu da aɗi nai laa tuɗitte madikkul. Amu da Gideonnu kaya, Baraknu kaya, Samsonnu kaya, Jeptanu kaya, Dawitnu kaya, Samuelnu kaya, amu propet dilag kaya ele madikkulnu elele amge haen iitta.

³³ Danab amu ag Kayaknu oolagppa genab dooppig amunu, ag wan laalappa ele ban hena eɗidna, ahilag wan aon, ag nai doya mala hettoɗia elele mettak kobol dim lamidna, epeɗiak tutukku hena, ag Kayak keeke madakkunu nai qakka aum amu aona, amu ag laion oɗelag qamutppig.

³⁴ Amu ag heeg, aab nau qauhppig. Ag qep elab aqamanu dekkaɗppig. Ag gai-iitta daappig, amge dimppa ag ɠagattag aoppig. Ag ban danab ɠagattag bena amu, ag aab laalappanu ban daup lamatteg goppig.

³⁵ Aria, danab ag oolagppa genab dooppig ele, ag heeg, danab laala mauhppig ele ag eɗun hippaidna, ag waalkad ele baula daappig. Amu laa ag oolagppa genab dooppig ele, ag oolagppanu laala kekeɗ ahilkad ag eheɗnab hattanna, beɗulag heeg nauha auta awom, amge ag mauhona, dimppa eɗun hippaidna, bauklel hanhannu, wan imuppan bauklel eɗittak, ag amu aoglagnu aakkuib dabmeppig; ag Kayak dimedappeg, kekeɗ uuadppeg gokkulagnu dab-ii-meppig.

³⁶ Ooppa genab doyak danab laala amu, kekeɗ ahilkad ag aon aon aqanna, laala ag bu qaun eleppa mataɗadna, amu laala senppa hippaladna, maniguittakppa maatteg daappig.

³⁷ Ooppa genab doyak danab laala amu, ahilkad kekeɗ ag menppa makkuɗatteg mauhppig. Laala amu ag hahppa beɗulag otaɗatteg ne mauhppig. Laala amu qep-ppa aqaeg mauhppig. Kekeɗ ag ooppa genab doyak danab amu eheɗ hatteg, ag lamen sipsip o meeme gaɗappa hak takkan, ag keekenu ele daɗeknab daappig.

³⁸ Ag laala ag matatun gona, atu taɗakppa, danab appa iitta eleppa oiyegeg, laala ag gona, qaukoppa oiyegeg, laala ag men oɗeppa ele daappig. Wan imuppan danab nau ag ooppa genab doyak danab amu ele elele iittanab.

³⁹ Ooppa genab doyak danab amu ag Kayaknu oolagppa genab doon, ag Kayak noobppa onig ena aoppig, amge ag oolagppa laa nug Kayak keeke ena madakkunu nai qakka aum amu, ag wan imuppa daappig haenppa ii aoppig.

⁴⁰ Aɗinu? Kayak Nug ag haen Nug tituanom ele amu haen amu ameg mebeppeg, ag ig ele oh, ig haen amuppa elelenab beta daagnignu dabmeum.