Hibru 10 - Nobonob Baibel

¹ Aria, Mosesnu ɗo am Israel danab ah ag attem attem hekkulagnu ippunattom, amge hak amu oh am keeke ena butti aɗi genab bekkulag dottogib aakku dayeye anidttem. Hak amu oh am ɗo diigppanab aɗi daatte dottogib daatte; am keeke amunab iitta. Diig amunu amu, ɗo nug mana mettak iɗu iɗu anamib maɗ ohppa haknu atte, amge ɗo nug danab ag gunnab abenppa nokkulagnu elele daaglagnu bappaladkkunu elele iitta. Ɗo nug heeb, ag elelenab ii bemana.

² Amu ɗo nug heeb, danab ah ag elelenab bekkulagnu elele daalo amu, ag mana mettak baubau ii helob. Aɗinu? Danab ag mettid hetteb ele amu, ag mana mettak haen laippuppaib oppiak beppig doolob, ag hipuninnu beɗulagppa aab ele ii doolob, ag mana mettak uɗat baula ii helob.

³ Amge iitta. Maɗ ohppa mana mettak amuam heeg, ag hipunin ahilag daulagppa dotte.

⁴ Aɗinu? Makau dawai, meeme ele amu, ag tiilkad am hipunin uhuqkkunu elele iittanab.

^5-6 Amunu haen Kristus Nug wanppa uɗia, Nug Kayak amegppa aum. “O Kayak, na ootppa keeke anuqak am, danab ah ag ofa iɗu iɗu na mettaglagnu ii daatte. Ao, danab ag nahip qaɗabppa manaknu ofa, ib etta hipunin haknu ofa ele na mettaglagnu amu, na amunu ootppa keeke anuqak ii doottem. Iitta. Na keeke amu ag abenlag aokkunu amu, na da beɗul imu bappaidna meɗame.

⁷ Anam amunu da ami. ‘Dahilnu nahip nai buk itoɗiakppa yaak niitte bia, da uɗimi daattem; O dahil Kayak, nahip dabmaknab awak aɗi daatte amu, da amu hekkulnu ool daatte,’ ” awa aum.

⁸ Aria, tatam Jesus Nug mana mettak ag heppig ele amunu inam aum. “Na manaknu ofa, ib etta hipunin haknu ofa, aria mana mettak laa oh ele, na amu aokkutnu oot ii daye, na mana mettak amunu ele enanag ii doome.” Ɗo atte amubia ag heppig, amge Kristus Nug Kayak amunu enanag ii doyom awa aum.

⁹ Nug laa ele aum. “Kayak da ina daattem. Da nahip dabmaknab awak dim lamidkkulnu uɗimi,” awa aum. Amunu Kayak Nug kobol gehanu amu heeb, ɠagattagnab daakkunu, Nug kobol tatam dayom amu he, iitta meum.

¹⁰ Jesus Kristus Nug Kayaknu dabmaknab awak dim lamitta, haen laippu aakkuib Nug nukka Nug beɗu mana mettak bia Kayak mettom. Amuppa Nug he, ig oppiaawak danab bemut daattem.

¹¹ Aria, mana mettak danab oh ag deɗ deɗppa maɗi ahilagppa hippaidtteb. Ag baubau mana mettak iɗu iɗu amuib hetteb, amge mana mettak anam am hipunin uhuqaknu elele iittanab.

¹² Amge Kristus Nug am haen laippu aakkuib hipunin uhuqaknu mana mettak hanhannu aakku heum. Nug anam hewowa, Nug Kayak eppeg naɗiap-ppa heɗep na dayom.

¹³ Amu Kayak Nug kekeɗ nuhikkud Nug waappa maadkkunu haen amu ameg meum daatte.

¹⁴ Anam amunu, Nug mana mettak laippuib heum amuppa Nug he, danab ag Kayak he ag oppiaawak danab benan daatteb ele, ag elelenab daatteb. Amu hanhan ele anamib daaglag.

¹⁵ Kayak Ouɗi Nug ele Jesus Nug keeke oh ihinig hipunin uhuqa megakkunu ha malom ippunikka, nai aɗit megatte. Laa am inam.

¹⁶ “Naɗi Nug atte. Nug tituana nai qakkak bau, da heppi, ag Israel danab ah, da ag ele haen amuppa hekkunig am inam. Da heppi, dahil ɗo oh ag oolagppa daakku. Ao, da heppi, dahil ɗo oh ahilag dabmakppa daakku.”

¹⁷ Aria nai laa am, “Da ahilag hipunin, ahilag ɗo tippalak ele daul atikku.” Naɗi Nug anam awa atte.

¹⁸ Kayak Nug danab laanu hipunin uhuqa mettom dayeb amu, danab amu nug hipunin amu uhuqkkunu mana mettak baula hekkunu ii dabmema; aakku malak.

Kristen ag Kayak gumidna wana dayeg

¹⁹ Amunu O lailad, ig Jesus tiigppa Kayaknu mettid lag Oo Gunnab Eleppa gokkunignu ib babaittak daatte; ig baɗak iitta nokkunignu elele.

²⁰ Jesus Nug ib bau, ib amuppa ig bauklel aottem ele buua mekkom. Anukka danab ag Oo Gunnab Eleppa gokkulagnu am ib keldoak dayom. Lamen naɗi laa aihak dayom ele amu, nug ib amu keldoum, amge Jesus Nug mauhak nuhigppa lamen naɗi amu pattiɗa, ib babaitta mekke, ig Oo Gunnab Eleppa nokkunignu elele daattem.

²¹ Laa ele amu ig am mana mettak ikki danab onig, ɠagattag ele, Nug Kayaknu danab gumigtte

²² amunu, ig oonigppa hambuppuak laa iitta ele daatta, ig Jesusnu oonigppa genab doot autta aota, Nug he ig ihinkad hipunin uhuqa mekkak daatteb dootta, ig beɗunig le oppiaawakppa babaitta malak oitta, Kayak gumidta gotu!

²³ Amu Kayak Nug keeke hekkunu nai qakka aum amu genab meu bekku amunu, ig Jesusnu ooppa genab doyak ihinigppa keeke ena meu okkunu attem amu, ig dabmak amu ɠagattag aɗat auta aota oitu!

²⁴ Amu ig lainkad dilag, ag danab laa dilagnu oolag mauhkkunu, kobol ena ele hekkulagnu maɗattagnignu, ig amu ele dabmetu!

²⁵ Amu ig laala ag hetteb amubia ig Kristen lainkad ele qagmak laippu haknu kobol ii uumta. Iitta. Ig qagmetata, lainkad oolag ɠagattag aqatu! Ig Kristusnu deɗ miag doum daatte anidttem amunu, ig uɗat amu tuɗidta huana hetu!

²⁶ Amu ig doyak diig genabib aot doyota, ig dootta hipunin baubau hettem dayeb amu, ⌊ig hetata⌋ ihinig hipunin uhuqaknu mana mettak laa ii anidmata.

²⁷ Iitta! Ig Kayaknu hettoɗiak okkai amu aab gakkaɗaknab, Kayaknu kekeɗ oh ewadkku ele, amuib baɗidta ameg mekkunig.

²⁸ Ig doottem, danab laa nug Mosesnu ɗo tippale, aɗi heehe anttomnu mattiak danab aɗit o danab ewam ag anidna, nug eheɗ heum amunu heeg, miag atie, ag nuhignu oo gai-iitta doya oo metta ehanittak kobol ii dim lamidppig. Iitta! Ag nug qeeg mauhom.

²⁹ Aria, anukka danab nug ɗo tippalom amu, ag nug qeppeg mauhkkunu dayom amunu, gemu danab laa nug Kayak Bekka dimedatte ele, nuhignu attemnab? Danab amu nug geha qagaiettak naɗinab anidkkunu elele. Aɗinu? Nug Kristusnu, Nug am keeke hamu doya, Nug tiignu ele, amuppa Kayak Nug nug ele nug tituanya nai qagapiɗ, amuppa Kayak he, danab amu oppiaawak beum, amge danab amu nug tiig amunu keeke oppiaawak iitta doyom. Laa ele amu, nug Kayak Ouɗi, Nug ehanittak okkai hamu mettaknu diig amu, nug nuhigppa ele kobol eheɗnab heum.

³⁰ Aɗinu am anam daakku? Ig Kayak Nug inam aum doottem. “Eheɗ haknu nob tutukku eɗua mettak uɗat am dahil. Da geha aun aɗi ag eheɗ hetteb amu, da nob nau madakkul,” awa aum. Amu Nug nai inam ele aum. “Naɗi Nug nuhikkud danab ah epeɗiadkku,” awa aum.

³¹ Amu danab laa nug hipunin nuhignu, Kayak bauklel ele eppegppa epeɗiak aokkunu gokkunu am keeke hamu iitta. Keeke amuam keeke baɗak, uug naunab ele.

³² Aria, ag haen Kristus aoppig daanna, dimppa uug okkai laala ahilagppa beebe dooppig ele, haen amu amelagppa doaɗ! Haen amu ag uug kuɗum maoeg, laa ag guittak okkai ele madappig, amge ag ɠagattag hippaidna daanna maoppig.

³³ Amu haen laala danab laa ag danab ah dilag qagmakppa danab ah noolagppa ag aon aon aqan, eheɗ ele hedappig. Haen laala ag Kristen ag lailkad uug anam dooglagnu beɗulagppa beum amu, ag lailkad ehanadppig.

³⁴ Amu ag danab maniguittakppa daappig, ag amu dilag oolag doyom. Amu haen laala dimittim danab ag uɗin, ahilkad keeke ena ena aɗadna diippig, amge ag amunu oolag ii nauhom. Iitta. Ag maɗoɗppan gamag ahak doon uueg aoppig. Aɗinu? Ag ahilag keeke ena hanhannu, dimppa aoglagnu appa ana daatte dooppig.

³⁵ Amunu ag ooppa ɠagattag qettak ahilkad amu aib maoppeg ukkom. Aɗinu? Geha ag keeke amunu nob enanag aoglag.

³⁶ Ag Kayaknu dabmaknab tuɗidna dim lamidkkulagnu amu ag oolag maɗoɗ ele ɠagattag hippaidna daaglagnu daatteb. Ag anam hekkulag amu, geha ag keeke ena anukka Nug ag madakkunu nai qakka aum amu, ag aoglag.

³⁷ Amuam Kayak naippa nai laa daatte amubia. Nai am inam. “Haen elab iitta, nakoknab laa ele, laa uɗikkunu daatte amu Nug uɗikku. Nug am nuhig uɗiak haen am ii eɗidma.

³⁸ Genab tutukku hak danab dahilad, ag dahilnu oolagppa genab dootteb amunu, ag bau daaglag. Amu laippu laa nug dimeɗakku amu, nuhignu amu da oolppa ena ii doopa.”

³⁹ Amge ig am danab ag Jesus dimettan padal metteb ele, danab amu oolagppa ii daattem. Iitta! Ig am danab ag nuhignu oolagppa genab doon, bauklel aotteb ele amu, ag oolagppa daatteb.