Hagai 2 - Nobonob Baibel

Kayaknu mettid lag am anttaknu enanag

¹ ⌊Maɗ amuppa,⌋ kalam ebqak eblaih aɗit ele, kalam amunu deɗ 21ppa amu, Yawe Nug nuhig nai propet Hagai mettom. Nai amuam inam.

² “Na Sealtiel bekka Serubabel, nug Juda dilag gawana, amu Jehosadak bekka Josua, nug mana mettak ikki danab, na aa, Juda danab ah oh ag oɗo yaak danab ah daatteb, na ag oh amelagppa anan, inam oɗ mattan a!

³ Kayaknu mettid lag anukka dayom amu, laa lag amunu onig, binag amahlak ele anidna dabmenan daattebte? Anam amu, ag gemunu lagnu attem dabmettebte? Ag gemu hetteb am keeke hamu bia iite anidtteb?

⁴ Amge, O Serubabel, na ɠagattag daye! O Jehosadak bekka Josua, na mana mettak ikki danab daattem, na ɠagattag daye! Ag Israel wanppan danab ah, ag oh ɠagattag daan, uɗat heig! Aɗinu? Da ag ele daattem!” Yawe Nukka Ɠagattag Oh Ele, Nug anam atte.

⁵ Amu Yawe Nukka Ɠagattag Oh Ele Nug inam ele atte. “Ag Isip wan uun ahappig, haen amuppa da amu hekkulnu nug tituana nai qakkak hemi amunu, da aakku hettem. Da ag ele daattem. Ag aib baɗappig,” awa atte.

⁶ Aɗinu ag ii baɗamna? Yawe Nukka Ɠagattag Oh Ele, Nug inam ele atte. “Haen elab iitta, da hab, wan, yu, wan qaɗaiettak ele oh baula heppi uɗalkkulag.

⁷ Da heppi, wanppan wan oh uɗalkkulag. Ag uɗalppeg, appan danab ah ahilag en okkai aon uɗin, da laulppa meppeg, da heppi, dahil binag amahlak oppiaawak ele am lag imu ambekku.” Yawe Nukka Ɠagattag Oh Ele Nug anam awa atte.

⁸ Yawe Nukka Ɠagattag Oh Ele Nug atte. “Silwa oh am dahil, gol oh ele am dahil.

⁹ Gemun lag imunu binag amahlak oppiaawak ele am anukka lag dayomnu binag amahlak oppiaawak ele eɗidkku. Anam daakku amu, da heppi, aben imuppa maɗoɗ daakku.” Yawe Nukka Ɠagattag Oh Ele Nug anam atte.

Tumainu, buttinu nai ele

¹⁰ Amu Darius nug king dayaya, nuhig king dayaknu maɗ aɗitppa, kalam ebqak eblaih waɗele, kalam amunu deɗ 24ppa Yawe Nug nuhig nai propet Hagai mettom. Nai amuam inam.

¹¹ “Yawe Nukka Ɠagattag Oh Ele Nug inam atte. Na mana mettak danab ɗo naippanu, na imunu ag oɗ madappe, ag doon, nob meppeg doye!

¹² Danab nug doɗ teppu maha laa, teppu amuam Kayaknu tituana mettak daatte amu, nug teppu amu lamen piiakppa aɗa oitte dayeb, lamen piiak amu wana, brette, o lewate, o wainte, o goɗente, o ee laate aɗakku dayeb amu, ee lamen piiak aɗom ele, amuam ele Kayaknu tituana mettak daakkute?” Yawe Nug oɗmak amu he, mana mettak danab ag, “Iitta!” appig.

¹³ Ag anam aeg amu Hagai nug tuɗitta, oɗ matta aum. “Amge danab laa nug danab, o doɗ mauhak gaɗa aɗowa, amuppa Kayaknu neekkakppa nug ooppa dubuttid teum daatte amu, nug ee amu aɗakku dayeb, ee amu eɗua, Kayaknu neekkakppa dubuttid tak ele daakkute?” Hagai nug anam oɗ matte, mana mettak danab ag appig. “Ao, keeke amuam Kayaknu neekkakppa dubuttid tak ele daakku,” aon appig.

¹⁴ Ag anam aeg, Hagai nug aum. “Yawe Nug atte. ‘Dahil neekkakppa amu, Israel danab ah, ahilagnu anamnab aakku daatte. Ag aɗi hetteb, ag aɗi doɗ mana mettak hekkulagnu maitteb ele amu, keeke amu oh am da, Kayak, dahil neekkakppa am dubuttid tak ele daatte.

¹⁵ Amu gemu, butti aɗi ele ag imu dabmettan autna aweg! Ag ii digmena, Yawenu mettid lag heppig amu, ag attem attem daappig dabmenan dayeg!

¹⁶ Haen amuppa danab laa ukka, ee aeg mumuɗaknu 40 kilogram aokkunu dabmeum, amge 20 kilogram aakkuib awom. O danab nug grep meu tabappa, 50 lita wain aokkunu dabmeum, amge 20 lita aakkuib awom.

¹⁷ Ag eheɗ heppig amunu, da hei, ahilag uɗat oh nauhom; dattanu ee oɗe digdig aqom, ais doɗo ele hab waappanu ne, keeke he nauhppig, amge ag eɗun, dahilppa ii doppig. Yawe Nug anam awa atte,’ ” awa aum.

¹⁸ Amu Yawe Nug amu awowa, Nug tuɗitta atte. “Gemu am kalam ebqak eblaih waɗele, amu kalam imunu deɗ 24, gemu ag dahil mettid lagnu men ukku aakku hena malappig. Ag malappig amunu, ag dabmak pehettan aweg! Ao, ag gemu, butti aɗi ele pehettan dabmak aweg!

¹⁹ Ag ee aeg, ee tumu keeke, iitta ele. Ag muɗi grep, ad fig, ad pomigranet, olip ad ele eppan, meu ii aoppig, amge da gemu digmein, itittak ena madakkul,” awa atte.

Kayak Nug Serubabel itittak ena medakkunu aum

²⁰ Amu kalam amunu deɗ 24 amuppaib, Yawe Nug nuhig nai Hagai baula mettom. Nai amuam inam.

²¹ “Na Serubabel, nug Juda dilag gawana, na nug amegppa inam appe doyaɗ! Da heppi, hab, wan ele uɗalkku.

²² Da heppi, king laala dilag sia king nena qena, nauhak daaglag. Da heppi, wanppan ɗo maɗoɗ laala dilag ɠagattag am iitta mekku. Da heppi, bannu karis, danab lamidtteb ele ag nena qeppeg, hos, ban danab hos attan oitteb ele ag ele nena qekkulag. Amuam danab amu lailkad eppelagppa bekku.

²³ Amge deɗ amuppa da na, na Serubabel, na Sealtiel bekka na, da na ehanidppi, na ena daakkut. Da heppi, na dahil doyaknu at ringppa daatte bia daan, ena daakkut. Aɗinu? Da na dahil daakkutnu tituanidmi.” Yawe Nukka Ɠagattag Oh Ele Nug anam awa atte.