Hagai 1 - Nobonob Baibel

Yawe laug eɗun hekkulagnu nai

¹ Darius nug Persia dilag king dayaya, nuhig king dayaknu maɗ aɗitppa, kalam ebqak eblaih laippu ele, kalam amunu deɗ digmakppa Yawe Nug nuhig nai propet Hagai mettom. Nai nug mettom amu, nai amuam Juda dilag gawana Serubabel, nug Sealtiel bekka, amu Jehosadak bekka Josua ele dilah. Josua nug am mana mettak ikki danab dayom.

² Nai Nug Hagai mette, nug aa amelahppa aum am inam. “Yawe Nukka Ɠagattag Oh Ele, Nug inam atte. Danab ah imu ag atteb. Gemu am Yawenu mettid lag eɗut hekkunignu haen tutukku iitta, aon atteb,” awa aum.

³ Yawe Nug nai mette, Hagai nai amu doye, Yawe Nug ele he, propet Hagai nug nai laa ele ab, danab ah dooglagnu doyom. Nai amuam inam.

⁴ “Gemu ag lag enappa daatteb. Dahil mettid lag am nauhak daatte. Ag ahilag lag enappa daappeg, dahil mettid lag anam daakkunu am enate?” Yawe Nug he, Hagai nug nai amu doya, danab ah mattom.

⁵ Hagai nug nai amu ag matte, dimppa nug nai imu ele mattom. Yawe Nukka Ɠagattag Oh Ele Nug atte. “Ag ahilag haknu pehettan dabmetteg!

⁶ Ag keeke kuɗum ebatteb, amge ag keeke nakokib eɗun aotteb. Ag ee latteb, amge ag oolag ii aɗatte. Ag le latteb, amge ag oolag ii diditte. Ag beɗulagppa lamen metteb, amge ag oug dootteb. Ag men doɗonu uɗat hetteb, amge ag men doɗo aon, ag bek battam giɗo eleppa inatteb bia hetteb,” awa atte.

⁷ Amu Yawe Nukka Ɠagattag Oh Ele Nug inam atte. “Ag ahilag hak amunu pehettan dabmetteg!

⁸ Da dahil lagnu ena dookkulnu, danab ah ag da binal mekkulagnu amu, ag ahan, qaukoppa tena, ad appanu aon uɗin, dahil mettid lag heig!” awa atte.

⁹ Amu Yawe Nukka Ɠagattag Oh Ele Nug anam anan, Nug imu ele atte. “Ag keeke kuɗum aoglagnu dabmeppig, amge ag keeke nakokib aoppig. Ag keeke aoppig ele amu, da hei, iitta meum. Aɗinu? Ag anen anen oh ag laulkadppa ahilag uɗat hetteb, amge da laul am nauhakib daatte,” awa atte.

¹⁰ Yawe Nukka Ɠagattag Oh Ele Nug anam anan, Nug nai tuɗitta atte. “Ag amu hetteb, diig amunu gu ii ne, dattanu ee meu ii otte.

¹¹ Da hei, gu ii ne, appa dadppa, qaukoppa, ee aeg dadppa, grep dadppa, olip dadppa, keeke laa oh eppakppa, danab qaɗelagppa, makau qaɗelagppa, ag aɗi aɗi hetteb ele, amu ohppa, appa gu ii ne, keeke ena ii daatte,” awa atte.

¹² Yawe Nug anam aum amunu, Sealtiel Bekka Serubabel, Jehosadak bekka Josua, nug mana mettak ikki danab, aa, amu Juda danab ah oh ag oɗo yaak danab ah daatteb amu, ag oh, ag Yawe, ahilag Kayak, ag Nug aum, propet Hagai oɗeppa aoppig am dim lamidppig. Yawe, ahilag Kayak, Nug he, Hagai nug nai mattiom amunu, ag doon, ag heppig. Danab ah ag Yawenu ebehilag oh bodoetta le meum.

¹³ Danab ah ag amu digmen heegeg, Yawenu nai awa ukkak danab Hagai, nug Yawenu nai imu danab ah mattom. “Yawe Nug inam atte. ‘Da ag ele daattem,’ awa atte,” awa aum.

¹⁴ Anam amunu, Yawe Nug he, Sealtiel bekka Serubabel, nug Juda dilag gawana, Jehosadak bekka Josua, nug mana mettak ikki danab, aa, Juda danab ah oh ag oɗo yaak danab ah daatteb, ag ele, ag oh yagbak doon, ag lag amu hekkulagnu ahappig. Ag ahan uɗin, Yawe Nukka Ɠagattag Oh Ele, ahilag Kayak, ag Nug laug eɗun bappaidna heppig.

¹⁵ King Darius nug king dayaya, nuhig king dayaknu maɗ aɗitppa, kalam ebqak eblaih laippu ele, kalam amunu deɗ 24ppa ag digmeppig.