Habakuk 3 - Nobonob Baibel

Habakuknu unuqittak

¹ Nai imuam propet danab Habakuknu unuqittak; ahiettaknu.

² O Yawe, da na onin, binan okkai elenu nai doomi. Ao, O Yawe, nahip haknu amu, da dabmein, da ebehil oh bodoetta le mette. Da na nahip hak okkai baula gemu hekkutnu oɗ medattem. Ao, na ihinig haenppa nahip ɠagattag hak baula ippunigkkutnu oɗ medattem. O Yawe, na ihinignu oppoɗin beum daatte, amge na oppoɗin anam dayeye, na oo gai-iitta doya oo metta ehanittak kobol ele dabmekkutnu oɗ medattem.

³ Kayak, Nug Temannu uɗiom. Ao, Kayak Oppiaawak Ele, Nug qauko Parannu uɗiom. Sila. Nug uɗie, Nug nuhig binag amahlak oppiaawak ele am hab ohppa miag dayom. Ao, wanppan danab ah oh ag Nug onig humappig.

⁴ Ɠagattag okkai, naɗi ele nuhig am aam be, amahlak ahatte bia dayom. Ao, amahlak am Nug eppegppanu ye ukkom. Ge, nuhig ɠagattag am Nug eppegppa, appa lokkumak dayom.

⁵ Oɗe nau danab kuɗum aqe mauhtteb ele ⌊danab nau hetteb ele aqaknu⌋ Nug noobppa ukke; oɗe digdig Nug dim lamidna uɗippig.

⁶ Yawe Nug hibaitta daya, Nug he, wan uɗalom; Nug neekke, wanppan wan ohnu danab ah ag hahaɗppig. Nug he, qauko haen elab daappig, ag nena qeppig. Ao, qauko nakok, haen elab daappig amu, ag hiɗan nona daappig. Yawenu hak am hanhannu.

⁷ Da neekki ukke, Kusan danab ag uug nau doon daappig anidmi. Ao, Midian danab ag guittak okkainab ele daaegeg anadmi.

⁸ O Yawe, na lenu oot nauhomte? Ao, na lenagnu oppoɗin beumte? Na yunu oppoɗin huan beumte amunu, na ban danab, bannu karis, hos eeɗtteb eleppa ban hette bia hena, kekeɗ ihinkad eɗadme?

⁹ Na ihinkad kekeɗ aqadkkutnu amu, na nahip lat aon, na lat doɗo kuɗumnu na oɗenppa eme. Sila. Na he, le kuɗum wan oppatppig.

¹⁰ Ao, na wanppa nee, qauko ag uɗalppig. Le ui eheɗ oum. Yo, yu huana koɗkoɗ qe, oqotti okkai oum.

¹¹ Na nahip lat doɗo e ukkaegeg, amemɗi awom. Ao, na nahip ban ele eewo, amemɗi awom. Anam amu, aam, kalam ele hab waappa toettaya daapiɗ.

¹² Na oppoɗin huan be, na wan qaɗeppa oime. Ao, na oot nauhe, na wanppan wan ohnu danab ah bu mattame; danab nug ee aeg mumuɗtte, amubia na heme.

¹³ Na amu hemenu diig am, na nahipad danab ah ehanadppe, qagaiettak ii daamnanu heme. Ao, na laa na nug okkai daakkunu goɗen gokkaɗakppa tituanme amu, na nug padal memanu ehanidme. Na danab ag wan laa, appan danab ah ag nau hak danab ah ele amu, na amu dilag okkai maduduɗme. Ao, na nuhig lamen ikki ukka baegppa batak amu, na amu oh uɗadme. Sila.

¹⁴ Danab amu, nuhikkud daup ag ahan, huan uɗin, ig danab ɠagattag iitta ele, ig daɗek danab lokkumta daamut, ag ig lamigppeg, ig oolta, tamtam daagnignu, ag ig iqappeg mauhkkunignu dabmena, gamag ahak doon, danab ee lab iitta mekkunu hette bia ihinigppa hekkulagnu daappig amu, haen amuppa na daup amu dilag okkai, na danab amunu ban gudkkud aɗan, nuhig ban gudkkud igippa yaae noum.

¹⁵ Ge, ban danab ag bannu hosppa leppa oiyegeg, le huan uɗala gotte, na amubia he, le laih laih ukka dayom.

¹⁶ ⌊Uug ihinigppa bekku amu,⌋ da amunu daulppa doye, gamalppa uttu taub huan qutu qutu ettom. Ao, da oqotti amu doye, da eheɗ baɗen, da ottil hahaɗom. Da ebehil bodoettom. Da bael laih laih oh hahaɗpiɗ. Anam, amge na danab amu, nuhikkud daup ele eheɗ hadappe, ag nena qekkulag amunu, da deɗ amu ameg mekkul. Da tappaɗak heinne, ameg ii mepa. Iitta. Da na nahip haenppa heppe bekkunu ameg mekkul.

¹⁷ Uug naunab inam ana bekkutai. Ad fig nug haɗag iitai doma. Muɗi grep meu iitai okku. Olip ad amu, amuppa meu iitai daakku. Ee dattanu ele meu iitai oma. Sipsip laa aɗppa iitai daama, Makau ele aɗppa iitai daama.

¹⁸ ⌊Uug nau amu oh anam bena daaglagtai,⌋ amge da Yawenu gamag ahak dookkul. Ao, da Kayak, Nug da ehaniɗe, da padal ii mettem amu, da nuhignu ool gamag ahakku.

¹⁹ Naɗi Yawe Nug da ɠagattag meɗatte. Ao, Nug ehaniɗe, da dia qaietta gotte bia oittem. Nug he, da qaukoppa elele oikkulnu elele daattem. Unuqittak imuam danab nug danab ah noolagppa daya, ahi edatte ehanidkkunu. Laa ag musik haknu keeke muɗi ele qeegeg, danab ah ag ahi ettaglagnu daatte.