Habakuk 2 - Nobonob Baibel

¹ ⌊“Oɗmak dahil anam daatte amunu,⌋ Da aɗi uɗitte anittak aben dahilppa daakkul. Ao, wan buue te aɗ itak attan tein daakkul. Da anam dayeye, da Yawe Nug nob attem laa da meɗakku am dookkul. Ao, Nug nai uug ele dahilnu nob aɗi meɗakku amu, da dookkul,” awe ami.

Yawe Nug Habakuknu nai nob meum

² Da anam ai, Yawe Nug da oɗelppa awa, da amelppa inam aum. “Da keeke laa ippunidppi, na miagib ye! Ao, laa nug amu awa ukka, laa amelagppa ebqeeb dooglagnu na miag atiak ye!

³ Aɗinu? Keeke da ippunidkkul amu, keeke amu nuhig haenppa bekku. Am uug gemu daattenu gog tak haenppan keeke. Am genab bekku; am hambuppuak laa iitta. Keeke amuam pahanab iitai bekku, amge na bahin aib yom. Iitta. Na ameg mena daye! Aɗinu? Keeke da na ippunidkkul am genabnab bekkun daatte, am nuhig bak haen am ii eɗidma.

⁴ Laa nug Kayak noobppa genab tutukku hak danab daatte, nug Yawenu ooppa genab dootte amunu, nug bau daakku. Ao, am anam, amge antte! Laa daatte, nug dada danab daatte. Ge, nuhig oo hak am kaliak ele.

⁵ Anam amu, wain am danab amu he, na qette. Ao, beɗuppa tak danab amu nug toetta ii daatte. Mauhak aben am, ‘Elele! Danab mauhppig baula imuppa aib uɗippig,’ attete? Iitta! Ge, mauhak am, ‘Da hei, danab ah elele mauhppig,’ attete? Iitta! Anam amunu, amubia danab amu ⌊am Babilon dilag okkai amu⌋, nug wanppan wan ohnu danab ah nug waappa daaglagnu diiakib diiadtte. Ao, nug atu ohppan danab ah diiatte, nug eppegppa daatteb.

⁶ Nug anam haaha daatte, amge da, Yawe, da heppi, wan atu ohppan danab ah ag nuhignu, ‘Keeke hamunab,’ iite doon, nug aon aon qettaglag? Ag nug aon aon qettan, inam akkulag. ‘Laa nug wagai ma, danab ah dilag keeke yab awa, qagmette ele, nuhignu am gadonnab gadon. Ao, laa nug keeke lokkumakppa awaknu duttuna hak kobol dim lamitta, en kuɗum aotte amu, nuhignu am gadonnab gadon. Nug amu tuɗitta ii hema,’ aon akkulag.

⁷ Da Yawe, da Babilon dilag okkai amegppa attem. Laa na ahilkad keeke yab aome ele amu, ag qinob iite ahamna? Ag ahan heppeg, na iite ottaimana? Ag ahan heppeg, na ag eppelagppa daakkut.

⁸ Ag amu hekkulagnu diig am, na ban hena, wanppan wan kuɗumnu danab ah dilag keeke aome amunu, wan amuppanu danab ah laa ii mauhppig amu, ag ban hena, nahip keeke eɗun aoglag. Na danab ah kuɗumnab aqe mauhatteg, na hee, ahilag wan, aab keeke ele nauhak daappig amunu, ⌊ag nahip-ppa anam hekkulag⌋.

⁹ Ai laa nuhigppa eheɗ laa ii bemanu nug teɗ nuhig bai nau igippa, o ad elabnab gogotippa, kekeɗ laa aɗakkun elele iittappa teɗ mette, amubia na hekkutnu ib eheɗppa hena, en okkai aome amunu, nahipnu am gadonnab gadon.

¹⁰ Na danab ah kuɗumnab hadappe nauhkkulagnu maittak aome. Ao, na amu hena, na tiinad laippu uɗa nak mattan, na nakka hena, na mauhkkut.

¹¹ Aɗinu? Na lautppan gilil am danab daalob amu, ag ahan, na mauhkkutnu elob. Ao, hol danab daalob, ag ahan, na mauhkkutnu elob.” Da Yawe, da nahipnu anam attem.

¹² Am genab, danab nug danab ah aqaaqa, ahilkad keeke awa, aab okkai laa kalatte amu, nuhignu am gadonnab gadon. Ao, laa nug kobol eheɗppa aab laa kalatte amu, nuhignu gadonnab gadon.

¹³ Yawe Nukka Ɠagattag Oh Ele Nug dabmak awe ɠagattag eppe, inam dabmette. “Wanppan danab ah dilag uɗat okkai am hamu iite iitta mema. Ao, wanppan wannu danab uɗat naɗi okkai hetteb, amge uɗat amu ohnu meu am hamu iite iitta mema?”

¹⁴ Aɗinu? Le yuppa ambak daatte, amubia wan atu ohppan danab ah ag Yawenu binag amahlak oppiaawak ele anidna dooglag.

¹⁵ Danab nug nuhikkud mudippan laippu ag beɗulag miag daappeg anidkkunu le ɠagattag huan gokkaɗe no, matte laegeg, kaaka aqe, lamen uɗatteb amu, nuhignu gadonnab gadon.

¹⁶ Amge ⌊Babilon dilag okkai⌋ na, nahip-ppa anam bekku. Danab ah ag nahipnu nau dooglag. Ag binag ii memana. Iitta! Na uɗa nak dookkut. Gemu am nahip haen! Na le ɠagattag lappe, kaaka nitteb, lamen uɗona, na uɗan naɗ! Wain amu kap Yawe eppeg naɗiap-ppa daatte, am nahip-ppa aakku uɗitte, amu na amu lawona, na uɗa nak nau guittak ele doon, binan nakok laa ii daama.

¹⁷ Lebanon appa na laa guittak nau mauhnoak mettak kobol heme, amu diig amunu na nauhkkut. Ao, appa na doɗ ge iitta hamu hamu aqadme, amu diig amunu na baɗak eheɗ nau dookkut. Aɗinu? Na danab aqatte, ag tiilag ne, na wan, aab ele hatte nauheg, danab ah appa daappig ele padal meppig.

Kayak hambuppuak noobppa dup noa binag maknu am kaaka kobol

¹⁸ Kayak hambuppuak dottog danab nug eppegppa hoitte amu, dottog amuam danab ah attem ehanadkku? Ao, kayak hambuppuak dottog silwappa, o golppa hak, danab ah doyak hambuppuak ippunadtte amu, keeke amuam danab ah attem ehanadkku? Aɗinu? Auntai nug bappaidtte ele amu, nug keeke nugib eppegppa heumnu ooppa genab dootte. Nug hette am keeke nai madikkunu elele iitta.

¹⁹ Danab laa nug keeke adppa hoiyak, “Ahan, bau daye!” atte amu, danab amu, nuhignu am gadonnab gadon. Ao, danab nug men laa, men oh am keeke bau iitta, amge nug men laa amegppa, “Niiak uun ahe!” atte amu, nuhignu gadonnab gadon. Ad o men amuam danab amu ulum mettaglagnu elelete? Iitta! Am ad o men, beɗu aakkuib gol o silwa laidppig. Am keeke bau mak ele iitta; am ulah ii eeɗtte.

²⁰ Kayak hambuppuak ag anam daatteb, amge Yawe Nug nuhig mettid lag nuhignu tituanak daatte, Nug appa daatte. Wan atu ohppan danab ah ag Nug noobppa toettan dayeg!