Habakuk 1 - Nobonob Baibel

¹ Nai imuam propet Habakuknu nai meunab ele. Nug tuleglegppa Yawe oɗeppanu awom.

Habakuk nug Yawe amegppa uug laanu mattiom

² Habakuk nug Kayak amegppa inam unuqittom. “O Yawe, da na ehanigkkutnu haen elab unuqittette daami, gemu ele hettem, amge na da oɗelppa ii aottem; amu haen gane laa ele ukkeb, na da oɗelppa aokkut? Da na amenppa, ‘Laa ag laa dilagppa guittak nau mauhnoak mettak kobol dim lamidna, eheɗ heigtteb,’ attem, amge na ii ehanigttem; amu haen gane laa ele ukkeb, na ig ehanigkkut?

³ O Yawe, laa ag nai doya mala hettoɗia epeɗia elele mettak kobol ii dim lamidna, laa eheɗ hattegeg, na ag amu ii hemananu ib oo ii nettem amunu, ag heegeg, da ag anadttem. Da amu antten, diig aɗinu na hee, ag amu ii hemananu ib oo ii nettem amu, da ool ii maidtte. Laa ag laa dilag keeke heeg nauhtte anidttem. Laa ag laa dilagppa guittak nau mauhnoak mettak kobol dim lamidna hetteb anidttem. Nug aittak, nug qak ele huanak daatteb anidttem.

⁴ Laa ⌊ag ɠagattag ele⌋ ag amu hetteb amunu, ɗo ahilagnu aɗi haknu atte amu, laa nug amu ii hette. Nai doya mala hettoɗia epeɗia elele mettak kobol na qeum daye, laa amuppa ehanittak laa ii aotte. Diig amunu nau hak danab ag genab tutukku hak danab eheɗ hattana, babaittaknu ib heeg, keldoak daatte amunu, genab tutukku hak danab ag qakkak daan, keeke laa hekkulagnu elele iitta bia daatteb. Ao, nau hak danab ag anam hetteb amunu, nai doya mala hettoɗia epeɗia elele mettak kobol ii daye, kobol kaliak ele daatte.” Da na amenppa anam awe attem.

Yawe Nug Habakuk oɗeppa awa, nai nob meum

⁵ ⌊Nai amunu amu, Yawe Nug eɗua, nob ma, inam aum.⌋ “Na wanppan wan oolagppa neegna anidna, dabmak huanaknab awe! Aɗinu? Nahip haenppa da keeke laa, danab laa nug na amenppa anam bia ab doolom amu, na ootppa genab ii doolom, amge da hekkul.

⁶ Na ootppa genab ii doomnanu diig am, antte! Da heppi, Babilon danab ag ahan, ⌊ag Juda, ag bu mattaglag⌋. Babilon daup ag am ban danab, ag oo doyak ii doon nau hetteb. Ag aɗi hekkulagnu ahilag dabmakppa bette, ag ahan hetteb. Ag wan atu ohppa paha wana, eɗadna, ahilkad lag, wan keeke, ag aon, ahilag daakkunu aɗatteb.

⁷ Danab ah laa oh ag Babilon dilag eheɗ baɗatteb. Babilon ag laa dilag ɗonu ii dabmetteb. Iitta. Aɗi ɗo ag meppig amu, ag amuib dabmetteb. Ag akka, ag binalag okkai ele daaglagnu henan oitteb.

⁸ Ag ban hekkulagnu oiyegeg, ahilkad hos am paha paha, doɗ onig lepad paha oitte, ag amu eɗittak, paha paha oitteb. Ao, ban danab ahilkad ag wulp tueb me, doɗ laa aqaglagnu huana henan oitteb, ag danab dilagppa kobol amu eɗittak, huanaknab henan oitteb. Babilon ban danab hos attan daan, ban hetteb ele, ag hos attan paha paha, qaiettan banppa gotteb. Ao ag umanunab uɗitteb. Ag kaub doɗ beɗak laa teppu lakkunu na uɗitte, ag amubia hetteb.

⁹ Ag ohnab ag laa guittak nau mauhnoak mettak kobol aakkuib dabmenan uɗitteb. Ahilag ebqak am huanaknab. Ag ulah atu taɗakppanu uɗitte bia uɗitteb. Ag danab ah huanaknab, ihi yu ihippa niitte bia daaegeg, diin maniguadtteb.

¹⁰ Ag laa dilag king aon aon aqadtteb. Ao, ag wan laihnu danab okkai dilagnu, ‘Keeke hamunab,’ dootteb. Ag aab ɠagattag aɗ ele, ag aab amu ohnu imak dootteb. Ag wan buun aon uɗin, gokkaɗeg noa taata, aɗ elele te wana, aab amu dilag daup eɗadna, aab amu aotteb.

¹¹ Ag anam eɗadna aab aon, ag ulah gotte bia laippun ahan, laih gotteb. Ag danab nau, beɗulagppa aab ele. Ag ɠagattag ahilagnu, ‘Ihinig kayak,’ doon, ag ahilag ɠagattag binag metteb.” Yawe Nug anam aum.

Habakuk baula Yawe amegppa uugnu mattiom

¹² ⌊Yawe Nug anam aum amu, Habakuk nug inam unuqittom.⌋ “O Yawe, na haen ohnab aakku daye uɗie, gemu ele daattem. O Kayak, na am dahil Kayak Oppiaawak Ele; ig ii mauhmata. O Yawe, na Babilon dilag daup ag uɗin, hipunin haknu nob mekkaglagnu tituanadme. Ao, O Yawe, na am kekeɗ nikkamnanu ehanittak ihinig daattem, amu na Babilon ag bu mekkaglagnu otiadme.

¹³ Amge, O Yawe, na laa nug eheɗ hette ele anidna, ‘Am nai iitta,’ o, ‘Elele hette,’ na keeke amubia iinab dabmettem. Ao, na kobol nau ohnu uun autna autnanab aottem. Anam amunu, diig aɗinu na danab ag kobol naunab laa hekkulagnu henana, ag laa amelagppa nai ena mattinna, ag dimppa kobol nau hekkulagnu dabmetteb ele amu, diig aɗinu na ag paha bu ii madattem? Ge, nau hak danab ah ag genab tutukku hak danab eheɗ hattana, ahilkad keeke aon oitteb, amu diig aɗinu na nau hak danab ag amu hemananu ahilag ib hee, keldoak ii daatte amu, da ool ii maidtte.

¹⁴ Na danab ah uuatte, ag yuppan kakai bia daatteb. Ao, ag am yuppan doɗ iɗu iɗu, gumak ahilag laa iitta bia daatteb.

¹⁵ Ag amubia daan oiyegeg, Babilon dilag okkai nug ag diiadtte. Nug kakai awak danab nug huk ewa, kakai eeɗtte, o nug uhui ewa, kakai diitte, o nug uhui diig laappa kakai eeɗadtte amu, Babilon dilag okkai nug anambia danab ah diiadtte. Kakai eeɗak danab nug kakai eeɗa, gamag ahak okkai dootte, amubia Babilon dilag okkai nug danab ah diiatta, gamag ahak okkai dootte.

¹⁶ Kakai eeɗak danab nug uhuippa kakai aotte amunu, nug en okkai ele daatte. Ao, nug ee ena enaib amuppa awa latte. Nug uhuippa anam awa lanana dootte amunu, nug uhuinu, ‘Dahil kayak,’ anan, uhui noobppa doɗ laa mana medatte. Ao, nug uhui diig laa ele nuhignu anam dootte amunu, nug kalu danab ile muttuɗig enanag bette ele awa, uhui noobppa amu ilatte.

¹⁷ O Yawe, Babilon dilag okkai nug kakai eeɗak danab nug hanhan uhui nuhig ewawa, haen oh kakai aotte bia danab ah tuɗid ele diiadkkute? Ao, nug oo gai-iitta doya oo matta ehanittak kobol tuɗidib ii dabmaama, tuɗitta, wan laala eɗatta heeb nauhkkulagte?” awa unuqittom.