Genesis 6 - Nobonob Baibel

Danab Kayak noobppa eheɗ oidppig

¹ Haen danab ag kuɗum appatnana amu, ag nid ah menuatteg,

² Kayak bekkod ag danab amu aɗelkad, ag iɗulag tuqak ele anadna, ag ahilag dabmakppa diippig.

³ Amu Yawe Nug aum. “Dahil Ouɗi Nug hanhan danab oolagppa ii daama. Aɗinu? Ag am danab; ag mauhtteb. Ahilag dayak am maɗ 120 batak daakku,” awa aum.

⁴ Haen amuppa, dimppa ele, danab beɗulkad okkai okkai ele, Nepil buɗub atteb, ag wanppa daappig. Aɗinu? Kayak bekkod ag wanppan ah diieg, ag ele oiyegeg, ah ag nid danab menuadppig ele, danab amu ag nai alagppanu danab onilkad okkai okkai ele.

⁵ Amu Noanu haenppa Yawe nug danab dilag kobol, amu dabmak ele nauib daye anttom.

⁶ Nug amu antta, danab wanppa daaglagnu hattomnu kahipa aoɗom bia doya, ahilag haknu ooppa guittak doyom.

⁷ Yawe Nug anam antta doya amu, Nug aum. “Da danab hemi amu, ag, aria doɗ, doɗ laa ag oolag wan qeeqe oitteb, amu ai hab waappa hagagaɗna oitteb ele amu, da heppi, ag oh iitta mekkulag. Aɗinu? Da ag hattaminu kahipal aoɗom bia doottem,” awa aum.

⁸ Amge Noa nug Yawe noobppa ena dayom.

⁹ Noa, nuhig hak amu inam. Noa nug wanppa dayom, haen amuppa nug danab ah oolagppa nug genab tutukku hak danab dayaya, Kayaknu neekkakppa danab ooppa kaliak laa iitta ele oiyeye, Kayak ele oittapiɗ.

¹⁰ Amu Noa nug nid danab ewam ele; ag am Sem, Ham, Japet ele.

¹¹ Noa nug anam dayeye, wanppan danab ah laa oh amu, ag Kayaknu neekkakppa kobol nau uɗig wak ele heegeg, laa guittak nau mauhnoak mettak kobol am ele wanppa ambak dayom.

¹² Danab ah ag kobol nau uɗig wak ele henan daappig amunu, Kayak Nug neekkakka, Nug danab oh ag akka ahilag dabmak dim lamidnana, kobol nau uɗig wak eleib heegeg anttom.

¹³ Antta amu, Kayak Nug Noa amegppa aum. “Danab ah ag heegeg, laa guittak nau mauhnoak mettak kobol am wanppa ambeum daatte amunu, da heppi, danab oh ag iitta mekkulag. Genab da heppi, danab oh, wan ele padal mekkulag.

¹⁴ Da anam hekkul amunu, na ad saiprus aona, ad amuppa na uub nahip itakkut. Uub ooppa dayak aben aben hattona, ooppa, dimittim ele na kol tar laitte!

¹⁵ Aria, uub amunu amu, na inam ite! Elab nuhig amu 140 mita. Emaitak nuhig amu 23 mita. Attan tak nuhig amu 13.5 mita maha ele.

¹⁶ Na uub lag haug biappa tone, amge uubnu gilil amu haug ii yaama. Mita laippunu maha am hamu dayaɗ. Uubnu gililppa amu, na od mena, ooppa lag oo okkai ewam, laa attan, laa gamagppa, amu laa honap ele he!

¹⁷ Da keeke bau wan qaɗeppa oitteb ele amu mauhkkulagnu heppi, le hiɗ naɗi bekku. Beeb amu, keeke amu oh mauhkkulag.

¹⁸ Amge da heppi, na ele nug tituanɗa nai qakkagnih ⌊amunu, diig amunu⌋, na, ah nahip, amu na begapad, ag waalkad ele amu, ag uub ooppa nokkulag.

¹⁹ Na keeke oh bau daatteb ele amu, na amunu aɗit aɗit, anig, dawai ele diiadna, uub ooppa na ele bau daaglagnu maadkkut.

²⁰ Ai, doɗ, doɗ laa ag oolag wan qeeqe oitteb ele amu, amu oh aɗit aɗit nahip-ppa uɗiglag, amu na diiadna, bau daaglagnu uub ooppa maatte!

²¹ Doɗ dilag ee, nahip ee ele oh aon me!” awa aum.

²² Kayak Nug anam a amu, Noa nug keeke oh, Kayak hekkununab aum bia amu, nug anam heum.