Genesis 50 - Nobonob Baibel

Jakop mauhomnu oo doyak nai

¹ Jakop nug anam mauhe amu, Josep nug oo doyak doya, gomela, mameg gaɗa aɗaɗa gayaya ootuqittom.

^2-3 Anam ha mala amu, Josep nug Isipnu gaɗa babaittak danab ag nug waappa daappig, nug ag onilagppa e uɗieg, ag nug mameg Israel gaɗa aon, marasin meppeg, ii beɗamanu aum. Nug a, ag amu attem hekkulagnu deɗ 40 daanna hekkulag amunu, ag ahilag kobolppa deɗ 40 elele heppig. Amu Isip danab ag deɗ 70 Jakopnu oo doyak doonna daappig.

⁴ Aria, oo doyak haen iitta me amu, Josep nug Paronu ehanittak anuqak danab amelagppa aum. “Ag oolag dahilnu ena daatte dayeb amu, ag dahilnu inam hekkulagnu ool daatte. Ag gona, Paro amegppa inam appeg dookku. ‘Josep nug inam atte.

⁵ “Da mamel nug mauhak haen nuhigppa da amelppa inam aum. ‘Da mauhkkul hettem amunu, na da Kanan wanppa, boumak aben da bappaidmi ele, na appa boumiɗkkutnu nahip nai ɠagattag qena, appe doyei!’ awa aum. Nug anam aum amunu, da dahil nai ɠagattag qein, da anam mattimi amunu, da anam hekkulnu ool daatte. Na appe, da ukke, Kanan wanppa da mamel boumoya, da eɗuen uɗikkul.” Josep nug anam awa atte,’ aon aeg!” Josep nug ag Paro amegppa anam akkulagnu ag amelagppa anam awa aum.

⁶ Josep nug anam a, ag gona, Paro amegppa anam aeg amu, Paro nug Josep amegppa aum. “Na mam he, na nahip nai ɠagattag qena ame amu, na ame, amubia na gona, appa na mamen boume!” awa aum.

⁷ Paro anam aum amunu, Josep nug mameg boumkkunu Kanan appa ukkom. Ugekke amu, Paronu ehanittak anuqak danab oh, amu Isip danab okkai laa oh ele goppig.

⁸ Josep nug awakkud amag ele, ag laulkadppan oh, amu Jakop laugppanu danab, ag ele oh goppig. Ahilkad nid naunau, amu doɗ ele aakkuib ii goppig; ag Gosen appa daappig.

⁹ Josep nug mameg gaɗa awa ugekke, Isip dilag daup ag bannu karis attan daan, ban hetteb, daup ag hos attan daan, ban hetteb ele, ag nug ele oh goppig. Danab huanak ag goppig.

¹⁰ Ag gona, Atatnu ee aeg mumuɗaknu abenppa teppig. Aben amu le Jodan guguittak dayom. Haen ag appa tena amu, ag mahittak guittak ele heppig. Amu Josep nug mamegnu deɗ eblaih aɗit ele oo doyak doyaya, appa dayom.

¹¹ Ag Atatnu ee aeg mumuɗaknu aben appa huan mahiegeg, Kanan danab ag anadna amu, ag appig. “Isip danab ag oo doyakppa mahitteb,” amunu ag aben amu onig Abel Misraim ataɗppig. Abel Misraim am le Jodan guguittak dayom.

Josep aɗi ag Jakop boumppig

¹² Ag anam hena gona amu, Jakop bekkod ag Jakop hekkulagnunab aum amu, ag amubia heppig.

¹³ Ag nug gaɗa maon Kanan wanppa gona, ag appa wan onig Makpela, Mamre guguittak, men oɗeppa boumppig. Abraham nug men oɗe amu, wan dayomppa ele Hit danab onig Epron, nuhigppanu boumak aben daakkunu awom.

¹⁴ Aria, Josep nug mameg boumowa, nug eɗua Isip ukkom; nug, nug awakkud amag ele, amu danab laa oh goppig ele, ag oh eɗun, Isip goppig.

Josep nug awakkud ag ii baɗamnanu aum

¹⁵ Jakop mauhe, bekkod Kanan wanppa boumona, ag eɗun Isip gona, dimppa haen Josep awakkud ag mamelag mauhom dabmena amu, ag akka akka nai inam madippig. “Josep nug ig keeke oh nuhigppa hemut, amunu ooppa aikkak dayeb amu, nug nob megakkutai,” aon appig.

¹⁶ Ag anam awona amu, ag nai imu Josep dookkunu meeg ukkom. “Na mamen ii mauhom, haen amuppa nug nahipnu nai inam amenigppa aum.

¹⁷ ‘Da mauhppi amu, ag Josep amegppa inam appeg dookku. “Da na mamen Jakop, da na awanad, ag nahip-ppa eheɗ heppig amu, na amu dilag hipunin uhuqna madakkutnu oɗ medattem,” awa aum.’ Nug anam aum amunu, na ig, na mamennu Kayaknu maɗi nid, na ihinig hipunin uhuqna megakkutnu oɗ medattem,” aon appig. Ag anam aeg amu, Josep doya, nug gayom.

¹⁸ Aria, ag anam hena, dimppa ag Josep gumidna gona, nug noobppa ag laippun gatelag qaun ona, gomelna, iɗulag wanppa mena, ag appig. “Ig begbeg maɗi nid nahip daattem,” aon appig.

¹⁹ Ag anam aeg amu, Josep nug aum. “Da Kayak iitta amunu, ag aib baɗappig.

²⁰ Anukka ag da eheɗ aokkulnu heppig, amge Kayak Nug ig ena, bau daagnig, gemu ig daattem, amubia, Nug amu dabma he, eheɗ hak amu eɗue, amuppa keeke ena beum.

²¹ Anam amunu, ag aib baɗappig. Da ag, ahilkad nid naunau ele ena daaglagnu ehanadkkul,” awa aum. Nug anam ana, nug eheɗ hadakkunu ii dabmeumnu nai mattiaya, nai bodoettak ele ag amelagppa mattiom.

Josep mauhom

²² Aria, Josep, nug mameg baekkudppa ele Isip wanppa daanna, nug maɗ 110 awom.

²³ Nug Epraim dokkiab anttom. Amu Manase bekka onig Makir, nug bekkod menuatte, Josep nug diie, nug baekkudppa ele daappig.

²⁴ Aria, dimppa Josep nug awakkud amag ele amelagppa aum. “Da mauhkkul hettem, amge Kayak Nug ehanatteb, ag eɗun, Kanan wanppa gokkulag. Kayak Nug Abraham, Aisak amu Jakop ele wan amu madakkunu nuhig nai ɠagattag qa, ag amelagppa mattiom,” awa aum.

²⁵ Josep nug anam awowa amu, nug tuɗitta, Israel bekkod laa, amuam nug awakkud amag ele amu, nug ag amelagppa aum. “Kayak Nug ag ehanatteb, ag wan imu uun gokkulag amunu, dimppa ag gokkulagnu haen amu, ag gonana, ag da gaɗal ele maon gona, Kanan wanppa boumkkulagnab daatte,” awa aum. Nug anam ana, nug ag amu hekkulagnu ahilag nai ɠagattag qena amegppa akkulagnunab he appig.

²⁶ Nug anam ana amu, nug maɗ 110 dayaya, nug mauhom. Mauhe, Isip gaɗa babaittak danab ag marasin gaɗappa mena, bokisppa inaeg, Isip wanppa dayom.