Genesis 41 - Nobonob Baibel

Paro tul niiak aɗit anatom

¹ Grep titia mettak danab nug daug atie ukke, maɗ aɗit dimppa amu, Paro nug tul niiom. Tulppa nug le Nil daugppa dayeye,

² makau eblaih aɗit ele leppanu bena, le daugppan gikkiɗah laegeg anattom. Makau amuam ena, teppulag ele.

³ Anatte amu, nug makau eblaih aɗit ele laa, ag beɗulag ena iitta, ebehilkad tak nau, ag ele le Nilppanu bena, laa tatam beppig heqolagppa daappig.

⁴ Makau beɗulag ena iitta, ebehilkad tak nau amu ag bena, ag makau beɗulag ena, teppulag ele aqan lappig. Paro anam tulppa antta, nug ahom.

⁵ Aria, nug eɗua niiaya, tul baula niiom. Tul amuppa nug ee aeg laa ⌊wit, bali keeke⌋ nug gumu laippu ikki eblaih aɗit ele anttom. Ikki oh am ena, aelkad ambak.

⁶ Antte amu, ikki eblaih aɗit ele laa ele beppig, amge ikki amuam aelkad kuɗum iitta, ulah kaɗag gakkaɗak ele aqeeqe, aelkad teppu ele iitta daappig.

⁷ Aria, ee aeg ikki aelkad kuɗum iitta ag ee aeg ikki ena, aelkad ambak laatteg anttom. Paro nug amu antta aha, nug tul niia doyom.

⁸ Nug amu doya, wagɗe buttuanab amu Paro nug tul niiak aɗitnu dabmak kuɗum awe, oo ii maitte, nug Isip dilag baɗ mak danab, doyak danab ele onilagppa e, nug noobppa goppig. Ag ukkaeg, Paro nug tul niiom, nug amu ag amelagppa mattiom, amge ag mehuqkkulagnu am elele iitta.

⁹ Ag ii mehuqeg amu, wain babaitta Paro mettak anuqak danab nug Paro amegppa aum. “Dahil eheɗ hak am gemu da daulppa doum.

¹⁰ Anukka na nahipaɗ maɗi nid aɗit, da, bret manak ikki danab ele, na i, nahipaɗ maɗi nid amu, na ihinihnu oot nauhe, maniguittak nahipad gumak danab dilag okkai laugppa daatte ele, na maniguittak amuppa meite daaɗa,

¹¹ i oh tuqan laippuppa tul niimuɗ, amu tul anen anen ihinih oh am nuhig diig ele.

¹² Aria, Hibru ted nid bau, nug am Potiparnu maɗi nid amu, nug i ele appa daatta, i nug amegppa tul ihinti mattiuɗ doya, tul niiak aɗit amu diilti mehuqom.

¹³ Nug aum amubia da uɗien, uɗat da hemi am baula iikku hettem. Bret hak danab amu, ag nug baag otaɗna, adppa aihppig; nid amu nug aum, amubiaib heppig,” awa aum.

Josep nug Paronu tul niiak diig mehuqom

¹⁴ Grep titia leppu mettak danab nug anam a amu, Paro nug Josep uɗikkunu nai maniguittak nau gatatu eleppa me ukkom. Me ukke, ag paha Josep maniguittak amuppan aon uɗieg, nug id awa, lamen laa takka, Paro toppa ukkom.

¹⁵ Josep ukke amu, Paro nug amegppa aum. “Da tul niimi, amge danab laa nug tul niiak amu, diig nuhig mehuqkkunu elele iitta. Anam aakku, amge na am tul niiak doona, na diig mehuqkkutnu elele aeg doomi,” awa aum.

¹⁶ Nug anam a amu, Josep nug aum. “Da mehuqkkulnu elele iitta, amge keeke na dookkutnu oot hette amu, Kayak Nug na ippunitteb dookkut,” awa aum.

¹⁷ Josep anam a amu, Paro nug aum. “Tulppa da le Nil daugppa daaiyi,

¹⁸ makau eblaih aɗit ele leppanu bena, le daugppan gikkiɗah lappig. Makau amu ag beɗulag ena, teppulag ele.

¹⁹ Makau amu ag beeg, makau eblaih aɗit laa ele beppig. Ag am beɗulag nakok, ena iitta, ebehilkad tak nau. Genab! Da deɗ laa makau amubia Isip wanppa ii anidmi.

²⁰ Aria, makau ena iitta, ebehilkad tak nau ag bena, makau beɗulag ena, teppulag ele aqan lappig.

²¹ Lappig, amge ag beɗulag ii titiɗppig; ag nau daappig, anamib daappig. Da anam antten amu, da ahami.

²² Amu da eɗuen niieye, da baula tul niimi. Tul amuppa da ee aeg laa ⌊wit, bali keeke⌋ nug gumu laippu ikki eblaih aɗit ele anidmi. Ikki oh am ena, aelkad ambak.

²³ Antte amu, ikki eblaih aɗit ele laa ele beppig anidmi, amge ikki amuam aelkad kuɗum iitta, ulah kaɗag gakkaɗak ele aqeeqe, aelkad teppu ele iitta daappig.

²⁴ Aria, ee aeg ikki aelkad kuɗum iitta ag ee aeg ikki ena, aelkad ambak ele ladappig. Da tul niiak amu oh baɗ mak danab amelagppa mattimi, amge danab amu laa nug diig mehuqatkkunu elele iitta,” awa aum.

²⁵ Paro anam a amu, Josep nug aum. “Nahip tul niiak aɗit amu diig laippu. Kayak Nug aɗi keeke hekkunu hette amu, Nug ippunittom.

²⁶ Makau eblaih aɗit ele beɗulag ena, teppulag ele, amu ee aeg ikki eblaih aɗit ele ikkilag oh ena, aelkad ambak ele, amu ag oh maɗ eblaih aɗit ele ippunidtte. Keeke aɗit oh am diig laippu.

²⁷ Makau eblaih aɗit ele beɗulag ena iitta, ebehilkad tak ele, amu ee aeg ikkilag eblaih aɗit ele, ag ena iitta, ulah gakkaɗak aqeeqe aelkad teppu iitta ele amu, ag oh maɗ eblaih aɗit elenu enug haen ippunidtte.

²⁸ Da matu ami aakku. Kayak Nug aɗi keeke hekkunu hette amu, Nug na ippunittom.

²⁹ Ippa, Isip wan ohppa amu, maɗ eblaih aɗit ele, maɗ amuppa Isip danab ah ag ee eppan, meu huanak aoglag,

³⁰ amge maɗ eblaih aɗit amu uueb, enug haen okkainab ba, maɗ eblaih aɗit ele daakku. Dayebeb, ag ee eppan, meu ii aomna. Genab, Isip danab ag haen ena amu daulag atikku. Enug haen amuam wan imu heeb nauhkku.

³¹ Enug haen amu eheɗ naunab amunu, haen amuppa Isip danab ag ee naɗi, okkai aoppig daakku amu, ag daulag atikku.

³² Kayak Nug keeke imu genab bekkunu nai qakkom, diig amunu na tul niiak aɗit, diig laippu ele ippunittom. Keeke imu bekkunu amu uma iitta, miagnab daatte. Am Kayak Nug hekku.

³³ Enug haen bekku amunu, na danab laa nug keekenu oo maittak awaknu ehah awom daatte ele, nuhig doyak dabmak ena okkai ele anidna, aon meppe, nug Isip wan imu oh ⌊uɗat imunu⌋ gumakku.

³⁴ Aria, maɗ eblaih aɗit ee haen imunu amu, Isip danab ag ee okkulag amunu, na appe, ag anen anen ee amu akkana, ameg tanig ele otippeg, danab laala na otiadppe, amu ag gona, ameg laippu amu, ag gabmannu aoglag.

³⁵ Gabman dilag ee haen ena imuppanu amu, ag aab okkai laalappa, dimppa lanaknu qagmeppeg, na gumakkut.

³⁶ Aɗinu? Na ee amu gumappe, enug haen maɗ eblaih aɗit ele Isip wanppa ba dayebeb, Isip danab ag enugnu padal ii memana,” awa aum.

³⁷ Josep nug nai amu ana male amu, Paro, nuhikkud ehanittak anuqak danab ele ag enaib dooppig.

Josep nug Paro waappa, Isip dilag okkai beum

³⁸ Ag anam doon amu, Paro nug nuhikkud danab amelagppa aum. “Ig danab laa nug Kayak Ouɗi ele imubia ii anidmata. Laa ippa ii daatte,” awa aum.

³⁹ Paro nug anam ana amu, nug Josep amegppa aum. “Kayak Nug keeke imu oh ippunittom amunu, laa nug nahip oo maittak awaknu ehah awak, amu danab doyak dabmak ena ele awak laa nabia uɗat imu hekkunu laa iitta

⁴⁰ amunu, dahil lag enanagnu gumak uɗat oh amu, da na eppenppa mettem; na gumakkut. Dahilad danab oh ag na oɗen dim lamidkkulag. Daib am na eɗittak daakkul,” awa aum.

⁴¹ Anam ana amu, Paro nug baula aum. “Antte! Da na Isip wan ohnu gawana meidttem,” awa aum.

⁴² Nug anam awowa amu, nug nuhig doyaknu at ringppa daatte uɗa awa, Josep eppegppa ma he, ag nug lamen elab linen hakkabppa hak aɗuitteg no, kalele golppa heppig ele amu, nug amu awa, baagppa palittom.

⁴³ Palitteg, Paro nug oiyaknu karis laa, karis amuam danab aun Paro nugib Isip wanppa eɗittom amu, nug amuppa oikkunu dayom, nug karis amu awa, Josep mette, nug amuppa oiyom. Amu Josep nug oiyaknu karisppa ugekke, Paronu daup danab laala ag danab ibppa oippig, ag qemekkulagnu eegeg, Josep nug ukkom. Paro nug anam heum amunu, Josep nug Isip wan ohnu gawana dayom.

⁴⁴ Aria, anam dayeye amu, Paro nug Josep amegppa aum. “Da am Paro, daib na eɗidttem. Isip danab laa oh ag na oɗen aakkuib dim lamidkkulagnab,” awa aum.

⁴⁵ Anam ana amu, Paro nug Josep onig bau, Sapenat Panea ataɗom. Laa ele Paro nug aab onig On dilag mana mettak danab onig Potipera aɗeg Asenat nug wau daakkunu Josep mettom. Aakku Josep nug Isip wanppa oiyom.

⁴⁶ Josep nug maɗ 30 dayaya, nug Isip dilag King Paronu uɗat digma, nug toppanu aha ukka, Isip wan ooppa talilia oiyom.

⁴⁷ Amu maɗ eblaih aɗit ena ele, haen amuppa Isip wanppa ee meu huanak oum,

⁴⁸ amu maɗ eblaih aɗit ele amuppa Josep nug Isipnu aab okkaippa ee okkainab qagmeum. Aab okkai, nuhig wan taliliak, wan amuppanu ee Josep nug appa qagmeum.

⁴⁹ Josep nug ee aeg kuɗumnab, ihi yu ihippa daatte bia qagmaama, ebqe ukke ukke, elele iittanu nug hamu qagmeum. Aɗinu? Am huanaknab; melemel gane ebqaknu elele iitta.

Josep bekoɗ

⁵⁰ Josep wau, nug On dilag mana mettak danab Potipera aɗeg Asenat, nug enug haen ii nakppa Josepnu nid danab aɗit menuatom.

⁵¹ Nug Josepnu nid naanaeg menue amu, Josep nug aum. “Kayak Nug he, da uug guittak ele dahil, amu da mamel baekkudppa ele oh daul atiom,” awa aum. Nug anam aum amunu, nug nid onig Manase ataɗom.

⁵² Nug wau nug nid danab gehanu menue amu, Josep aum. “Kayak Nug wan imuppa anukka uug nau doomi ele amu, Nug ippa ehaniɗe, da gemu nid aɗit ele,” awa aum. Nug anam aum amunu, nug nid onig Epraim ataɗom.

⁵³ Aria, Isip wanppa maɗ ena eblaih aɗit ele male,

⁵⁴ enug haen maɗ eblaih aɗit ele digma neum. Josep aum, amubia beum. Wan laala ohppa enug haen beum, amge Isip wan ohppa amu, ag am ee ele.

⁵⁵ Aakku Isip danab ag ahilag ee iitta me, ag ahan gona, Paro toppa eenu oɗ medappig. Oɗ mettaeg amu, Paro nug amelagppa aum. “Ag Josep gumidna gona appeg, nug ab doon, aɗi atte amu, ag heig!” awa aum.

⁵⁶ Paro nug anam a, enug haen naɗi be, Isip wan ohppa enug haen naɗi me, Josep nug ee lag oh od matula ee me, Isip danab ee daden meppig. Aɗinu? Enug haen okkai Isip wan ohppa beum.

⁵⁷ Wan ohppa enug haen beum amunu, danab wan ohppanu ag ele Josep gumidna, Isip wanppa gona, ee daden meppig.