Genesis 35 - Nobonob Baibel

Jakop nug Betel ukkom

¹ Dimppa Kayak Nug Jakop amegppa aum. “Anukka haen na Esaunu oolna ukkaeye, da nagattoppa Betel appa gumitten nemi. Uppa nemi amunu, na ahan gona, Betel daanna, dahil qaɗab appa qekkut,” awa aum.

² Kayak Nug anam a amu, Jakop nug nuhikkud daup amelagppa aum. “Ag laa dilag kayak hambuppuak ahilag oh ig ele daamnanu hena, ag oppiak daaglagnu hena, ag lamen ihak ele takkeg!

³ Ag anam heppeg, ig ahat, Betel gota, appa ig Kayak noobppa dup nota binag mekkunignu da nuhig qaɗab qekkul. Nug da anukka uug nau ele daami, haen amu dimppa ele da adeppa adeppa oimi amu, Kayak Nug atognoiɗom,” awa aum.

⁴ Jakop anam a amu, ag laa dilag kayak hambuppuak ahilag, am daulagppanu bid ⌊ahilag ehanittak hambuppuak laa aakku⌋, ag amu ele oh Jakop mettaeg, nug keeke amu oh awa, ad ok, Sekem dayom, nug amu diigppa boumom.

⁵ Jakop anam he, ag ahan Betel ukkaegeg, Kayak Nug he, appan danab ag baɗak eheɗ nau doon, ag Jakop aɗi ele ban ii heppig.

⁶ Jakop aɗi ele ag gona gona, aab onig Lus, onig laa Betel, Kanan wanppa daatte ele, ag amuppa teppig.

⁷ Appa tewona, Jakop nug qaɗab qa, nug aben amu onig El Betel ataɗom. Aɗinu? Anukka Jakop nug Esaunu baɗa oola ugekke, Kayak Nug aben amuppa Jakop gumitta ne anttom.

⁸ Betel appa Rebekanu maɗi ah Deborah nug mauhe, ag ad ok laa Betel guguittak daatte ele, ag nug ad amu waappa, appa boumppig amunu, ag ad amu onig Alon Bakkut ataɗppig.

⁹ Aria, Jakop nug Mesopatemianu aha, Betel uɗie, Kayak Nug baula gumitta na, ititta aum.

¹⁰ “Na onin gemu am Jakop, amge baula anam ii daama. Aɗinu? Na onin bau am Israel,” awa aum. Anam amunu, Kayak Nug onig Israel ataɗom.

¹¹ Amu Kayak Nug baula ele aum. “Da am Kayak Dakka Ɠagattag Oh Ele, da inam attem. Na gona, kuɗum appate! Na appatppe, na buɗunad ag diig laippu, amge huu okkai piɗe piɗe oiglag. Na buɗunadppa danab laala ele king bekkulag.

¹² Wan imu da anukka Abraham, Aisak ele matami amu, da gemu na, amu na buɗunadppa ele madattem,” awa aum.

¹³ Kayak Nug anam ana mala, Nug aben amuppanu aha, Jakop uuitta, attan teum.

¹⁴ Attan te amu, Jakop nug Betel appa, Kayak nug amegppa nai mattiomppa men, at daakkunu, nug men qappe dayeye, nug wain gokkaɗaknu ofa daakkunu wain men qaɗeppa gokkaɗa, goɗen ele gokkaɗom.

¹⁵ Gokkaɗowa, nug aben amu, appa Kayak nug amegppa nai mattiom amu, nug aben amu onig Betel ataɗom.

Rahel, Aisak ele mauhpiɗ

¹⁶ Aria dimppa, ag Betelnu ahan, Eprat gonana, Eprat nakok uma dayeye, ibppa Rahel nug nid menukkunu guittak okkai doyom. Guittak okkai doyaya,

¹⁷ nid menue, gumittak ah nug Rahel amegppa aum. “Na aib baɗame. Aɗinu? Na bekkat laa menume,” awa aum.

¹⁸ Nug anam a, Rahel nug mauhkkunu miag dayom amunu, nug nid onig Benoni ataɗom. Ataɗom, amge Jakop nug onig Benyamin ataɗom.

¹⁹ Aakku Rahel mauhe, ag nug Eprat ukkaknu ib daugppa boumppig. Eprat onig laa am Betlehem.

²⁰ Boumona amu, Jakop nug men laa awa, at daakkunu Rahel boumppigppa qappom; am gemu, ⌊nai imu yaak haenppa⌋ am ele daatte.

²¹ Aria, Israel nug baula aha, aab laa onig Mikdal Eder eɗitta ukka, peh lag nuhig aguppa qappom.

²² Israel nug wan atu amuppa dayeye amu, Ruben nug mameg wau amge waunab iitta Bilha ele niieh, Israel nug doyom.

Jakop, onig laa Israel, nug bekkod onilag

²³ Jakop nug bekkod 12 ele. Lea bekkod am Ruben, nug Jakopnu nid danab naanaeg, Simeon, Lewi, Juda, Isakar, Seblon ele.

²⁴ Rahel bekoɗ am Josep, Benyamin ele.

²⁵ Bilha, Rahelnu maɗi ah amu, nug bekoɗ am Dan, Naptali ele.

²⁶ Silpa, Leanu maɗi ah amu, nug bekoɗ am Gad, Aser ele. Jakop bekkod, ag anilkad Mesopatemia appa menuadppig am anam aakku.

²⁷ Aria, Jakop nug aha, nug mameg Aisak Mamre dayeye, nug nug gumitta noa dayom. Mamre am aab laa onig Kiriat Arba guguittak dayom. Kiriat Araba onig laa am Hebron. Anukka Abraham, Aisak ele Hebron appa daadpiɗ.

²⁸ Aisak nug maɗ 180 dayaya oiyom.

²⁹ Nug kainonab ma, nug mauhe, nug bekoɗ Esau, Jakop ele boumpiɗ.