Genesis 32 - Nobonob Baibel

Jakop nug Esau baɗittom

¹ Amu Jakop nug appanu aha ugekke, Kayaknu engel ag nug uɗa teppig.

² Uɗa teeg anatta, Jakop nug aum. “Imuam Kayaknu daup,” awa aum. Nug anam anana, nug aben amu onig Mahanaim ataɗom.

³ Haen amuppa Jakop awag Esau, nug Edom wanppa, onig laa Seir, nug appa dayom. Dayeye, Jakop nug nuhikkud maɗi nid laa ag Esaunu nai aon gokkulagnu he goppig.

⁴ Amu tatam nug ag amelagppa aum. “Ag dahil okkai Esau amegppa inam akkulag. ‘Da Jakop, nahip maɗi nid amu, da inam attem. Da Laban ele daauɗ uɗie, tumaiib appanu ahami.

⁵ Gemu amu, da doɗ kuɗum ele; makau, donki, sipsip, meeme ele, amu da maɗi nid maɗi ah ele. Na nai imu maɗi nid dahilad oɗelagppa mei gotte amunu, na dahil naɗi, na doona, na oot dahilnu ena daakkunu ool daatte,’ ” awa aum.

⁶ Anam awa a amu, danab ag nai aon gona, eɗun uɗina, haen amuppa ag Jakop amegppa appig. “Ig na awan Esau toppanu iikku uɗimut. Nug na uɗan tekkutnu uɗitte; nug amu nuhikkud daup 400 ele,” aon appig.

⁷ Aon aeg, Jakop nug huanak baɗaɗa, dabmak awa, baekkudppa nug ele daappig amu epeɗia, doɗ oh ele epeɗia, ameg aɗit maattom.

⁸ Amu nug dabmak inam awom. “Esau nug uɗia, danab ameg laa banelag teeb, ameg laa ag oolna gokkulagtai,” awa aum.

⁹ Anam awowa, Jakop nug unuqitta aum. “O Yawe, na am da alal Abrahamnu Kayak, da mamel Aisaknu Kayak ele. O Yawe, na dahilnu inam ame, ‘Na eɗun, na appan diigppa, amu na nahipadppa ele gumadna goppe, da na ena atognoidkkul,’ aon ame.

¹⁰ Da am nahip maɗi nid, na dahilnu oo mauhaknab kobol, oo metta ii uuak kobol ele doon hettem, amge da am nid ena amunu na amu helom am iittanab. Anukka da dahil hokkat eleib Jodan le mataɗmi; gemu amu, da danab ameg aɗit ele.

¹¹ Da Esau nug uɗia, da, dahilad ah, amu nid naunau dahilad ele, nug ihinignu ban hekkunu baɗattem amunu, na da ehaniɗppe padal ii mepanu oɗ medattem.

¹² Da amunu baɗattem, amge anukka na inam ame. ‘Da genab heppi, na keeke kuɗum ele daakkut. Na buɗunad ag appatna, yu ihippan ihi bia daappeg, danab ebaqadkkulagnu elele iitta daakku.’ ” Jakop anam unuqittom.

¹³ Nug anam ana amu, tuqan amuppa nug aben amuppa dayaya, nug awag Esau doɗ laala nuhig daaglagnu hamu medakkunu inam otiom:

¹⁴ meeme anig 200, meeme dawai 20, sipsip anig 200, sipsip dawai 20,

¹⁵ kamel anig nakkud ele 30, makau anig 40, makau dawai 10, donki anig 20, amu donki dawai 10 ele.

¹⁶ Nug anam epeɗia, nuhikkud maɗi nid eppelagppa ameg piɗe piɗe maatta, nug ag amelagppa aum. “Ag anuqna ukkeg! Amge doɗ ameg laa, ag doɗ ameg laa ele ouqak aib goppig,” awa aum.

¹⁷ Jakop nug danab anuqom ele, amu nug amegppa aum. “Na gona, Esau ibppa uɗa teppe, nug na inam oɗ medakku. ‘Na adeppa gottem? Na aunnu maɗi nid? Doɗ imu oh am aunnu?’

¹⁸ Nug anam ab amu, na inam appe dookku. ‘Doɗ imu oh amu maɗi nid nahip Jakopnu. Nug nuhig danab okkai Esau, hamu mettak nuhig daakkunu me uɗieye, nug dim uɗitte,’ aon akkut,” awa danab amu amegppa aum.

¹⁹ Jakop nug anam anana amu, nuhikkud maɗi nid laa doɗ ameg gumadppig ele, nug amu oh amelagppa aum. “Haen ag Esau anidna amu, nai laippu anamib amegppa aig!

²⁰ Amu ag nai imu, ‘Nahip maɗi nid Jakop, nug dim uɗitte,’ aon akkulagnu aibnab daulag atiom,” awa aum. Jakop nug anam aum. Aɗinu? Nug inam dabmeum. “Da nuhig daakkunu hamu mettaknu keeke imu mei, anuqa gotte amu, nug amu antta, nug oo eɗukku. Eɗueb amu, haen da awai, nug anidppi, nug dahilnu oo ena daakkutai,” awa aum.

²¹ Anam amu, Jakop nug keeke nug awag nuhig daakkunu hamu medakkunu dabma, nug keeke amu oh tatam he goppig, amge nug amu, nug tuqan amuppa haen tutu dayaknu aab kalakppa dayom.

Jakop laa ele aa nug ehalya hepiɗ

^22-23 Anam dayeye amu, tuqan amuppa Jakop nug wauuɗ, nug wauuɗ amge wauuɗnab iitta, amu nug bekkod 11 ele diiatta, nug Jabok le, le baag qakppa mataɗowa, ⌊eɗua ukka,⌋ nug he, nug baekkudppa laa oh ag le mataɗeg, amu nug he, laa ag keeke nuhig oh ele diin, le mataɗna wappig.

²⁴ Nug anam ha, nug nukka ag haen tutu dayaknu aab kalak daappigppa appa dayom. Dayeye amu, danab laa be, nug ele nug ehalak heeheh ukke, wakkaɗom.

²⁵ Aa anam nug ehalak heyaya, laa nug Jakop eɗidkkunu elele iitta doyom amunu, nug Jakop maɗog aɗe, Jakop maɗog apiɗittom.

²⁶ Maɗog apiɗitte, danab amu nug aum. “Wakkaɗom amunu, paɗailppe da gokkul!” awa aum. Nug anam a amu, Jakop nug aum. “Da na ii paɗaidpa! Tatam na itittak ena meɗappe, na paɗaidppi gokkut,” awa aum.

²⁷ Jakop nug anam a amu, danab amu nug aum. “Na onin aun?” A amu Jakop nug aum. “Da Jakop,” awa aum.

²⁸ A amu, danab amu nug aum. “Na onin baula Jakop iitta; na onin Israel daakku. Aɗinu? Na Kayak, danab ele nug wagai mak hena, wagai maknu ii uume.”

²⁹ Nug anam a amu, Jakop nug danab amu amegppa aum. “Na onin appe, da dookkulnu oɗ medattem,” awa aum. Anam aum, amge danab amu nug aum. “Aɗinu, na da onilnu oɗ mettem?” Nug anam awowa, aa daapiɗppa nug Jakop itittom.

³⁰ Anam amunu, Jakop nug aum. “Da Kayak ele nug iɗu anttak hemuɗ, amge danab ag anam hena mauhtteb, amubia da ii mauhmi.” Nug anam aum amunu, nug aben amu onig Peniel ataɗom.

³¹ Dimppa aam be, Jakop nug Penielnu aha, autaut ukkom. Aɗinu? Nug maɗog am guittak awom.

³² Anam amunu, Israel danab ag haen amuppa digmak uɗiak, gemu ⌊nai imu yaak haenppa⌋ ele, ag diɗi doɗ maɗogppa daatte ii latteb. Aɗinu? Danab eppegppa Jakop maɗog aɗe, apiɗittom.