Genesis 28 - Nobonob Baibel

¹ Rebeka nug anam aum amunu, Aisak nug Jakop onigppa e uɗie, itittak ena mettowa, inam hekkununab aum. “Na Kanan ah aib aome.

² Na Mesopatemia gona, na anin mameg Betuel laugppa tena, Betuel bekka Laban, na anin awag, na nug aɗeg laippu, ah nahip daakkunu aokkut.

³ Da Kayak Nukka Ɠagattag Oh Ele Nug na ititteb, na buɗunad kuɗumnab bena, huu okkai anen anen oh laippu daaglag,

⁴ amu Kayak, Abraham itittak ena mettom amu, Nug heeb, itittak ena amu na beɗunppa dayebeb, na wan laihnu danab wan imuppa gemu daattem ele amu, Kayak, Abraham amegppa aum bia, na wan imu aokkutnu ool daatte,” awa aum.

⁵ Anam ana amu, Aisak nug Jakop me, Mesopatemia appa, Laban laugppa ukkom. Laban nug Aram danab Betuel bekka. Nug appinag Rebeka, nug Jakop, Esau ele anilah.

⁶ Aria, Esau nug amunu inam doyom. Aisak nug Jakop ititta, nug Mesopatemia ah aokkunu me ukkom. Laa ele Aisak itittak mettom haenppa nug ele Jakop amegppa inam hekkununab aum. “Na Kanan ah aib aome!”

⁷ Laa amu, Jakop nai amu doya, nug mameg oɗe dim lamitta, Mesopatemia ukkom.

⁸ Esau nug keeke amu doya, nug mameg Aisak nug Kanan ahnu oo gamag ii ahom doyom

⁹ amunu, nug ukka, Ismael buɗuppan ah awom. Nug ah aɗit tatam diiatom, amge dimppa ah gehanu onig Mahalat, nug Abraham bekka Ismael aɗeg, Nebaiot appinag awom.

Jakop tul niiom

¹⁰ Amu Jakop nug Mesopotamia gokkunu ugakka, nug Berseba uua, Haran gokkunu ukkom.

¹¹ Nug ugakka, nug aben laappa te, aam noum amunu, nug tuqan niikkunu dayom. Dayaya amu, nug appanu men laa awa, uɗun ma niiom.

¹² Niiaya, tuqan tulppa nug adqaɗ laa anttom. Adqaɗ amu diig wan ya ukka, hab aabppa tak dayeye anttom. Dayeye, Kayaknu engel ag adqaɗ amuppa nenan tenan daappig.

¹³ Yawe Nug adqaɗ igippa dayaya, nug Jakop amegppa aum. “Da am Yawe, na alan Abraham, na mamen Aisak ele dilah Kayak. Na niittemppa, wan amu da heppi, na, amu na buɗunad ele aoglag.

¹⁴ Na buɗunad ag wan gappud bia appatna, wan aben imuppanu qaban uɗitteppanu daatte, wan kaɗag uɗitteppanu daatte, wan yawalti uɗitteppanu daatte, amu wan yau uɗitteppanu daatte ele aoglag. Aoppeg amu, wan laa ohnu danab ag na, na buɗunadppanu ele itittak ena aoglag.

¹⁵ Da na ele daaɗa, na adeppa gokkut amu, da na gumidkkul. Da heppi, na eɗun wan imuppa uɗikkut. Aɗinu? Da na ii uuidpa. Da na ele daaɗa, keeke oh nahipnu hekkulnu nai ain qakkami amu, da hekkul,” awa aum.

¹⁶ Jakop keeke amu oh antta aha, dabmak awa, dabmakppa inam aum. “Yawe aben imuppa daatte, amge da ii doomi,” awa dabmeum.

¹⁷ Nug anam dabma, nug baɗa, nug aum. “Kayak iguppa daatte, hab aabnu od ele iguppa daatte amunu, aben imuam, danab ebehi oh bodoetta le maknu aben,” awa aum.

¹⁸ Aria, wagɗe buttuanab Jakop nug men uɗun nuhig awa, aben amuppa at daakkunu qappa, nug goɗen qaɗeppa gokkaɗom.

¹⁹ Gokkaɗowa, nug aben amu onig Betel ataɗom. Anukka aab okkai appa dayom ele am onig Lus adappig.

²⁰ Jakop nug keeke amu oh hewowa, nug genabnab hekkunu nai anan qakka, nug inam mattiom. “Kayak Nug genab da lamenppa, ee lanakppa, ukkakppa ele atognoiɗa omaiɗebeb,

²¹ da oiye oiye, eɗuen, da mamel toppa maɗoɗ ele goppi amu, Yawe Nug dahil Kayak daakku.

²² Aben da men eppami ele imu amu, am Kayak noobppa dup noa binag mak aben daakku. Amu Kayak Nug aɗi aɗi keeke oh da meɗeb amu, da amunu obatak eblaih tanig ele ooppanu obatak laippu Kayak medakkul,” awa aum.