Genesis 25 - Nobonob Baibel

Abraham mauhom

¹ Amu haen laa Abraham nug ah laa onig Keturah awe,

² aa nid danab eblaih laippu ele menuadpiɗ. Ag onilag am Simran, Joksan, Medan, Midian, Isbak, Sua ele.

³ Joksan bekoɗ am Seba, Dedan ele. Dedan buɗub amu Asur danab, Letus danab, amu Leum danab ele.

⁴ Midian bekkod am Epa, Eper, Hanok, Abida, Elda ele. Ag am Keturah buɗub aakku.

⁵ Abraham bau dayaya, nug nuhig mauhak haenppa aɗi keeke oh nug eppegppa daakku am Aisak aokkunu nai babaitta,

⁶ nug ele bekkod laa, ag anilti am nug wauuɗ amge wauuɗnab iitta amu, nug aa bekkalti keeke ahilkad daakkunu hamu mattom. Matta malowa amu, nug ag nug bekka Aisak uuidna gokkulagnu a, ag laih kaɗag uɗitteppanu gona, wan amuppa daanna oippig.

⁷ Amu Abraham nug maɗ 175 dayaya,

⁸ nug mauhom. Nug am danab kainonab. Haen elab wanppa oiya, nug mauhom.

^9-10 Nug mauhe amu, nug bekoɗ Aisak, Ismael ele aa nug men oɗe onig Makpela, tatam Hit danab Sohar bekka Epronnu dayom, dimppa Abraham nug Hit danab eppelagppanu daden meum, Sarah boumomppa, appa boumpiɗ. Makpela amu, Mamre guguittak dayom.

¹¹ Abraham mauhe, Aisak, nug Ber Lahai Roi guguittak daye, amu Kayak nug itittom.

Ismael buɗub

¹² Anukka Sarahnu maɗi ah Hagar, Isipnu, nug Abraham bekka Ismael menuom amu, nai imuam Ismaelnu nai.

¹³ Ismael bekkod 12, naanaeg ukkak huh bieg, ag onilag am inam: Nebaiot, Ismaelnu nid danab naanaeg, aria Kedar, Adbil, Mipsam,

¹⁴ Misma, Duma, Masa,

¹⁵ Hadat, Tema, Jetur, Napis, Kedema ele.

¹⁶ Ismael bekkod 12 onilag aakku, amu ag oh ahilkad huu okkai anen anen ikki danab daaeg, danab ag, ag onilkad aon, aab anen anenppa ele ataɗppig.

¹⁷ Aria, Ismael nug maɗ 137 dayaya, nug mauhe,

¹⁸ dimppa nug buɗub ag Hawila, Sur ele gamalahppa oittappig. Wan amuam Isipnu tom kaɗag uɗitteppanu, am tom amu dim lamitta daye, am tom amuppanu ukka ukka, Asur batak. Ag wan amu ooppa oinna, ag ahilkad tiig laippu ele kekeɗ mettak daadttappig.

Aisak, Rebeka ele aa Jakop, Esau ele menuatpiɗ

¹⁹ Imuam Abraham bekka, Aisaknu nai. Abraham nug Aisak mameg, amu

²⁰ Aisak nug maɗ 40 dayaya, nug Betuel aɗeg Rebeka awom. Betuel nug Aram ted Mesopatemianu, amu nug bekka Laban, Rebeka awag, nug ele amu Aram ted.

²¹ Aisak wau Rebeka nug nid iitta, nug ah mattoi amunu, Aisak nug Yawe amegppa amunu unuqitte, Yawe Nug he, Rebeka nug oo ele oiyom.

²² Nug ooppa nid aɗit daayya, aa nug ehalpiɗ. Aa anam heeheh amu, Rebeka nug aum. “Aa anam hettep amunu, da ool iitta daalom, amuam ena,” awa aum. Anam ana amu, nug keeke amunu Yawe oɗ medakkunu ukkom.

²³ Oɗ mette, amu Yawe Nug aum. “Danab ameg aɗit na ootppa daattep. Ao, na menuatppe, aa appatya, ameg piɗe piɗe daaglah. Ameg laa amu, nuhig ɠagattag am laa eɗidkku. Ge, nid tatamnu am nid gehanu waappa daya, nuhig uɗat hekku.” Yawe Nug anam aum.

²⁴ Yawe anam a, dimppa nid aokkunu haen do, Rebeka nug nid danab aɗit menuatom.

²⁵ Matunu amu nug beɗu kokoɗ, uɗig alala amunu, ag nug onig Esau ataɗppig.

²⁶ Aria, gehanu nug anig menuewe, nug Esau baeg bittub aɗaɗa neum amunu, ag nug onig Jakop ataɗppig. Haen aa dopiɗ amu, Aisak nug maɗ 60 ele dayom.

²⁷ Dimppa aa ena meya, Esau nug hikan danab dayom. Nug dad okkaippa oiyom, amge Jakop nug toetta dayak danab; nug ag daappigppa dayom.

²⁸ Aisak nug doɗ dakkuɗ lakkunu baag gottom. Esau nug hikan danab amunu, Aisak nug Esaunu oo mauhom, amge Rebeka nug Jakopnu oo mauhom.

²⁹ Deɗ laa Jakop nug ee heehe, Esau uɗia, enug eheɗ qeeqe, Jakop amegppa aum.

³⁰ “Enug huan iutte amunu, na paha lewa kokoɗ amu meɗappe lai!” awa aum. Anam aum amunu, ag Esau onig laa Edom ataɗppig.

³¹ Esau anam a amu, Jakop nug oɗeppa awa aum. “Na am nid danab naanaeg. Tatam na nid danab tatamnu dilag itittak ena anuqak oh da meɗappe, da lewa imu medakkul,” awa aum.

³² Jakop anam a amu, Esau nug aum. “Da mauhkkul hettem amunu, nid danab tatamnu dilag itittak ena anuqak am attemun da ehaniɗkku?” awa aum.

³³ Esau anam aum, amge Jakop nug aum. “Na keeke amunu meɗakkutnu tatam nahip nai ɠagattag qettana, da amelppa appe doyen, da ee imu medakkul,” awa aum. Anam a amu, Esau nug nuhig nid danab tatamnu itittak ena anuqak Jakop medakkunu nuhig nai ɠagattag qetta aum.

³⁴ Anam he amu, Jakop nug Esau bret, amu bin diig laa onig lentil, amunu lewa ele mettom. Mette, Esau nug lawowa, aha ukkom. Nug nuhig nid danab tatamnu itittak ena anuqak am keeke anuqak dab-ii-mettom.