Genesis 22 - Nobonob Baibel

Kayak Abraham ma anttak mettom

¹ Dimppa Kayak Nug Abraham ma anttak mettom. Nug Abraham onigppa e amu, Abraham nug oɗeppa awa aum. “Da ina, aɗitai appe dookkul,” awa aum.

² Abraham anam a amu, Kayak nug amegppa aum. “Na nahip nid laippunab, Aisak, na nuhignu oot mauhtte ele amu, na nug aon, wan atu onig Moria gona, appa qauko laa da na ippunidkkul, amuppa na nugppa manaknu ofa he!” awa aum.

³ Kayak anam a, wagɗe buttuanab Abraham nug aha, keeke maknu donki gomeppa qakka, aab manaknu ofa haknu oppata me, Aisak, maɗi nid aɗit ele omalatte, aben Kayak aum, amuppa gokkulagnu goppig.

⁴ Ag ukkaegeg, deɗ ewam uue, Abraham nug neekke ukke, aben amu uma anttom.

⁵ Antta amu, nug maɗi nid aɗit amelahppa aum. “Aa inam donki gumaya daapeɗ, da Aisak ele i laih uppa goɗa, Kayak noobppa dup noɗa binag mewoɗa, i eɗuɗ uɗignih,” awa aum.

⁶ Abraham anam ana amu, nug aab ehaglak, manaknu ofa haknu amu, nug aab amu Aisak mette mawe, nug qep, aab aɗu ele aɗe goyaya,

⁷ Aisak nug mamegnu, “Mama,” awa aum. A amu, Abraham nug, “O nagppi, aɗi?” awa aum. Abraham a amu, Aisak nug aum. “Aab aɗu, aab ehag ele am iikku, amge manaknu ofanu amu, amunu sipsip nag am adekku?” awa oɗ mettom.

⁸ Aisak anam a amu, Abraham nug aum. “O mam, Kayak Nug nukka Nug manaknu ofa, Nug amunu sipsip nag metakku,” awa aum. Nug anam awa a amu, aa gopiɗ.

⁹ Aa goya, aben Kayak aum, amuppa tewoya, Abraham nug qaɗab qa, aab qaɗab attan ilakkunu babaitta, Aisak hippala, aab qaɗeppa me niiom.

¹⁰ Abraham nug anam he, Aisak anam niieye amu, Abraham nug Aisak yeeb mauhkkunu qep awom.

¹¹ Abraham nug anam heehe, Yawenu engel nug hab aabppanu ewa, “Abraham, Abraham,” awa eum. E amu, Abraham nug aum. “Da ina, aɗitai appe dookkul,” awa aum.

¹² Abraham anam a amu, engel nug amegppa aum. “Na nid aib yaappe mauhom. Na keeke eheɗ laa ele nuhigppa aib heme. Aɗinu? Na nid nahip laippunab genab meɗame amunu, da geha iikku na da, Kayak, na dahilnu ebehin oh bodoetta le mette amu, da doottem,” awa aum.

¹³ Engel anam a, Abraham eɗua neekke ukke, sipsip dawai qeqeɗi ad eppegppa aolak dayeye antta awa, manaknu ofa daakkunu mana, Kayak mettom. Sipsip amu nug Aisak ou dayaya, abenab awom.

¹⁴ Kayak Nug anam heum amunu, Abraham nug aben amu onig Yawe Yaira ataɗom. ⌊Nai amu eɗuak am, “Uug ihinig aɗi daakku amu, Yawe Nug ehanigkku.”⌋ Gemu, ⌊nai imu yaak haenppa⌋ ele ag atteb, “Yawenu qaukoppa Nug ehanigkku.”

¹⁵ Aria, Yawenu engel nug baula hab aabppanu Abraham amegppa ewa, inam aum.

¹⁶ “Yawe Nug inam awa atte. ‘Da dakka, da onil awen, da nai dahil imu da onilppa ɠagattag qein madittem. Nai am inam: Na nid nahipnab meɗame. Na ii awaidna aɗame

¹⁷ amunu, diig amunu da genabnab genab na itidkkul. Da itidppi, na buɗunad ag appatna, abuɗ le ihippa, o hoɗoppai bia kuɗum daaglag. Ag kekeɗ eɗadna, ahilkad aab diiglag,

¹⁸ amu da heppi, na buɗunppa wan ohppan danab ag itittak ena aoglag. Aɗinu? Na nai dahil dim lamidme.’ Yawe Nug anam awa atte,” awa aum.

¹⁹ Engel anam a amu, Abraham, Aisak ele aa eɗuya noya, maɗi nid aɗit anatya diiateh, Berseba goppig. Gona tena, Abraham nug appa dayom.

Nahor bekkod

²⁰ Abraham Nahor ele aa eamag, amu haen laa dimppa Abraham nug Nahornu nai inam doyom. “Nahor wau Milkah nug nid danab eblaih ewam ele menuattom.”

²¹ Ag onilag am Us, nug nid naanaeg, Bus, Kemuel, Kemuel amu, nug Aram mameg,

²² Keset, Haso, Pildas, Jitlap, Betuel ele.

²³ Betuel aɗeg amu Rebeka. Abraham Nahor ele aa eamag, amu Nahor, Milkah ele oiyya, aa nid amu menuadpiɗ.

²⁴ Nahor wau amge waunab iitta, am onig Reumah, amu nug bekkod waɗele menuattom. Ag onilag Teba, Gaham, Tahas, Maka ele.