Genesis 19 - Nobonob Baibel

Kayak Nug he, Sodom Gomora ele nauhpiɗ

¹ Haen amu tueb Lot nug Sodom aabnu aɗ od guguittak dayeye, engel aɗit nopiɗ. Noeheh, Lot nug anata aha, uɗalah tekkunu gumata ukka, gateg qaun o, gomela, iɗu wanppa meum.

² Wanppa ma amu, nug aum. “O danab okkai aɗit dahilaɗ, aa da, da ahilah maɗi nid amu, aa da laulppa gokkulahnu ool daatte. Aa goya, baelah ihoya, tuqan imuppa niiyya, butti buttua ahaya gokkulah,” awa aum. Nug anam aum, amge engel aɗit aa nug amegppa apiɗ. “Iitta! I qagmak aben imuppa niignih,” aoya apiɗ.

³ Anam apiɗ, amge Lot nug laugppa gokkulahnu wagai me, aa goya, Lot laugppa daaeheh, Lot nug ahilah ee, amu bret yis iitta ele he lapiɗ.

⁴ Ee lawoya, aa ii niieheh, Sodom danab kaino ukke, nid bau ele, ag oh uɗina, lag oo mettana talilidna,

⁵ Lot onigppa ena appig. “Danab aɗit gemu uɗipiɗ amu, aa adeppa daattep? Na aa omalatna dimittim doppe, ig aa ele gappai aotu!” aon appig.

⁶ Ag anam aeg amu, Lot nug ag ele nai mattiglagnu dimittim noa, od manowa,

⁷ amelagppa aum. “O lailad, ag doyeg! Ag hak nau imu aib heppig.

⁸ Antteg, da nid ahin dahil aɗit, aa ah makkun amu, da aa omalaten, dimittim doppi, ag ahilahppa aɗi hekkulagnu oolag dayeb amu hekkulag. Amge ɗo danab aɗit da hei, aa da laulppa ena daaglahnu uɗiya daattep amu, ag ahilahppa kobol eheɗ laa aib heppig,” awa aum.

⁹ Lot anam a amu, Sodom danab ag appig. “Na qe me!” Awona amu, ag akka akka appig. “Danab imu nug ig ted iitta. Nug wan laihnu danab nug uɗia, ihinig epeɗiak danab bia daakkunu hette,” appig. Ag akka akka anam ana amu, ag Lot amegppa baula appig. “Aakku amunu, ig danab aɗit dilahppa kobol nau hekkunig, amge nahip-ppa amu, ig kobol naunab hekkunig,” aon appig. Anam ana amu, ag Lot duttuneg, nug bittumttum ukke, ag od panaglagnu gukkuidna wappig.

¹⁰ Ag anan heppig, amge engel aɗit aa Lot aɗaya eeɗeh, lag ooppa no, aa od manoya

¹¹ heeh, danab dimittim daappig kaino ukka nid bau batak oh amelkad gaɗuom. Amelag gaɗue, ag od mattiak uɗat okkai henan, od mattin anidkkulagnu elele iitta.

^12-13 Anam daye amu, danab aɗit aa Lot oɗ medapiɗ. “Na nahipadppa laa, amuam tanapad, o bekkanad, o aɗenad, o nahipadppa aun laa amu, ag aab okkai imuppa ina daattebte? Yawe Nug aab imuppanu danab ag hipunin naunab, huanak heegeg doyom amunu, nug i aab imu hepuɗ padal mekkunu meite uɗimuɗ. I hepuɗ, padal mekku amunu, na, nahipadppa laa ippa daatteb ele amu, na ag omaladppe, piɗe ukkeg!” aoya apiɗ.

¹⁴ Anam aeh amu, Lot nug aha, danab aɗit aa Lot aɗekuɗ baelti aɗapiɗ ele, ahilahppa ukka amelahppa aum. “Yawe Nug aab okkai imu heeb, padal mekku amunu, aa ahaya, aben laappa ukkeɗ!” awa aum. Lot anam aum, amge danab aɗit amu aa, “Nug qiɗ hak nai atte,” apiɗ.

¹⁵ Aria, wagɗe buttuanab engel aɗit aa Lot tappaɗidya apiɗ. “Ag danab aab okkai imuppanu ele oh padal memananu, na paha ahan, ah nahip, aɗenaɗ imu ele diippe, aab imu uun ukkeg!” aoya apiɗ.

¹⁶ Aa anam apiɗ, amge Lot nug paha ii ukkom. Nug paha ii ukke amu, engel aɗit aa Lot, nug wau, amu aɗekuɗ ele eppelagppa aɗaladya, omaladya, aab okkai dimittim gopiɗ. Aɗinu? Yawe Nug ahilagnu oo gai-iitta doya oo matta ehanattom.

¹⁷ Omaladya dimittim noya amu, engel laa nug aum. “Ag padal memanade, ag oolna ukkeg! Aib eɗun neegppig. Ag qaukoppa ukkeg! Uɗemppa aib daappig! Ag qaukoppa ii gokkulag amu, ag padal mekkulag,” awa aum.

¹⁸ Nug anam aum, amge Lot nug engel oɗeppa awa aum. “O naɗi dahil, Iitta bia!

¹⁹ Na da, maɗi nid nahip, na dahilnu ii helom bia me, na ehaniɗme. Na dahilnu oot bodoetta auta awe ehaniɗme, da ii mauhmi. Aakku, amge da doottem, aab imunu padal mak am paha bekku amunu, da qaukoppa gokkulnu am haen elele iitta. Da mauhkkul.

²⁰ Antte! Aab nakok umu nug miag daatte, da paha gokkulnu elele. Aab amu nug nakoknab. Na appe, da uppa teina amu, da padal ii mepa,” awa aum.

²¹ Lot anam a amu, engel nug aum. “Amu ele am elele. Na attem amu, da amu ele hein medakkul. Da aab amu heppi, padal ii mema.

²² Amge paha ukkeg! Aɗinu? Ag gona, aab amuppa tena daappeg, da heppi, aab imu oh padal mekkulag. Ag ibppa gobeppeg amu, da uɗat dahil hekkulnu elele iitta,” awa aum. Diig amunu ag aab amu onig Soar ataɗppig.

²³ Engel anam a, Lot nug Soar te, aam aakku ba malom.

²⁴ Lot nug Soar te, aam be, Yawe Nug he, kalu laa huana eotte onig salpa habppanu ewawa Sodom, Gomora ele qaɗelahppa neum.

²⁵ Yawe anam he amu, uɗem amu, aab okkai aɗit amu, aab okkai laala uɗem amuppa daappig, amu danab ah oh ele, amu keeke ohnab appa daappig ele, amu oh padal meppig.

²⁶ Amu Lot wau nug gamu dim lamittatta, nug eɗua dimugppa neekkowa, nug yu ɠagattag eppak eɗua dayom.

²⁷ Anam daye, buttua wagɗe, Abraham nug aha, aben nug tatam Yawe ele nai madipiɗ, aben amuppa ukkom.

²⁸ Ukka, nug neekke, Sodom, Gomora, amu atu uɗem amu ele ohppa ukke, nug aab kah huanak teete anttom.

²⁹ Haen Kayak Nug aab okkai uɗem amuppa daappig ele he, padal meppig, haen amuppa Kayak Nug Abrahamnu dabmaama, Nug Lot omala, aab okkai nug daattomppa, aab amu dimittim ukke, padal ii meum.

Lot aɗekuɗ ele niippig

³⁰ Amu Lot nug Soar ukka ta dayom, amge nug appa dayaknu oo baɗom amunu, nug aɗekuɗ diiate, qaukoppa gona, men oɗeppa daappig.

³¹ Ag appa daanna, deɗ laa Lot aɗeg tatamnu nug makkeg amegppa aum. “I mamenih nug kaino meum. Laa ele amu, danab ah wan ohppa ewau daanna oitteb, amge danab laa i ele anam oignignu ippa laa ii daatte.

³² Ahappe, i mamenih wain medapuɗ, nug lab, dabmak nuhig eɗitta ukkeb, i nug ele niita amu, ig aab ikki ihinig humagnig,” awa aum.

³³ Anam a amu, tueb amuppa aa mamelah wain mettaeh, nuhig dabmak oh eɗitta ukke, aɗeg tatamnu nug mameg ele niipiɗ. Niipiɗ, amge kobol amu ohnu dabmak Lot eɗitta ukkom.

³⁴ Aria, wagɗe deɗ amuppa aɗeg tatamnu nug makkeg amegppa aum. “Antte! Tumai tuqan da mama ele niimuɗ. Tueb imu i baula hepuɗ, nug wain lab, na nug ele niiglah. Anam heta amu, i nuhigppa nid ele daaɗa, ig aab ikki ihinig humagnig,” awa aum.

³⁵ Nug anam a amu, dimppa tueb me, aa mamelah wain mettaeh, nuhig dabmak oh eɗitta ukke, aɗeg gehanu nug ele niipiɗ. Amge Lot nug haen amuppa ele kobol amu ohnu dabmak eɗitta ukkom.

³⁶ Lot aɗekuɗ aa kobol anam heya amu, aa aakku mamelahppanu oolah ele daapiɗ.

³⁷ Oolah ele daayya, aɗeg tatamnu nug nid danab menua, onig Moap ataɗom. Nug buɗub amu, ag Moap danab.

³⁸ Aria, aɗeg gehanu nug ele nid danab menua, nug onig Benami ataɗom. Nug buɗub amu, ag Amon danab.