Genesis 13 - Nobonob Baibel

Abram, Lot ele, aa wan piɗe piɗe daaglahnu apiɗ

¹ Paro nug Abram gokkunu anam a amu, Abram nug wau Sarai ele, Lot ele oh Isipnu ahan, Negeb goppig. Gonana amu, Abram nug nuhikkud keeke oh diia ukkom.

² Haen amuppa nug enub kuɗumnab ele; nug doɗ kuɗum, silwa kuɗum, amu gol ele kuɗum.

³ Nug Negeb ukka dayowa, aha oiya oiya, Betel aabppa teum. Anukka nug Betel, Ai ele gamalahppa dayaya,

⁴ qaɗab qeum ele amu, aben amuppa nug eɗua ukka dayaya, Yawe noobppa dup noa binag meum.

⁵ Amu nug Lot ele wan amuppa daayya oipiɗ. Aa anam oipiɗ, amge Abram nug keeke kuɗum, Lot ele enub kuɗum; danab, ah, doɗ ele

⁶ amunu, aa oh aben laippuppa daaglahnu elele iitta.

⁷ Anam daye, Abramnu maɗi nid doɗ gumadppig, amu Lotnu maɗi nid doɗ gumadppig ele ag nai aeg ona aeg doum. Kanan danab, amu Peres danab, ag ele haen amu wan amuppa daadppig.

⁸ Uug anam daye amu, Abram nug Lot amegppa aum. “I amu diig laippu amunu, a ona a doak i oonihppa, ihinih maɗi nid oolagppa ele aib dayom.

⁹ Wan okkai niitte amunu, i aben laippuppa ii daamɗa. Na amen humana, neegppe ukkeb, atu oh antte! Anidna amu, na nanehppa gokkut, da naɗiap-ppa gokkul. O iitta, na naɗiap-ppa gokkut amu, da nanehppa gokkul,” awa aum.

¹⁰ Anam a amu, Lot nug neekke ukke, Jodannu uɗem anttom. Uɗem amuppa amu, le kuɗum ele. Anttak nuhig am Yawe Iden wanppa dad enanag heum bia, o Isip wan, Soar guguittak daatte ele, amubia. Haen amuppa Yawe nug aab okkai aɗit onilah Sodom, Gomora ele ii he nauhpiɗ.

¹¹ Antta amu, Lot nug Jodannu uɗem, amuppa nug daakkunu tituanom. Jodan uɗem am, aa daapiɗppanu, kaɗag uɗitteppanu dayom amunu, Lot nug laih appa gokkunu ahom. Nug Abram ele aakku laippu ii daapiɗ.

¹² Aa otiya amu, Abram nug Kanan wanppa dayeye, Lot nug Jodan uɗemppa, aab okkai daappig oolagppa dayaya oiyaya ukka ukka, Sodom guguittak peh lag nuhikkud qappalattom.

¹³ Amu Sodom danab ag nau hak danab. Ag Yawe noobppa hipunin kuɗum, okkai ele henan oidttappig.

¹⁴ Lot nug Abram uuitte ukke, amu dimppa amu, Yawe nug Abram amegppa aum. “Na hippaidna, kaɗag, qaban, yawalti, yau ele uɗittebppanu neegna, wan imu oh antte!

¹⁵ Aɗinu? Wan oh na anidttem ele imu amu, da na, na buɗunad ele madappi, haen oh ahilag hanhan daakku.

¹⁶ Da heppi, na buɗunad appatnana, kuɗumnab, ebaqak ahilag am wan kalu bia bekkulag. Danab laa nug wan ohppan kalu ebaqa dookkunu elele daatte dayeb amu, nug Abram buɗub ebaqakku.

¹⁷ Aria, da na wan imu medakkul amunu, na ahan oinna, wan imu oh antte!” awa aum.

¹⁸ Yawe Nug anam a amu, Abram nug aha oiyaya, Hebron appa nug danab laa onig Mamre, nuhig ad ok daappig, aben amuppa nug peh lag nuhig qappowa dayom. Appa ele amu, nug Yawe noobppa dup noa binag mekkunu qaɗab qeum.