Galesia 6 - Nobonob Baibel

Lailkad ehanattaknu kobol

¹ O lailad, danab laa nug hipunin laa heeb, ag anidna amu ag danab ag Kayak Ouɗi ele, ag danab amu eɗun aoglagnu nai bodoettak eleppa oo babaitteg! Ag aib nuhignu guhuɗittak kobol heppig. Ag oh anen anen ahilagnu dabmeig! Satan nug ag ele eheɗ hekkulagnu oolag eeɗkkunu daatte.

² Ag nug ehanittak henana, uug ahilkad maweg! Ag kobol amu henana, ag Kristusnu ɗo elele dim lamidkkulag.

³ Danab laa nug nukka nug, “Da onil ele,” dabmette, amge nug onig iitta, danab amu nug nukka nug oo buppuidtte.

⁴ Danab oh ag anen anen ahilag uɗat melemel mettan epeɗieg! Ag anam hena amu, ag ena hettebte o eheɗte hetteb dooglag. Danab nug anam hette amu, nug nukka nuhig kobolnu gamag ahakku. Nug danab laanu kobol amu nuhig kobol ele melemel ma aib epeɗiom.

⁵ Aɗinu? Danab oh ag anen anen ahilag uɗat amu maoglagnu dabmekkulag am ena.

⁶ Danab nug Kayak nai dookkunu ippunittak danab laa waappa daatte amu, nug nuhig keeke ena ohppanu laih nuhig ippunittak danab amu mettaɗ!

⁷ Laa nug ag buppualatteb dim lamidmananu dabmeig! Laa nug Kayak hambuppuidkkunu elele iitta. Amu inam. Danab nug ee tumu ebatte amu, geha dimppa ee tumu eppom amuib meu amu aokku; meu laa ii aoma.

⁸ Amubia danab laa nug beɗunu kobol haaha oitte amu, nug beɗu kobolnu meu nau, padal mak aokku. Amge danab nug Kayak Ouɗinu ehanittak awa aɗa, amuppa oiyaya, Ouɗi kobol amu dim lamitta oitte, Ouɗi Nug danab amu bauklel hanhannu metteb daakku.

⁹ Amunu ig kobol ena hekkunignu amu ebehinig aib bodoettom. Ig ebehinig bodo-ii-edakku amu, aria geha meu awak haenppa ig meu ena aakku aognig.

¹⁰ Amunu ig hanhan danab oh ehanadkkunignu ib anidta, ig ehanadtu! Amu ig Naɗinu ooppa genab doyak lainkad dilagppa kobol amubia hekkunignu dabmak aot autta aognig.

Bagqak nai

¹¹ Ag da nai dahil bagqekkulnu da eppelppanab yaak okkaippa geha iikku digmettem imu amu, ag neegna antteg!

¹² Danab laala ag onilag okkai ele daaglagnu hetteb, ag Galesia danab ag gaɗalag otaɗkkulagnu wagainab metteb ele amu, ag diig laippuppaib hetteb. Amuam inam. Ag danab laala ag Kristus ad emaitakppa ehanigkkunu mauhom oolagppa genab ii dootteb dabmenana, eheɗ hattamnanu gaɗa otaɗaknu nai amu huana maditteb.

¹³ Danab amu ag gaɗa otaɗak aoppig, amge ag ɗo tutukku dim ii lamidtteb. Danab amu ag ɗo tutukku ii dim lamidtteb, amge ag lailkad amelagppa ag akka ag onilag humaglagnu ag amunu ii dabmenana, ag ag Galesia daatteb eeɗatteg, ag gaɗalag otaɗkkulagnu hetteb. Ag ahilagppa hena, ag beɗulag amuppa ag onilag okkai aoglagnu hetteb.

¹⁴ Amge da keeke laa binag ii mepa. Iitta. Da Naɗi Jesus Kristus, Nug ad emaitakppa mauhom, da nuhig uɗat amu oh aakkuib da binag mekkul. Kristusnu ad emaitaknu ɠagattagppa amu, wan imuppan kobol da ii toniɗtteb. Da ele, da kobol amu dim lamidttem.

¹⁵ Danab nug Kristus Jesus ele ouqak daattep amu, nuhigppa gaɗa otaɗak kobol, o iitta gaɗa ii otaɗak kobol, aɗit amu oh am keeke hamu. Kayak Nug he, ig danab Kristusnu uɗat okkaippa bau menuak aot daattem amuib am keeke ena, keeke genabnab daatte.

¹⁶ Danab oh ag imunu dabmena, aon oolagppa mena, aɗan dim lamidna oitteb ele amu, da maɗoɗ, amu Kayaknu oo gai-iitta doya oo metta ehanittak kobol ele ahilagppa daakkunu ool daatte. Danab amu ag am Kayaknu danab, Israel daappig bia.

¹⁷ Aria, batakkulnu amu da danab laa nug gaɗa otaɗaknu nai amunu uug laa meɗakkunu, amu da ool ii daatte. Aɗinu? Danab ag Jesus onignu oiɗeg, duɗuppal da beɗulppa daatte, amuppa nai da attem amuam genab daatte ippunigtte.

¹⁸ O lailad, ihinig Naɗi Jesus Kristusnu ehanittak okkai hamu mettak ahilagppa dayaɗ! Genab!