Galesia 5 - Nobonob Baibel

Kristus nug am uhuqaknu diig

¹ Kristus Nug ig ɗonu maniguittak hippalikkakppanu uhuqikkom, ig uhuqak aot daattem, ig begbeg maɗi nid ii daattem amunu, ag ahan ɠagattag dayeg! Ag ɗonu maniguittakppa baula aib daappig.

² Doyeg! Da am Pol, amu da ag amelagppa attem. Ag am Kayak noobppa ena daaglagnu henana, ag ɗo dim lamidna, gaɗa otaɗak aoglag dayeb, geha Kristus uɗat heum daatte am ag ii ehanadma. Iittanab iitta.

³ Danab oh ag gaɗa otaɗak aotteb amu, da iikku miag amelagppa attem. Ag kobol amu hetteb amu, ag ɗo oh dim lamidkkulagnab aakkuib am elele.

⁴ Am ag ɗo dim lamidkkulag, amuppa Kayak Nug geha ahilagnu, “Genab tutukku hak danab,” awa akkunu dabmetteb amu, amuppa ag aakku Kristus uuppig, ag am Kayaknu ehanittak okkai hamu megatte amu, ag amuppa ii daatteb.

⁵ Amge ihinignu amu Kayak Ouɗi Nug ehanikkekke, ig ooppa genab doyak ihinigppa, ig Kayak Nug ihinignu, “Genab tutukku hak danab,” awa akkunu ameg metta, keeke amu bekkunu haen tapaɗidta daattem.

⁶ Danab nug Kristus Jesus ele ouqak daattep amu, nuhigppa gaɗa otaɗak kobol, o iitta gaɗa ii otaɗak kobol, aɗit amu oh am keeke hamu. Nuhigppa keeke laippuib am okkai daatte. Amuam danab nug ooppa genab doya, laa dilagnu oo mauhtte.

⁷ Anukka ag am ena oippig. Am aun nug ib oo ne, ag doyak diig genabib baula ii dim lamidtteb? Nug attem he, ag amu uuppig?

⁸ Kayak, Nug ag onilagppa eum ele amu, Nug dabmak ag gemu dim lamidtteb ele ag ii mattom.

⁹ Yis nakoknab he bret oh titiɗtte, ⌊amubia dabmak nau nakoknab, amuam heeb, ag oh padal memananu dabmeig⌋!

¹⁰ Da Naɗinu oolppa genab doottem, amubia Nug ag ehanatteb, geha ag nai da amelagppa attem imu dim lamidna, ag geha dabmak laa amu ii aɗaglagnu oolppa genab doottem. Amge danab auntai nug ag kaboliadkkunu hette amu, nug geha nuhig eheɗ haknu nob nau aokku.

¹¹ O lailad, genab da danab ag gaɗalag otaɗkkulagnu nai mehuqttem dayeb amu, aɗinu laala ag da eheɗ heiɗtteb? Am da nai anam mehuqlom, da ig padal mematanu ehanittak Jesus ad emaitakppa mauhomppanu aottem mehuqlom, laa ag dahil nainu dabmak eheɗ aolobte? Iitta.

¹² Am danab ag heeg, ag Galesia danab ag kaboliadtteb ele amu, danab nau amu ag, ag Galesia danab uuadna gokkulagnu, tamaniak ooppa ii daaglagnu, ool okkai daatte.

¹³ Genab O lailad, Kayak Nug ag uhuqak daaglagnu onilagppa eum, amge ag ahilag dabmakppa aib inam appig. “Ig uhuqak elele daattem amunu, ig beɗunu kobol ele hekkunig.” Ag anam aib appig, amge ag lailkad dilagnu oolag mauheb, ag oh nug dabmattanna ehanatteg!

¹⁴ Aɗinu? Ɗo oh amu nai laippu imu ooppa daatteb. “Na nakka nahipnu oot mauhtte, amubia na laipad dilagnu ele oot mauhaɗ!”

¹⁵ Amge ag oolagppa akka akka naippa nug qemananu, ag nug emalak hemananu amu dabmeig! Ag anam hekkulag am ag oh padal mekkulag!

Kayak Ouɗinu kobol, amu oo alagnu kobol ele

¹⁶ Da inam attem. Kayak Ouɗi Nug oiyak ahilag gumebeb, ag Nug dim lamidna oiyeg! Ag anam hena amu, ag beɗunu kobol ii dim lamidmana.

¹⁷ Beɗunu kobol amu Kayak Ouɗinu kobol ele aa laippu iitta, aa piɗe piɗe amunu, Kayak Ouɗi Nug beɗunu kobol guhuɗittette, beɗu amu Kayak Ouɗi guhuɗidtte. Anam daatte amunu, ag keeke laa hekkulagnu oolag unuqagppa daatte amu, ag elele iitta.

¹⁸ Anam daatte, amge ag Kayak Ouɗinu ehanittak aon oitteb dayeb, ag ɗo dim lamittak uɗat amu ii hemana.

¹⁹ Ag beɗunu kobol amu ag aakku dootteb. Amu inam. Gappai kobol digdig, kobol dubuttid ele, hipaɗu ahak kobol,

²⁰ kayak hambuppuak binag mak kobol, onig awak kobol, laanu nau ninig ele doyak kobol, heqoppa qak kobol, laanu dahilppa anam daalon dabmak aɗa dayak kobol, oppoɗi be ameg kokoɗ eppak kobol, akka akka ahilagnuib dabmak awak kobol, nug qak kobol, huu obatak kobol,

²¹ laanu ameg qe oo elele ii dayak kobol, le ɠagattag la kaaka qak kobol, goɗak qiɗ nau ele hak kobol, amu hak nau iɗu iɗu ele aakku daatte. Da anukka ag amelagppa ami, amu gemu baula ag amelagppa attem. Danab oh ag kobol amu hetteb amu, ag Kayaknu ɗo maɗoɗ ii aomna.

²² Beɗunu kobol am aakku, amge Kayak Ouɗi Nug he, oiyak ihinigppa meu laala imu bette. Oo mauhak kobol, maɗoɗppan gamag ahak kobol, maɗoɗ dayak kobol, dagom kobol, oo bodoettak kobol, ena hak kobol, oo metta ii uuak kobol,

²³ oo bodoetta wagai mak iitta kobol, laa nug nukka nug nuhig oiyak pehettak atognoak kobol ele. Kobol amunu oh, amu haknu ɗo laa ii daatte.

²⁴ Kristus Jesusnu danab oh ag oolag alag, nuhig beɗunu kobol amu oo ahak nau kobol ele oh ad emaitakppa atulppig daatteb.

²⁵ Kayak Ouɗi, laa iitta, Nug ig bau megatte, diig amunu ig Nug waappa ele daatu!

²⁶ Ig aɗi kobol hepput, ig lainkad oo nauhak dooglag amu, ig kobol amu ii hemata. Ig laa dilagnu ameg qe oo elele ii dayak kobol ele ii hemata. Ig amubia ii hetata amu, ig dada kobol ele aib hemut.