Galesia 4 - Nobonob Baibel

¹ Aria tuɗittaknu amu, nid nug mamegnu keeke oh aokkun daatte, nug keeke amu oh gumakkunu daatte, amge haen nug danab ii meum, nug begbeg maɗi nid bia daatte.

² Nug gumak danab laala waalagppa daye ukke, dimppa mameg nug abenab aokkunu haen metta tituanom amuppa nug aben amu aotte.

³ Anambianab, digmakppanu uɗie, Kristus nug uɗia, uɗat naɗi nuhig ha malomppa batak, ig wan imuppan danab ah oh ig nid naunau daat, ig wan imuppan ɗo waappa begbeg maɗi nid daat oidmut.

⁴ Am anam daye ukkom, amge haen Kayak aum amu elele mette, Kayak Nug Bekka me ne, ah nug menue, Nug ɗo waappa ba dayom.

⁵ Nug ig ɗo waappa daamut, ig amunu qagaiettakppanu eɗua uhuqak ha mekkeb, ig Kayak bekkodnab beta daagnignu anam heum.

⁶ Gemu ag Kayak bekkod daatteb amunu, Kayak Nug Bekka Jesusnu Ouɗi me, Nug ig oonigppa dayaya ehanikke, ig Kayak amegppa, “Mame, Mame!” attem.

⁷ Anam amunu, na baula begbeg maɗi nid ii daattem. Iitta. Na nuhig nid daattem. Am Kayak Nug na awittom, na Nug bekka daattem amunu, Nug bekkod keeke aoglagnu aum amu na aokkutnu daattem.

Pol nug Galesia ag eheɗ gomanu dabmak okkai awom

⁸ Genab, anukka amu ag Kayak ii dooppig amunu, ag kayak bau iitta, keeke Kayak heum ele, ag amu dilag begbeg maɗi nid daappig,

⁹ amge gemu ag Kayak dooppig (da Kayak Nug ag doyadtte alom am ena) amunu, aɗinu ag eɗun bittumttum gona, wan imuppan ɗonu hik aqeeqe, ag eɗun uɗat nob iitta, hamu begbeg maɗi nid uɗat hekkulagnu hetteb?

¹⁰ Ag Kayak noobppa ena daaglagnu ag hanhan deɗ okkai amu kalam bau bak, mettid okkai amu maɗ bau ele anidna, amuppa gun mena daatteb. Amu elele iitta.

¹¹ Ag anam hetteb amunu, da ahilagnu uɗat okkai hemi ele, da amunu, “Da hamutai kakidmi,” ainne, baɗe daattem.

^12-13 O lailad, da ag oitteb bia oimi amunu, gemu ag da oittem bia oiglagnu unuqadttem. Ag dootteb, da tatam digmein, Nai Ena ag amelagppa mehuqmi ele, haen amuppa da oɗe ele amunu, da ahilagppa nai mehuqmi, amge haen amuppa ag diig amunu ag dahilppa eheɗ laa ii heppig.

¹⁴ Genab, oɗe dahilnu amu ag amunu uug maoppig, amge ag da ii guhuɗilppig. Iitta. Ag da ag ele laippu dayaknu oolagppa eleleib doon, ag Kayaknu engel laa aolob, amubia da awiɗppig. Ag Jesus Kristus Nugnab aolob, anam bia ag da awiɗppig.

¹⁵ Oo maɗoɗppan gamag ahak ahilagppa dayom, amuam gemu adep meppig? Da genab ag amelagppa kobol ahilag ena amunu attem. Haen amuppa ag amelag kehaknu elelelob amu, aria ag kehan da amelppa melob.

¹⁶ Gemu da nai doyak diig genabibppanu ag amelagppa attem amunu, diig amunu ag dahilnu, “Nug ihinig kekeɗ beum daatte,” attebte?

¹⁷ Genab, danab laala ahilagppa uɗat hetteb amu, ag wagai mena eeɗadkkulagnu amelag qagatteb, amge nai ittag amuam kobol enappa ii gotte. Danab amu ag heppeg, ag Galesia danab ag ig ele ouqak ii daapput, ag Galesia ag eɗun danab amu binalag mekkulagnu hetteb.

¹⁸ Am ig Nai Ena dim lamidkkunignu, kobol ena ele hekkunignu wagai mekkunig am ena. Ag haen oh, ig ouqak daattem, ouqak ii daattem ele amu, ag anam hekkulagnu am ena.

¹⁹ O nid dahilad, da ag Kristen bekkulagnu guittak naɗi, ah nid menukkunu guittak dootte, amubia doomi, amu gemu da ag Kristus daatte bia bekkulagnu guittak amubia baula doottem.

²⁰ Gemu da ag ele oh daatta, da oɗelppanab ag amelagppa nai mattilomnu ool daatte. Aɗinu? Gemu da ahilag kobolnu amu dabmak kuɗum aottem.

Hagar Sarah ele dilah nai

²¹ Ag Galesia danab, ag eɗun ɗo waappa daaglagnu hetteb ele amu, ag gemu appeg doyei! Ag ɗo nai atte amu ag iitai dootteb?

²² Kayak naippa yaak laa Abrahamnu amu inam daatte. Abraham nug bekoɗ aɗit; begbeg maɗi ah nug laa menue, amu Sarah, nug am begbeg maɗi ah iitta, nug nid laa menuom.

²³ Ismael anig, nug am begbeg maɗi ah, nug danab ah menuak kobolppa Ismael menuom. Aria Abraham, Sarah ele, aa nid menuglahnu elele iitta, amge Kayak Nug aa nid danab menuglahnu nai qakka ana he, diig amunu, aa nid menuglahnu elele daayya, Sarah nug nid amu menuom.

²⁴ Amunu kaya amuppa ig keeke laa anidkkunignu elele. Ah aɗit amu aa nug tituana nai qakkak aɗit ippunigttep. Laa am Sainai qaukoppa ɗo nai Moses nug Kayak eppegppan awom. Nug tituana nai qakkak amu, begbeg maɗi ah Hagar bekkod ɗo waappa begbeg maɗi nid daatteb, am anam ippunigtte.

²⁵ Hagar nug Arebianu qauko laa Sainai, nug amu ippunigtte, amu amuppa nug danab ag Jerusalem appa gemu daatteb, ag ɗo waappa begbeg maɗi nid daatteb, am amunu ippunigtte.

²⁶ Amge Jerusalem laa, Sarah amu ippunigtte amu, amuam hab attan daatte, am Kayaknu. Nug am maɗi ah iitta. Nug ig Kristen, ig aninig aakku daatte.

²⁷ Kayak naippa amunu nai laa inam daatte. “Ah na oot keldoak, na nid menuaknu laa iitta, na gaman ahaɗ! Ao, ah na nid awaknu guittak deɗ laa ii doome ele, na ootppa ena doon, oɗen oppatna ekkut! Aɗinu? Ah gemu nukkanab daatte, Nug am nid kuɗumnab, ebqak ahilag amu ah gamu ele, nid ahilti dilag ebqak eɗittak ele daakku.”

²⁸ O lailad, ag am Aisak bia. Kayak Nug Aisak dokkunu nai qakka a, nug doum, amubia ag Kayak, nuhig naippa ag Nug bekkod beppig.

²⁹ Amge Abrahamnu haenppa, nuhig nid laa, nug anig danab ah nid menutteb kobolppa menuom ele, nug am nid laa amu eheɗ heittom. Nid nug eheɗ heittom ele amu, nug anig Sarah, nug Ouɗi ɠagattagppa menuom. Gemu ele eheɗ heittak kobol anamib aakku daatte.

³⁰ Amge Kayak naippa nai amunu aɗi atte?. “Begbeg maɗi ah amu, nug bekka ele lamatppe ukkeɗ! Aɗinu? Begbeg maɗi ah amu bekka nug aug maha nakok laa iinab aoma. Wau, nug begbeg maɗi ah iitta, nug bekka, nug nukka aokku.”

³¹ Anam amunu o lailad, ig am begbeg maɗi ah bekkod iitta. Iitta, Ig am ah nug begbeg maɗi ah iitta, ig ah amu bekkod daattem.