Galesia 3 - Nobonob Baibel

Ɗo dim lamittak, o ooppa genab doyak kobol dilah nai

¹ Galesia ag am dabmak tutukku iitta danab. Da Jesus Kristusnu ag amelagppa mattiiyi, ag geha aakku Nug ad emaitakppa atuleg dayeye anidppig bia dooppig. Amu aun nug he, gemu ag ahilag dabmak am kaboliak daatte?

² Keeke laippuib da ag oɗ madappi ag appeg doyei! Ag Kayak Ouɗi aoppig amu, ag attem hena Nug aoppig? Ag ɗo dim lamidna aoppigte? O iitta ag Nai Ena doona oolagppa genab dooppig, ag amuppate ag Kayak Ouɗi aoppig?

³ Dabmak tutukku iitta am genab aqomte? Ag Kayak Ouɗinu ɠagattagppa uɗat digmeppig amu, gemu ag akka ahilag ɠagattagppa uɗat malan, elelenab bekkulagnu hettebte?

⁴ Anukka ag keeke ena aoppignu amu, gemu ag amu daulag atie, paɗaeg ne, meu ii ottete? Genab o genab iitta ag keeke ena amunu hamu doona paɗappigte?

⁵ Ib attenppa Kayak Nug nuhig Ouɗi ag matta, ag oolagppa kobol danab hekkunu elele iitta laala hette? Nug ag ɗonu uɗat hetteb, amuppa Nug anam hettetai? O iitta, Nug ag Nai Ena doon, ag oolagppa genab dooppig, ib amuppa anam hettetai? Ib laa iitta, Nug ooppa genab doyak aguppaib hette.

⁶ Amuam Kayak naippa Abrahamnu yaak daatte amubia. Nai amuam inam. “Abraham nug Kayaknu ooppa genab doyom amunu, Kayak Nug Abrahamnu ooppa genab doyak antta, Nug nuhignu, ‘Nug am genab tutukku hak danab daatte,’ ” awa aum.

⁷ Anam daatte amunu, ag doyeg! Danab ag Jesusnu oolagppa genab dootteb ele, danab amu ag am Abraham bekkodnab.

⁸ Am Kayak Nug anukka iitta aɗi ag geha Nai Ena aona, ag oolagppa genab dooppeg, ahilagnu Nug, “Genab tutukku hak danab,” akkunu doya he, nai amunu nuhig naippa yaak daatte. Nug anam doyom amunu, Nug anukka Abraham amegppa Nai Ena mehuqa, inam aum. “Wanppan wan ohppan danab ah ag nahip-ppa itittak ena aoglag,” awa aum.

⁹ Amunu danab ag oolagppa genab dootteb ele, ag Abraham, nug am danab ooppa genab doyak ele, ag nug itittak ena awom bia aotteb.

¹⁰ Amge danab ag genab tutukku hak danab bekkulagnu amu, ag, “Ig ɗo dim lamidta genab tutukku hak danab bekkunig,” dabmenan atteb ele, danab amu ag eheɗ laa awaknu anak waappa daatteb. Aɗinu? Kayak naippa nai amunu inam daatte. “Danab oh ag nai huppu oh ɗo yaak bukppa daatte tutukkunab ii dim lamidna, oh elele ii hena amu, ag eheɗ laa awaknu anak waappa daatteb.”

¹¹ Laa ele amu Kayak naippa yaak laa daatte am inam. “Laa nug Kayak noobppa genab tutukku hak danab daatte, nug Kayaknu ooppa genab dootte amunu, nug bau daakku.” Anam daatte amunu ig imu doottem, danab laippu laa ɗo dim lamidtte, Kayak Nug danab amunu, “Genab tutukku hak danab,” akkunu amu ib laa iitta.

¹² Ɗo dim lamitta genab tutukku baknu kobol diig am oonigppa genab doyak iitta. Iitta. Kayak naippa kobol amu diignu nai inam daatte. “Danab nug dahil ɗo anam dim lamidkku dayeb, amuppa nug bauklel daakku.” Amuppa ig ɗo nug am uɗatnu keeke anidttem.

¹³ Ɗo ig eheɗ laa awaknu anak waappa daattemnu atte, amge Kristus Nug Kayak naippa yaak, “Danab oh ag ad attan aihadtteb ele, danab amu ag eheɗ laa awaknu anak waappa daatteb,” Nug nai amu attenu qagaiettak awa, amuppa Nug qagaiettak amuppanu eɗua uhuqak ha megakka, nob nau amu awa ehanikkom.

¹⁴ Kayak Nug Abraham itittak ena mettom amu, Nug itittak ena amu aakkuib Kristus Jesusnu uɗatppa, Nug iitta aɗi ele madakkunu, ig Kristen oh ig Nai Ena doout, oonigppa genab doottem, amuppa ig nuhig Ouɗi megakkun nai qakka aum amu, ig Nug aognignu, Kristus Jesus Nug ig ihinig hipuninnu qagaiettakppanu eɗua uhuqak ha mekkom.

Ɗo nai, Kayak nai qakkom ele dilah nai

¹⁵ O lailad, gemu da ig danab ihinig kobol daatte amuppanu da antte oo maittak nai laa attem. Danab laa nug geha dimppa mauhkku amu, nug amunu dabma, nug enub oh bekkod aoglagnu nug nuhig dabmakppa elele otia, anen anen aɗi aoglagnu nug tituana nai qakkaknu uɗugppa yeeb, danab laa ele nai amu antta onig yeeb amu, danab laa nug nai amu ii qeeb nema; o laa nug nai amu baolia nai laa ii tuɗidma.

¹⁶ Aria Kayak Nug dimppa keeke ena bekkunu Abraham amegppa nai ana qakka, nug, “Da na buɗun ele nai ana qakkak iikku hettem,” awa aum. Nug Abraham, buɗub amu ele, ahilahnuib nai ana qakkaknu aum. Nug buɗub oh amelagppa ii aum. Iitta. Nug buɗub laippunuib amegppa nai ana qakkom, amu nid amu Nug am Kristus.

¹⁷ Nai dahil imu, nuhig diig amu inam. Kayak Nug tatam nug tituana nai qakkakppa Abraham amegppa keeke laa heeb bekkunu nai qakka aum. Dimppa maɗ 430 ukke amu, aria ɗo beum. Ɗo amu dim beum. Ɗo amuam Kayaknu nug tituana nai qakkak amu qeeb nekkunu elele iitta. Nai qakka aum ele amu, ɗo nug amu loppaɗkkunu ele elele iitta.

¹⁸ Am ig ɗo dim lamittak kobolppa keeke ena, Kayak ig aognignu tituanikkom ele amu, ig amuppa aognignu elele daalom, aria, ig doottem, keeke ena amu nai qakka anakppa ii aolom. Amge anam iitta. Kayak Nug ehanittak okkai hamu mettak kobol dim lamittatta, Abraham amegppa nug keeke aokkunu nai qakka aum amunu, Nug mettom.

¹⁹ Aria, aɗinu Kayak Mosesnu ɗo meum? Amuam iikku. Kayak Nug hipunin diig geha miag atikkunu oo dayom amunu, Nug Abraham amegppa nug keeke aokkunu nai qakka aum dimppa, Nug ɗo amu aakku he beum. Amu ɗo nug dayeb ukkeb, geha Jesus bekku, amu batak daakkunu meum. Kayak a, engel ag Moses ɗo ippunitteg, nug gamag danab dayaya ɗo awa, danab ah ippuanattom.

²⁰ Aria gamag danab nug danab laippu nug nai nuhig qakka keeke laa hekkunu atte amu, gamag danab nug haen amuppa uɗat laa ii hette. Iitta. Danab aɗit o ewam keeke, ag nug tituana nai qakkak hekkulagnu hetteb dayeb amu, gamag danab nug daakkunu elele amunu, Moses nug gamag danab dayeye, Israel ag ɗo aoppig. Amge haen Kayak anukka Abraham amegppa nai qakka, keeke laa hekkunu aum, haen amuppa Kayak nukkaib nai amu keeke hekkunu qakka aum.

²¹ Anam amunu, ɗo nug am Kayak anukka nai qakka aum ele, amunu kekeɗte? Iittanab iitta! Aɗinu? Ɗo am danab bauklel mattaknu ii daatte. Ɗo laa ig danab bauklel megakkunu daalo amu, ig ɗo amu dim lamidpput, Kayak Nug ihinignu, “Genab tutukku hak danab ah,” akkunu elele, amge ɗo laa anambia ii daatte.

²² Amge Kayak nai danab oh hipunin waappa daatteb ippunigtte amunu danab oh, ag Jesus Kristusnu oolagppa genab dootteb ele, Kayak Nug keeke madakkunu Abraham amegppa nai qakka aum ele amu, ag aoglagnu elele daatteb.

²³ Jesus Kristus Nug ii nak haenppa, ɗo nug ig hippalikke, ig nuhig uɗat heutut ukke, Jesus Kristus Nug uɗia he, ig Kayak noobppa genab tutukku hak danab daagnignu ib laa, amuam ooppa genab doyaknu ib, ib amu aakku miag atiom.

²⁴ Ɗo nug am gumikkak danab ihinig bia, nug ig omaikka, Kristus toppa wab, ig Nai Ena oonigppa genab doopput, Kayak Nug ihinignu, “Genab tutukku hak danab,” awa akkunu dayom.

²⁵ Gemu Jesus Kristus Nug uɗat nuhig ha malom daatte, nuhignu ooppa genab doyaknu ib aakku daatte amunu, ɗo nug baula gumikkak danab ihinig ii daatte.

Ooppa genab doyakppa Kayak bekkod dayaknu nai

²⁶ Ag oh Kristus Jesusnu oolagppa genab dooppig amunu, ag Kayak bekkod daatteb.

²⁷ Ag Kristus ele ouqena, Nug onigppa layattak aoppig amu, ag Kristus oiyom bia oiglagnu daatteb. Ag oh Kristus ele ouqak daatteb.

²⁸ Amunu gemu Juda danab, Grik danab ele, begbeg maɗi nid, begbeg maɗi nid iitta ele, danab amu ah ele, ag oh elele eleleib daatteb. Ag oh Jesus Kristusnu daan, laippu daatteb.

²⁹ Amu ag Kristusnu daatteb dayeb amu, aria ag am Abraham buɗub aakku daatteb amunu, ag aakku Kayak Nug anukka Abraham amegppa keeke laa heeb bekkunu nai qakka aum amu, ag amu aoglag.