Galesia 2 - Nobonob Baibel

Totol danab laa Pol ele oolag laippu dayom

¹ Da anam hei ukke, maɗ 14 uue amu da Barnabas ele i oh eɗuɗ Jerusalem goɗa, da Taitus ele omali, ig oh gomut.

² Kayak Nug da ippuniɗe, da aakku gomi. Da inam dabmemi. “Da ⌊Jerusalem tamaniak⌋ anuqak danab amelagppa, da iitta aɗi oolagppa Nai Ena mehuqttem amu da amunu ii akkul amu, uɗat da gemu hettem imu, uɗat tatam hemi ele amu, uɗat amu oh hamu ukka qettoɗkkutai.” Da anam dabmemi amunu, da ukkai, anuqak danab amu appa daappig ele, da ag akka aakkuib ele daatta, da amu ippunadmi.

³ Ag Nai Ena da mehuqttem ele amu, ag amunu eheɗ doon aib akkulagnu baɗami, amge iitta. Ag ena doona, Taitus nug da ele daamuɗ, nug am Grik danab amunu nug am gaɗa otaɗak iitta, amge qagmakppa ag nug gaɗa otaɗak aokkunu ii appig.

⁴ Nai imu beumnu diig am, ihinkad laa, ag gaɗalagib Kristen, ag qagmakppa ii uɗilob amge ag oqeqaɗak uɗin, ag lokkumakppa nai italak danab daanna, ag Kristus Jesus uhuqak mekke, ig qakkak iitta daattem anidkkulagnu hena, ag awigna, ɗo waappa begbeg maɗi nid daagnignu meigkkulagnu heppig.

⁵ Amge ig Nai Ena ag iitta aɗi, ahilagppa hanhan daakkunu oonig dayom amunu, ig gaɗalag Kristen dilag nai amu nakoknab laa ii dabmemut.

⁶ Aria danab da ele nai mattimut, ag da nai mehuqttem ele amu, ag nai amu ii tuɗidppig. Eleleib dooppig. Danab laa ag amu dilagnu, “Danab okkai,” atteb, amge amuam genab o genab iitta, da amunu dab-ii-mettem. Aɗinu? Kayak Nug danab dilag neekkakppa danab laanu, “danab onig ele,” laanu, “danab onig iitta,” Nug dabmak amu dab-ii-mette.

⁷ Danab amu ag nai dahil ii tuɗidppig. Iitta. Ag dooppig, Kayak Nug Pita Juda oolagppa Nai Ena mehuqkkunu meum bia, da Nai Ena, iitta aɗi amelagppa mehuqkkulnu meiɗom.

⁸ Ao, Kayak Nug Pita ehanitte, nug Juda oolagppa totol uɗat heum, amubia Kayak Nug da ehaniɗe, da iitta aɗi oolagppa totol uɗat hemi.

⁹ Jems, Pita, Jon ele, laa ag ahilagnu, “Ag am ikki danab,” aon atteb amu, ag Kayak Nug ehanittak okkai hamu megatte amuppa Nug da uɗat imu hekkulnu meiɗom dooppig. Ag anam dooppig, amunu ag da Barnabas ele i eppenih aɗaeg, ig oonig laippu meta, da Barnabas ele i am iitta aɗi oolagppa uɗat hebupuɗ, ag am Juda danab oolagppa uɗat hekkulagnu amut.

¹⁰ Ig anam atata, ag i daɗek danab dilag tuɗidɗa dabmekkunihnu aakkuib appig. Keeke amunu amu, da ool huana hette, da amu hekkulnu da uɗat ɠagattag heinne daattem.

Pol nug Pitanu eheɗ hak miag atiom

¹¹ Ig anam hemut, amge Pita nug Antiok uɗie, da nug noobppa nug eheɗ heumnu ai doyom. Aɗinu? Nug eheɗ imu heum.

¹² Nug Jems laikkud laala Antiok ii beppig haenppa amu, nug iitta aɗi danab ele daanna, oh ee lappig, amge danab amu ag beeg amu, aria nug danab amu, ag am gaɗa otaɗak kobolnu ɠagattag dabmetteb ele amu, nug ag baɗatta, iitta aɗi ele daappig amu eɗua uuatta, laikkudib ele daappig.

¹³ Pita anam he amu, Juda danab laala ele ag nug ele kobol hambuppuak amu heppig. Am ag kobol hambuppuak dim lamitteg ukke, Barnabas ele nuhig dabmak eɗue, kobol amuppa noum.

¹⁴ Aria, ag Nai Ena ippunigtte amubia ii oippig anidmi amunu, da ag noolagppa Pita amegppa ami. “Na Juda danab, amge na iitta aɗi ⌊ag Kristen daatteb, amge ag Juda dilag dimittimnuib ɗo oh ii dim lamidna oitteb amu,⌋ na ag oitteb bia oittem. Anam amunu, na attem hena, na gemu iitta aɗi, ag Juda kobol amu dim lamidkkulagnu ɠagattag hettem?

¹⁵ Am genab, ig ihinig menuakppanu Juda danab daattem amu, ig iitta aɗi, laa ag ahilagnu, ‘Ag am hipunin danab’ atteb amu, ig ahilag menuakppanu iitta.

¹⁶ Amge ig doottem, Kayak Nug danab ɗo dim lamidtte ele, Nug diig amunu danab amunu, ‘Genab tutukku hak danab,’ ii atte. Iitta. Danab nug Jesus Kristusnu ooppa genab dootte amu, danab amunu aakkuib Kayak Nug nuhignu, ‘Genab tutukku hak danab,’ awa atte. Am ig ele, ig Kayak noobppa, Kristus Jesusnu ooppa genab doyakppa, ig ɗo dim lamittakppa iitta, ig genab tutukku hak danab daagnignu Kristusnu oonigppa genab doomut. Aɗinu? Danab laa nug ɗo dim lamidtte, diig amunu Kayak Nug danab amunu, ‘Genab tutukku hak danab,’ atte laa iinab daatte. Iitta.

¹⁷ Aria, ig Mosesnu ɗo oh dim lamidta, genab tutukku hak danab bekkunignu elele iitta, amge ig Kristusnu oonigppa genab doottem amunu, Kayak Nug ihinignu, ‘Genab tutukku hak danab,’ atte. Amu ig ib amuppa genab tutukku hak danab daattem dayeb, ig haen amuppa ig iitta aɗi ag Mosesnu ɗo laala tippaltteb, amubia tippalttem dayeb amu, ig, ‘Kristus Nug hipunin hekkunignu eeɗikkom,’ akkunigte? Iittanab!

¹⁸ Da danab nug ɗo dim lamittakppa genab tutukku hak danab bekkun daattenu dabmak loppaɗmi dayeb, dimppa da eɗuen, ib amuppa danab nug genab tutukku danab bekkun daatte akkul dayeb, da aakku ib apiɗidmi.

¹⁹ Ɗo nug da iwe mauhmi, nug gemu da ii hippaliɗtte; diig amunu amu, da Kayak waappaib daakkulnu daattem.

²⁰ Da Kristus ele oh ad emaitakppa aihlop bia mauhmi amunu da gemu bau ii daattem. Iitta. Kristus Nug da oolppa bau daatte. Anam daatte amunu, dahil oiyak wan imuppa oh amu da Kayak Bekkanu oolppa genab doyeye oittem. Nug dahilnu oo mauhe amu dahilnu ele mauhom.

²¹ Da Kayaknu ehanittak okkai hamu megatte ele, da amunu keeke hamu bia ii doottem. Am ig danab ig ɗo dim lamidta, genab tutukku hak danab bekkunignu elele daalom amu, Kristus Nug ihinignu mauhom amu Nug aakku hamu mauhlo.” Da anam Pita amegppa ami.