Galesia 1 - Nobonob Baibel

Nai Ena laippu daatte

¹ Da Pol, da am Jesusnu totol danab. Da am danab dilag totol iitta. Laa ele amu, danab laa nug da Jesusnu totol uɗat hekkulnu ii meiɗom. Iitta. Jesus Kristus amu ig Mamenig Kayak, Nug Kristus moɗppanu bau maɗettom ele amu, Nug ele, aa aakkuib da meiɗpiɗ.

² Da lailad oh, da ele daattem ele, ig uɗug imu ag Kristen tamaniak Galesia appa daatteb, ahilagnu yaattem.

³ Kayak, ig Mamenig, amu Naɗi Jesus Kristus ele, ahilah ehanittak okkai hamu mettak, amu ahilah maɗoɗ ele ahilagppa daaglahnu oonig daatte.

⁴ Kristus Nug Kayak, ig Mamenig, Nug oo dayom amu dim lamitta, Nug ihinig hipunin uhuqa megakkunu, Nug nukka bau dayak nuhig uua, ad emaitakppa mauhom. Nug anam heumnu diig am, Nug ig kobol nau, gemu wannu haen imuppa daatte, amu waappa ii daamtanu heum.

⁵ Binag amahlak oppiaawak ele hanhan alet ele Kayak nuhigppa dayaɗ! Genab.

⁶ Ag Galesia ag kobol hettebnu amu, da ottaie, dabmak kuɗum aottem. Kayak Nug ag Kristusnu ehanittak okkai hamu mattomppa ag onilagppa eum amu, ag pahanab Nug uuna, ag Jesusnu Nai Ena dimettan, ag nai laa, danab laala ag gona mehuqeg doona, ag nai laa amunu ag, “Nai ena,” aon atteb ele, ag nai amu dim lamidtteb.

⁷ Amge Nai Ena laa ii daatte. Iitta. Amge danab laala ag heeg, ahilag dabmak kabolie, danab amu ag Kristusnu Nai Ena eɗuegeg, ib laappa gokkunu hetteb.

⁸ Ig Nai Ena anukka ag amelagppa mehuqmut, amge gemu ig nai amubia iitta, ig nai laa mehuqkkunig dayeb, o iitta hab attannu engel laa nug Nai Ena anukka ig ag amelagppa mehuqmut, nug nai amubia iitta mehuqkku dayeb amu, aria laa amu hette amu, nug eheɗ laa awaknu anak waappa dayaɗ!

⁹ Da ag amelagppa ami, amubia da aakku baula attem. Am danab laa nug nai laa, Nai Ena anukka ig ag amelagppa mehuqut aoppig amubia iitta amu, nug ag amelagppa nai laa amu mehuqeb, aria nug eheɗ laa awaknu anak waappa dayaɗ!

¹⁰ Nai da gemu attem imu amu danab ag dahilnu oolagppa ena dooglagnute attem? Iitta! Da Kayak Nug dahilnu oo ena dookkunu hettem. Da am danab ag oolag ittag qekkunuib hettemte? Am da danab ittag qekkunu hettem dayeblob amu, aria da Kristusnu maɗi nid iitta daalom.

Pol nug totol danab beumnu nai

¹¹ O lailad, da tutukku ag amelagppa iikku attem. Nai Ena anukka da ag amelagppa mehuqmi amu, danab laa he nai amu ii beum.

¹² Da danab laa nuhigppanu ii aomi. Laa ele amu, danab laa nug da amu ii ippuniɗom. Iitta. Jesus Kristus Nug nukka da ippuniɗom.

¹³ Am da kobol anukka, haen da Juda dilag kobol dim lamittette, kobol hemi amu, ag amu dootteb. Kayaknu Kristen tamaniak danab eheɗ hattak danab nau am da iikku; ag iitta mekkulagnu da wagai mein hemi.

¹⁴ Da lailad oolagppa, danab bau kuɗum da ele huu laippu amu da ag eɗatte, da Juda dilag kobolnab dim lamidmi. Da alalad aɗi dilag kobol amu, da amu oh ɠagattagnab dim lamidkkulnu hemi.

¹⁵ Amge Kayak, Nug anai da ii menuiɗom haenppa da tituaniɗa, nuhig ehanittak okkai hamu megatte, amuppa Nug da onilppa eum amu, haen amuppa Nug nukka dahilnu dabma,

¹⁶ Nug da Nug Bekkanu Nai Ena iitta aɗi amelagppa mehuqkkulnu Nug Bekka da ippuniɗom, amge da haen amuppa aɗi nai mehuqkkulnu danab laala ele nai ii mattimut.

¹⁷ Amu danab tatam ag Jesusnu totol danab daappig amu, da ag gumatte Jerusalem ii gomi. Iitta. Da Arebia wanppa gomi. Ukkoya dimppa am da eɗue Damaskus gomi.

¹⁸ Aria, dimppa maɗ ewam ukke amu, da Pita ele nai mattignihnu Jerusalem gomi. Am da Pita ele deɗ 15 daamuɗ,

¹⁹ amge da Jesusnu totol danab laa ag ii anadmi. Da Jems, Naɗi amag, nugib da anidmi.

²⁰ Nai imu gemu da ahilagnu yaattem amu, da Kayak noobppa nai genab attem, da ag ii buppualadttem.

²¹ Amu dimppa amu da Siria prowins, am Silisia prowins, amu dilagppa ele gomi,

²² amge Juda Kristen tamaniak, ag Kristusnu daatteb amu, ag da ii dooiɗppig.

²³ Ag nai inam aakkuib mattieg dooppig. “Anukka danab nug ig eheɗ heikkom, nug aun aɗi ag ooppa genab doyak ele, ahilagnu eheɗ heum amu, gemu nug Nai Ena amu mehuqtte,” anam appig.

²⁴ Kayak Nug dahilppa anam he, ag nai doonna, ag Nug onig humappig.