Esta 8 - Nobonob Baibel

Juda ehanattaknu ɗo

¹ Deɗ amuppaib King Ekserksis nug Haman, Juda dilag kekeɗ, nug keeke nug gumom ele Kuin Esta mettom. Esta nug Mordekai ele aa laippuppanu daattep, nug amunu mattie king doyom amunu, ag Mordekai omalna king toppa goppig.

² King nug nuhig doyaknu at ringppa daatte, nug ring amu eppeg doɗoppanu awa, Mordekai mettom. Nug anukka ring amu Haman mettom, amge ag nug qeppeg mauhkkunu dayeye, nug uɗitta eɗua awa, gemu Mordekai mettom. Esta nug keeke Haman gumom ele oh am Mordekai gumakkunu otiom.

³ Amu dimppa, Esta nug baula king amegppa nai mattiaya, nug king baegppa dup noa, gayaya, oo doyak ele king unuqitta, nug amegppa, Hamannu nau hak, Juda dilagppa hekkunu maittom, amu ii bemanu oɗ mettom. Haman nug am Agag buɗuppan.

⁴ Esta anam he, akku king nug Esta, nug kingnu qakun golppa hak nug mettom amunu, nug aha, nug noobppa hibaitta

⁵ amu, nug aum. “O king, na da ool daattenu oot ena daakku dayeb, na dahilnu ena doottem dayeb, amu na da madikkulnu hettem imunu ele ena dookkut dayeb, ge na dahilnu oot ena daatte dayeb amu, na ɗo nai laa bappaidkkutnu oɗ medattem. Ɗo nai amuam Agag buɗub, Haman, nug Hamedata bekka amu, nug Juda danab oh prowins oh na gumattem, appa daatteb, Haman ag mauhkkulagnu maittak awom ele amu, ɗo nai amuam maittak amu bemanu ib keldoaknu daakku.

⁶ Aɗinu? Na amu ii hekkut dayeb, laa ag dahiladnab, dahilad danab ah ele aqappeg mauhkkulag dayeb amu, da attem antten dookkul?” awa aum.

⁷ Anam a amu, King Ekserksis nug Kuin Esta, amu Juda ted Mordekai ele amelahppa aum. “Haman nug Juda hatteb nauhkkulagnu heum amunu, ag nug balal attan danab aihaknu hak amuppa aihna qeeg mauhe, amu da nuhig keeke amu Esta mettami.

⁸ Amge ɗo nai king onigppa yaak daatte, nuhig doyaknu at ringppa daatteppanu mak ele amuppa daatte amu, ɗo nai amuam heeb iitta mekkunu ib laa iitta. Anam daatte amunu, aa aɗi nai Hamannu dabmak Juda bemanu yaaglahnu dabmekkulah amu, aa nai amu ɗoppa yoya, aa da, king, aa dahil doyaknu at ringppa daatteppa yaak amuppa at mewoya, aa nai amu da onilppa mepeɗ ukkaɗ!” awa aum.

⁹ King Ekserksis nug anam aum amunu, kalam ewam, onig Siwan, nuhig deɗ 23 amuppa, ag kingnu nai yaak danab onilagppa eeh uɗieg, Mordekai nug ag aɗi yaaglagnu mattieye, ag ɗo nai laa amu oh, Juda danab, gumak danab anuqaknab, amu prowinsnu gawana, amu prowinsnu anuqak danab ele, ag prowins 127, Ekserksis waappa daatteb ele, ag amu dilag yaaladppig. Wan amuam Kus appanu digma ukka, India wanak daatte. Amu ɗo nai amuam nai anen anenppa, nai yaak kobol anen anenppa ele, danab ah, Ekserksis waappa daatteb, amu Juda dilag ele yaaladppig.

¹⁰ Mordekai nug ɗo nai amu King Ekserksis onigppa yowa, nug nai yaak amuppa king nuhig doyaknu at ringppa daatte, amuppa qataqattom. Nug nai yaak uɗug amu danab pahanab oitteb ele, danab amu matte, ag akkan goppig. Nai awa ukkak danab amu ag kingnu hos ena ena, qaiqaɗnab gotteb ele tiilagppan uɗiak, danab hos amuppa daan, nai aon gotteb ele he goppig.

¹¹ Am kingnu ɗo nai amu, am inam iikku aum. “Juda aab okkai ohppan ag qagmena amu, ag danab aun aɗi ag, ag aqaglagnu hetteb amu aqaglag. Ag aab diig danabte, o aab laappanu, ag, ag o ah, o nid ahilkad ele aqaglagnu ban hekkulagnu hetteb amu, ag ag aqaglagnu nai iitta. Ag aqattona, ahilkad keeke amu akkaglag elele.” Ɗo nai am anam aum.

¹² Am kobol amu King Ekserksisnu prowins ohppa bekkunu amu kalam 12nu deɗ 13 amu, ag deɗ amu tituanppig. Kalam amu onig am Adar.

¹³ Am nai awa ukkak danab ag ɗo nai amu aon, prowins ohppa gona, appan danab mattaglagnu daappig. Prowins anen anen ohppa nailag ohppa amu, ag ɗo nai amu ag qalan ebqebeppeg, danab ah oh ag dooglagnu nai dayom. Anam hak dayeb amu, kalam 12 deɗ 13 uɗieb, Juda ag ahilkad kekeɗ aqaglagnu bappaidkkulagnu nai dayom.

¹⁴ Amuam king nug nai haknunab ana aum amunu, nai awa ukkak danab ag pahanab kingnu hos ena ena, huana qaiedatteb ele, amuppa goppig. Amu ɗo nai amu aakkuib aab okkai Susa ooppa aben aɗ ɠagattagnab ele, ag appa ele panippig.

¹⁵ Haen Mordekai nug king uuitta ukka amu, nug lamen enappa bala meum. Nug lamen king metteb ele, amuam lamen elab ed, hakkab ele, nug amu takka, igippa nug haɗ golppa hak okkai laa ma, amu lamen tatam takkom hautaknu nug lamen perpel ele, linen enappa hak ele meum. Aria, danab ah aab okkai Susanu ag ɗo nai yaak laa anidna, ag amunu oo gamag ahak dooppig.

¹⁶ Juda ag amunu oolag ena daye, ag gamag ahak okkai doyegeg, aben ohppa ag binalag okkai ele dayom.

¹⁷ Aab okkai ohppa, amu prowins ohppa ele, kingnu ɗo nai ukke amu, Juda ag gamag ahak okkai doonna, ag amunu hobul heppig. Amu danab ah kuɗum wan amuppanu, ag Juda, ahilagppa attem hekkulag, ag amunu baɗak dooppig amunu, ag Juda beppig.