Esta 7 - Nobonob Baibel

King nug Haman mauhkkunu aum

¹ Danab amu ag Haman omalkkulagnu teppig, aakku king, Haman ele aa Kuin Esta ee naɗi heumppa gopiɗ.

² Ag deɗ amu wain lanana amu, king nug baula Esta oɗ mettom. “Kuin Esta, na aɗinu oot hette amu, na gemu na amelppa appe doyei! Da geha na medakkul. Na aɗi keekenu oɗ meɗakkutnu dabmettem? Na da wan gumattem amu gamagppa obaten, maha laa na medakkulnu appe amu, da na medakkul,” awa aum.

³ Awa a amu, Kuin Esta oɗeppa awa aum. “O king, na dahilnu ena doottem dayeb, na da aɗi keekenu oɗ medappi meɗakkutnu oot genab ele daatte dayeb amu, na heppe, laa ag da, dahilad danab ah ele iqappeg ii mauhmatanu ool daatte?

⁴ Aɗinu? Danab ah dahilad, amu da ele ig am danab ag iqaglagnu daden meigna eppelagppa meigppig daattem. Ig begbeg maɗi nid maɗi ah ele daagnignu aakkuib daden meiglob amu, da aɗitai laa ii alom. Keeke amuam keeke nakokib, laa nug king, keeke nakok amunu uug medakkunu am ena iitta. Am elele iitta amunu, am anam daalo amu, da aɗitai laa ii alom,” awa aum.

⁵ Kuin Esta anam a, King Ekserksis nug aum. “Aun imu hette? Aun nug inamnab hekkunu dabmette?” awa oɗ mettom.

⁶ King nug anam oɗ mette, Esta nob ma aum. “Ihinig kekeɗ, laa nug anam hekkunu hette am, danab nuhig kobol uɗig wak ele, am Haman iikku, nug hette,” awa aum. Esta anam a amu, Haman nug king, kuin ele noolahppa baɗak eheɗ nau ele dayom.

⁷ Esta anam a, king nug oppoɗi be ameg kokoɗ eppe, nug hibaitta, nuhig lag enanagnab guguittak dad dayom amu, nug amuppa ukkom. Amge Haman nug dayom. Aɗinu? Nug king geha nug qeeb mauhkku doya, nug Kuin Esta unuqeb, nug ab ehanidkkunu dayom.

⁸ Amu Haman nug Esta heeb, king nug ii qeeb mauhmanu oɗ medatta, nug Esta ɠagattagnab unuqkkunu gumitta ukka, nug balal Esta dayomppa, nug amuppa na qe, haen amuppanab King Ekserksis nug dad kingnu lag enanagnab guguittak dayom ele, nug appanu eɗua uɗiom. King nug eɗua uɗia amu, nug Haman nug balal Esta dayomppa oh daaeheh anata aum. “Nug da laulppa, dahil neekkakppanab kuinnu eheɗ hekkute?” awa aum. King nug anam aawo, laippun nuhig ehanittak danab ag Haman iɗu hautppig. Amuam laa Haman nug mauhkku ippuanattom.

⁹ Aria, kingnu danab laa hipab qak ele onig Harbona nug aum. “Haman nug he, danab ag danab aihattaknu balal, attan nuhig 20 mita, nuhig haɗap-ppa heppig. Nug amuppa Mordekai aihppeg mauhkkunu dabmeum. Mordekai nug am king mauhmanu ehanittom,” awa aum. Habona nug anam a amu, king aum. “Ag amuppa Haman aiheg!” awa aum.

¹⁰ King nug anam aum amunu, ag Haman aon, balal attan danab aihaknu nug Mordekai aihkkunu heum, amuppa aihppig. King nug anam ha, nug baula oppoɗi bak ii doye, ameg kokoɗ eppak ele ii dayom.