Esta 6 - Nobonob Baibel

King nug Mordekai binag okkai mettom

¹ Amu tuqan amuppa king nug niikkunu elele iitta doyom amunu, nug nuhig maɗi nid laa nuhig gumaknu kaya bukppa yaak amu ebqeebnab dookkunu aum.

² Ekserksis nug anam he, laa nug buk ebqeeqe, kingnu danab aɗit Bigtana, Teres ele aa king qepeɗ mauhkkunu maitteh, Mordekai doyata, kuin amegppa aum, kaya amu yaak dayom amu ebqeewo doyom. Danab aɗit amu aa oo Ekserksis nug amuppa dayaya niittom ele, aa od amu gumattapiɗ.

³ King nug amu doya, danab nuhikkud oɗ mattom. “Mordekai nug enanag heum. Ig aɗi keeke ena nug anam heumnu mettamut? Ig aɗi kobol heut, nug binag okkai awom?” oɗ mattom. Nug anam oɗ matte amu, nuhig danab ag appig. “Aɗitai laa nuhignu ii hak,” aon appig.

⁴ Ag anam mattinna, king nug ⌊neekke ukke, laa haɗap-ppa appa antta⌋ oɗ meum. “Haɗap-ppa umuam aun?” awa oɗ mattom. Nug anam oɗ mattom, ⌊amge Haman nug king niikkunu elele iitta dayom ii doyaya,⌋ haen amuppanab nug king ab, ag Mordekai balal attan danab aihaknu nug he heppig ele, amuppa aihkkulagnu oɗ medakkunu kingnu lag enanagnab odppanu haɗap-ppa beum.

⁵ Aria, Haman nug uɗieye, king nug antta oɗ meum amunu, danab nuhig ag king amegppa, “Haman appan daatte,” aeg, king nug hekkulagnunab aum. “Ag nug omalna neig!” awa aum.

⁶ King nug anam aum amunu, Haman nug ooppa no, king nug aum. “Danab laa da binag okkai medakkulnu ool okkainab hette ele amu, da nuhignu aɗi hekkul?” awa aum. King nug anam a amu, Haman nug ooppaib dabmak awom. “Auntai laa da eɗilak, king nug binag okkai medakkunu laa iitta,” awa dabmakppa aum.

⁷ Haman nug nukka dabmakppa anam aum amunu nug king amegppa aum. “King nug danab laa binag okkai medakku dayeb amu,

⁸ nug heeb, nuhikkud ehanittak danab ag kingnu lamen elab enanag laa, king nug deɗ laa takkom ele amu, ag amu aon uɗin, ag ele kingnu hos laa, king deɗ laa hos amu attan ta oiyom, kingnu bala hos amu igippa daatte amu, ag hos amu aon uɗippeg,

⁹ amu king nug heeb, nuhig ehanittak anuqaknab danab laa nug kingnu lamen elab awa, danab laa king nug danab amu binag okkai medakkunu oo okkainab hette ele, nug danab amu beɗuppa ma, nug omaleb, aab okkai ooppa kingnu hosppa dayaya nokku. Kingnu ehanittak anuqaknab danab amu, nug inam eebeb nokku. ‘Kobol imuam danab auntai laa, king nug danab amu binag okkai mekkunu oo okkainab hette ele amu, kobol imu nuhigppa aakku bette!’ Nug anam ekku!” awa aum.

¹⁰ Haman nug anam a amu, king nug amegppa inam hekkununab aum. “Amu enanag! Pahanab kingnu lamen elab aon, hos dahil ele aon dona, na ame amubianab na Juda ted Mordekai toppa hekkutnu amu oh he! Nug am king laugnu aɗ odppa daatte. Na aib keeke laa uuppe dayom!” awa aum.

¹¹ King nug anam aum amunu, Haman nug kingnu lamen elab awa, Mordekai beɗuppa meum. Nug kingnu hos attan mewowa, omale, aab okkai ooppa inam qala ewawa ukkom. “Kobol imuam danab auntai laa, king nug danab amu binag okkai mekkunu oo okkainab hette ele amu, kobol imu nuhigppa aakku bette!” ewawa ukkom.

¹² Haman nug anam ha male amu, Mordekai nug eɗua, king laugnu odppa ukkom, amge Haman nug laippun laugppa ukka, nuhigppa kobol beumnu mahiak okkainab heum.

¹³ Haman nug wau Seres, amu laikkud laa oh ele aɗi keeke beum amu ohnu amelagppa mattie, Seres, amu nug laikkud ulum medappig ele ag nug amegppa appig. “Mordekai, nug Juda ted, nug na eɗidkkunu digmeum amunu, na nuhigppa keeke laa hekkutnu elele iitta. Iitta! Nug geha na eɗidkku,” aon appig.

¹⁴ Ag anam mattinna daaegeg amu, kingnu danab hipalag aqak ele ag paha Haman aoppeg, Esta ee naɗi babaittom, amuppa daaglagnu teppig.