Esta 5 - Nobonob Baibel

Esta nug king Juda ehanadkkunu oɗ medakkunu ib babaittom

¹ Aria, deɗ aɗit uue, deɗ ewamppa amu, Esta nug kuinnu lamen elab nuhig ma, nug kingnu lag enanagnab ooppan haɗap-ppa ukka, king nug uɗat hetteppan oo guguittak hibaitta dayom. Dayeye, King nug sia king nuhigppa, kingnu oo amuppa daya, nug neekke odppa ukke dayom.

² Esta nug anam ukka hibaitta dayeye, ⌊king daatteppan oonu od matulak daye,⌋ king nug Kuin Esta appa king laugppan haɗap-ppa hibaitta daye antta, nuhignu ena doya, nug kingnu qakun golppa hak aɗom am me waum amunu, Esta nug ukka, qakun amu noob lauɗittom.

³ Qakun amu lauɗitte, aakku king oɗ mettom. “Kuin Esta, na aɗinu oot hette? Na aɗi oɗ meɗakkutnu uɗime? Na da wan gumattem amu gamagppa obaten, maha laa na medakkulnu appe amu, da na medakkul,” awa aum.

⁴ King anam a, Esta nug nob ma aum. “O king, na oot dayeb amu, na Haman ele aa gemu ee naɗi lanaknu bappaidmi, amuppa uɗiglahnu ool daatte,” awa aum.

⁵ Esta nug anam a, King nug eɗua awa, nuhig ehanittak danab amelagppa aum. “Esta nug ee lanaknu attede, gona Haman appeg pahanab uɗiaɗ!” awa aum. Aakku Haman, king ele aa Esta ee naɗi heum amuppa gopiɗ.

⁶ Aa ukkaeh, ag wain lanana amu, king nug Esta amegppa aum. “Na aɗinu oot hette amu, gemu na da amelppa appe doyei! Da geha na medakkul. Na aɗi oɗ meɗakkutnu dabmettem? Na da wan gumattem amu gamagppa obaten, maha laa na medakkulnu appe amu, da na medakkul,” awa aum.

⁷ King nug anam a amu, Esta nug nob ma aum. “Na inam hekkutnu da ool daatte.

⁸ O king, na dahilnu ena doottem dayeb, amu na dahil oɗmak nob meɗakkutnu oot daatte dayeb, amu na oot dayeb, na Haman ele aa butti ele ee ahilahnu da bappaidkkul amuppa uɗiglahnu ool daatte. Aa butti uɗiya daapeɗ, king na, da aɗinu ool hettenu oɗ meɗame amu, da nahip oɗmak amunu nob mein, da oolppa aɗi keekenunab ool hette amu appi, na dookkut,” awa aum.

Haman nug Mordekai qekkunu maittak awom

⁹ ⌊Esta nug anam a amu, king nug anam haknu oo dayom.⌋ Am Haman nug ee lanak amuppan gamag ahakppaib aha ugakka, nug Mordekai king laugppa wanaknu od oɗeppa dayeye anttom, amge Mordekai nug Haman uɗie antta, aha hibaitta ii dayom, nuhignu ele ii baɗom antta, nug oppoɗi be ameg kokoɗ eppom.

¹⁰ Haman nug anam aakku doyom, amge nug haen amuppa Mordekainu aɗitai laa ii heum; nug laugppa ukkom. Nug ukka, laikkud, amu nug wau Seres ele onilagppa e uɗin qagmeeg,

¹¹ amu Haman nug keeke kuɗum nuhignu, amu nuhig nid naunau kuɗum ele amunu amelagppa mattiaya, nugakka binag meum. Nug king nug, nug binag okkai metta, nug gumak uɗat aben attan, anuqak danab, kingnu ehanittak anuqak danab laa oh eɗattak nug mettomnu mattiom.

¹² Haman nug amu ohnu mattia mala, nug tuɗitta aum. “Amuib iitta! Kuin Esta nug da, king ele i iya aakkuib ee ihinihnu babaitta, amu lakkunihnu oninihppa eum. Nug anam ha, nug da, king ele butti baula nug ele ee lakkunignu oninihppa eum!” awa aum.

¹³ Haman nug anam anana, laa ele tuɗitta aum. “Amge haen oh da Juda ted Mordekai nug king laugnu od oɗeppa heɗep na dayeye anidttem ele amu, ⌊nuhig hak, nug da binal mekkunu ii ahatte, nug dahilnu ii baɗatte amu, nuhig hak amu he,⌋ keeke ena oh king nug dahilnu hette amu, da keeke amu oh am keeke hamu, keeke meu iitta doottem,” awa aum.

¹⁴ Nug anam mattiom amunu, nug wau Seres, amu laikkud oh ele ag appig. “Na heppe, danab ag balal attan danab aihadkkulagnu, nuhig elab attan tak 20 mita heppeg, buttua amu Mordekai balal amuppa aihaknu king oɗ mette! Amu oh hena malona, na goppe, ee lanak naɗi amuppa king ele aa gamag ahak naɗi dooglah,” aon appig. Ag anam appig, amu Haman nug nai amunu enanagnab doya he, danab ag balal amu heppig.