Esta 4 - Nobonob Baibel

Mordekai ehanittak Esta toppa aokkunu aum

¹ Mordekai nug kobol attem beum amunu doya amu, nug nuhig lamen pattiɗa, lamen heɗiag ele awa ma, igippa uhuɗ meum. Anam ha, nug aab okkai ooppa ukka, oo doyak naunab ele doyaya, qala gayom.

² Amge aun laa nug lamen heɗiag ele takkom amu, nug king laugppa nokknu elele iitta amunu, Mordekai nug king laugnu od okkai, amu dimittim appa hibaitta dayom.

³ Aria, kingnu ɗo amu wan oh tuale amu, Juda oh ag amunu mahittak okkai heppig. Ag ee ohnu kud mena daanna, gaanna, aeqakkanna, danab ah kuɗum ag lamen heɗiag ele takkaladna, uhuɗ laappig.

⁴ Anam heegeg, haen Kuin Estanu ehanittak ah bau, amu danab hipalag aqak ele ag uɗin, nug amegppa Mordekainu mattieg doyom amu, nug oo doyak awa, uug nau doyom. Nug anam doya, nug Mordekai lamen heɗiag ele meum amu nunuɗeb neeb, lamen ena mekkunu me ukkom, amge Mordekai nug uuom.

⁵ Anam daye amu, Esta nug kingnu danab hipab qak ele onig Hatak, nug nuhig ehanittak uɗat hekkunu epeɗippig ele amu, nug nug onigppa e uɗie, Mordekai anidkkunu me ukkom. Nug Mordekai toppa ukka, aɗi keeke he, nug oo uug ele doya, nug mahiakppa daatte amu dookkununab gokkunu aum.

⁶ Esta nug anam me ukkom amunu, Hatak nug Mordekai toppa gokkunu, nug aab okkainu haɗap king laugppanu od guguittak dayom amuppa wana, Mordekai gumitta ukkom.

⁷ Hatak nug Mordekai gumitta ukka he, Mordekai nug keeke oh nuhigppa beum, nug nai amu oh amegppa mattiaya, Haman nug men doɗo ganenab, king nug Hamannu dabmaknu ena doya, Juda oh aqaknu akkunu, Haman nug kingnu en maknu oo, oo amuppa mekkunu, Mordekai amunu ele mattie doyom.

⁸ Amu Mordekai nug ɗo, Juda oh aqaknu yaak Susa appa meppig ele amu, nug Hatak amunu uɗug laa mettom. Nug metta, nug Hatak pepa amu awa ukka, Esta ippunitta, amegppa nai amuppa aɗi bekkunu daatte, amu ohnu amegppa anana, nug Esta ukka, king amegppa oo doyak ele king nug oo gai-iitta doya oo metta ehanittak ha, nug Esta ele tiilag laippunu danab ah ehanadkkunu unuqa auta aokkunu aum.

⁹ Mordekai anam heum amunu, Hatak nug eɗua Esta toppa ukka, Mordekainu nai nug amegppa aum.

¹⁰ Hatak nug Esta toppa ta, amegppa Mordekai aum bia a, aakku Esta nug Hatak nug eɗua ukka, Mordekai inam ab dookkunu aum.

¹¹ “Kingnu ehanittak anuqak danab oh, amu wan atu ohppan danab ah ag dootteb. King nug laa onigppa ii ekku, amge laa amu, nug king laugnu oo unuqagppa hamu king anidkkunu gokku, king nug nuhig qakun golppa hak nug aɗakkun ii metteb, ag qeppeg mauhkku. Amge laa nug anam bia gokkunu dayeb, king nug nuhig qakun golppa hak nug aɗakkun metteb, nug wana qakun amu aɗa, nug ii mauhma. Danab ah ag amu dootteb. Amu king nug da nug gumitte gokkulnu laa ii eum, kalam laippu iikku ukkom,” awa aum.

¹² Esta nug anam mattia aum amunu, Hatak nug Estanu nai amu awa ukka, Mordekai mettom.

¹³ Hatak nug a doya, Mordekai nug nai imu nob ma, Estanu me ukke aum. “Na king laugppa daattem amunu, Juda oh aqappeg, naib bau daakkutnu amu, na amubia aib dabmeme.

¹⁴ Aɗinu? Haen inamppa na oɗen qamutna daappe amu, laa nug geha heeb, laa nug Juda ehanatteb, ag oh ii mauhmana, amge na, na mamen baekkudppa ele, ag geha mauhkkulag. Am laa ii dootte, amge na haen imuppa king laugppa daattemnu diig am, na ig Juda ehanigkkutnu anam bemetai,” awa aum.

¹⁵ Mordekai nai amu me, Esta toppa ukke amu, Esta nug nai nob imu Mordekai toppa me ukkom.

¹⁶ “Gona, Juda danab ah Susanu oh da ehaniɗkkulagnu diin qagmaadppe, ag ee lamananu, ee ohnu kud mena dayeg! Ag tuqan, amun ele deɗ ewam ee, le ele ohnu anam kud mena dayeg! Da, amu dahilad ehanittak ah ele, ig ele anamib hekkunig. Ig oh anam dayota, ɗo am laa nug hamu ukka, king anidkkunu aib atte me, geha da ukke, king anidkkul. Da mauhkkul dayeb amu, da mauhkkul. Am nai iitta.” Esta nug nai amu me, Mordekai dookkunu ukkom.

¹⁷ Esta nug nai amu me, Mordekai toppa ukkom amunu, Mordekai nug ukka, Esta aum bia heum.