Esta 3 - Nobonob Baibel

Haman nug Juda aqakkunu lokkumakppa maittom

¹ Haen laa dimppa, King Ekserksis nug Haman he, wan amunu ikki danab anuqak beum. Haman nug am Hamedata bekka. Hamedata nug am Agag buɗubppan. Nug ikki danab anuqak beum amunu, nug kingnu anuqak danab laa oh eɗattak.

² King nug anam haknunab aum amunu, nuhikkud ikki danab laa oh ag Haman, nug am ahilag anuqaknab, okkai daatte epponak hena, haen nug ag noolagppa waawo amu, ag nug noobppa dup nodappig. Amge Mordekai nug nug noobppa gomela, ii dup nottom.

³ Mordekai nug anam heehe, kingnu ehanittak anuqak danab laala king laug odppanu ag Mordekai oɗ medappig. “Na aɗinu kingnu nai haknunab anak amu ii dim lamidttem?” oɗ medappig.

⁴ Ag nug deɗ deɗ nug oɗ medattappig, amge nug tuɗid ele kingnu nai dim lamittak uuttom amunu, ag Haman amegppa amunu appig. Mordekai nug am Juda ted, nug amu a dooppig amunu, ag Mordekai nug Haman noobppa gomela, ii dup noum amu, nug tuɗitta heeb, elele anam daakkunu anidkkulagnu amegppa appig.

⁵ Ag Haman amegppa anam aeg amu, Haman nug Mordekai nug noobppa gomela, ii dup noum antta, nug oppoɗi be ameg kokoɗ eppa auta awom.

⁶ Nug oppoɗi anam be, nug Mordekai aakkuib qekkunu iinab dabmeum. Ag nug amegppa Mordekai amu Juda ted appig amunu, Haman nug Juda ag Ekserksisnu ɗo maɗoɗ ohppa daappig amu, nug ag oh aqakkunu maittom.

⁷ Anam amu, King Ekserksis nug king abenab awa, nuhig king dayaknu maɗ 12ppa, maɗ amunu kalam onig Nisan, am kalam digmak, kalam amuppa Haman nug he, nuhikkud ehanittak danab ag om yaak, purim atteb, ag amu nug noobppa heppig. Nug amu he heppig diig am, ag kalam, deɗ ele attenppanab ag Juda oh aqaglagnu am ena, ag diig amunu heppig. Amu heeg amu, kalam onig Adar, ag kalam amuppa hekkulagnu ippuanattom. Adar am kalam ebqak 12.

⁸ Anam daye amu, Haman nug King Ekserksis gumitta ukka aum. “Danab ah diig laa ag nahip ɗo waappa prowins ohppa daatteb. Ag ahilag ɗo am aabaab laa ele laippu iitta. Ag king nug ɗo mette, amge ag dim lamittaknu uutteb amunu, king nug ag uuatteb daaglagnu am ena iitta.

⁹ Na amunu ootppa ena doottem dayeb amu, O king, na danab ah amu oh aqaknu ɗo mena akkut, da geha silwa, uug nuhig 345,000 kilogram gabman ikki danab madappi, ag nahip en maknu oo, amuppa mekkulag,” awa aum.

¹⁰ Haman nug anam a amu, king nug amunu, “Yo,” awa aum. King nug, “Yo,” ana, nug nuhig doyaknu at ringppa daatte, Haman aɗi ɗo meeb gokku amu, nug kingnu at amuppa mekkunu nug ring amu nug eppeg doɗoppanu awa, Haman mettom. Haman, nug Hamedata bekka, nug Agag buɗub, nug Juda dilagnu kekeɗ doyom.

¹¹ King nug anam ha, nug Haman amegppa aum. “Na silwa nahip amu aɗappe dayaɗ, amge na danab ah amu dilagppa aɗi hekkutnu ena doottem amu, na anam aakku hekkutib hekkut,” awa aum.

¹² King nug anam aum amunu, kalam digmaknu deɗ 13ppa Haman nug kingnu nai yaak danab onilagppa e uɗieg, nug ag amelagppa aɗi nai gumak danab anuqaknab, amu prowinsnu gawana, amu prowinsnu anuqak danab ele dilagnu yaaglagnunab a, amu ag aakku ahilkad yaaknu kobolppa, amu ahilkad nai aben abenppa nai yaappig. Ag anam yaaeg, nug uɗug amu ohppa King Ekserksis onig ya, nug king doyaknu at ringppa daatte, amuppa kingnu at pepa amuppa qataqattom.

¹³ Nug nai uɗugppa, nai awa ukkak danab eppelagppa me, ag king wan gumom ele amu, ag prowins amu ohppa aon goppig. Nai yaak ɠagattag amuam Juda oh, amuam danab ah bau, kaino ele, ah, danab ele, amu nid naunau ele, ag deɗ laippu amuppaib Juda ohnab aqaknu nai yaak dayom. Kobol amu kalam 12, kalam amu onig am Adar amu, ag kalam amuppa deɗ 13ppa anam haknu dayom. Ag Juda aqattona amu, ag ahilkad keeke amu oh ahilag daakkunu nai dayom.

¹⁴ Am wan maha maha amu ohppa danab ag ɗo amu dim lamidna hekkulagnu, nai awa ukkak danab ag ɗo amu wan ohppa ebqena heppeg, appan danab ag dooglagnu, ag anam hekkulagnu daappig.

¹⁵ Am king nug nai haknunab ana, nai awa ukkak danab ag pahanab gona, nai mekkulagnu a, ag anam aakku heppig. Ɗo nai amu aab okkai Susa ooppa aben aɗ ɠagattagnab ele appa ele ebqeppig. Anam daye amu, king nug Haman ele aa le lakkulahnu heɗep neya daapiɗ, amge danab ah Susanu ag nai amu doyeg, ootot aqom.