Esta 2 - Nobonob Baibel

Esta kuin beum

¹ Amge King Ekserksis nug oo nauhak nuhig bodoette amu, nug digma, Wasti, nug kobol heum ele amu, aria ɗo meum, nug amu elenu dabmeum.

² Amunu nuhig, nugnab ehanittak danab ag maittak ahilag inam appig, “⌊O king, na appe,⌋ aben ohppa danab ag neegna, ah makkun ena ena laa, iɗu tuqak ele kingnu anatteg!

³ Amu king nug anam heeb anadppeppeg, ag diin aab okkai Susa ooppa aben aɗ ɠagattagnab ele imuppa uɗiglagnu king nug prowins anen anennu danab epeɗiatteb, ag ah makkun ena ena, iɗulkad tuqak ele appanu diin, aab okkai Susa ooppa aben aɗ ɠagattagnab ele imuppa king wauud daattebppa uɗiglag. Hegai, kingnu hipab qak danab laa, nug king wauud atognoadtte ele, nug am geha ahilag gumak danab dayaya, nug aɗi keeke ah makkun amu, ag iɗulag tuqaknab ele daan aoglagnu daatteb amu, nug ag madakku.

⁴ Amu dimppa ah makkun aun nug na, king, na nuhignu ootppa ena doottem amu, nug geha kuin ba Wastinu aben aokku,” aon appig. Ag anam aeg amu king nug ahilag ulum nai amunu oo heum amunu, nug ag anam hekkulagnu pahanab nai meum.

⁵ Amu aab okkai Susa ooppa aben aɗ ɠagattagnab ele appa, Juda danab laa onig Mordekai dayom. Nug am Israel dilag huu okkai Benyamin amuppanu, amu Nug am Jair bekka. Jair am Simei bekka, amu Simei nug am Kis bekka.

⁶ Am King Nebukatnesar nug Mordekai mamekkud aɗi, ag diia ukka laih me dayak danab ah Babilon daaglagnu Jerusalemnu diia ukkom. Haen amuppa King Nebukatnesar nug Jehoiakin, Juda dilag king, amu laa kuɗum ele aɗualatta, diia Babilon ukkom.

⁷ Aria, Mordekai mameg nakok aɗeg onig Hadasah, onig laa Esta adappig amu, nuhig neekkak am enanag, iɗu tuqak ele. Amu haen nug mameg, anig ele aa mauheh amu, laa bekkidkkunu iitta amunu, Mordekai nug awa, nug aɗegnab bia begitte, ena meum.

⁸ King nug ɗo amu aakku daakkun a, kingnu danab ag ah bau kuɗum diin, king wauud daattebppa aab okkai Susa ooppa aben aɗ ɠagattagnab ele appa goppig. Ag anam henana, ag Esta ele aon gona, kingnu lag enanagnab, laa oh ele, amuppa maadppig. Ag nug Hegainu dabmettakppa daakkunu uuidppig. Hegai nug king wauud atognoattom.

⁹ Hegai nug Estanu dayak, oiyak keeke antta, nug Estanu ena doya, oo bodoettak kobolppa nug ehanittatta, nug dabmetta auta awom. Nug he, ag pahanab nuhignu ee enanag, nuhig anttak enanag daakkunu keeke babaittona medappig. Nug ah eblaih aɗit ele kingnu lag enanagnabppanu otiatta he, ag nug ehanidkkulagnu daaegeg, nug he, nug am nuhig ehanittak ah ele ag aben enanag, aben laa oh king wauud daattebppa eɗattak, ag amuppa noppig.

¹⁰ Esta nug auntai laa amegppa nug am Juda ted, nug baekkudppa ele ag Juda amu ii mattiom. Mordekai nug amu mattimanu aib aum amunu, nug ii mattiom.

¹¹ Deɗ ohppa Mordekai nug ukka, haɗap-ppa, king wauud laulag guguittak appa oiyaya, Estanu oɗ maama, nuhigppa attem laa bettete, nug amu dookkunu oittom.

¹² Amu ag ah makkun anen anen omaladna, King Ekserksis toppa ii goppig daaegeg, anen anen oh neekkak ahilag enanag bekkunu, laa ag ah makkun amu ag neekkak ahilag enanag daakkunu kobol haknu dooppig, ag ahilag uɗat amu heppig. Amunu maɗi ahilag amuam kalam 12 uɗatab heppig. Kalam eblaih laippu ele oh amu, ag mir goɗenppa heppig, amu kalam eblaih laippu ele laa amu, ag leppu muttuɗig enanag, amu keeke kaala ele, ag amuppa ele heppig.

¹³ Am ah makkun laa nug king gumitta wakkunu haen do, nug aɗi keeke awa, king wauud laulagppan aha, kingnu lag enanagnabppa ukka, king anidkkunu oo he amu, ag medattappig.

¹⁴ Aria, tueb, nuhig deɗ mak amuppa, laa ag nug omalna, king nukka dayomppa appa goppig, buttua amu, ag nug omalna, king wauud daattappigppa, lag laa amuppa goppig. Appa amu nug danab laa onig Sasgasnu dabmettakppa daakkunu dayom. Danab amu nug am kingnu danab, hipab qak ele laa. Nug king wauud amge wauudnab iitta gumadttom. Ah makkun nug haen oh appaib daakkunu meppig, Nug king toppa eɗua gokkunu iitta, me king nug nuhignu oo ena doya, onigppa eeb amu, ag nug omalppeg, nuhigppa ukka daakkunu dayom.

¹⁵ Aria, Estanu haen king toppa wakkunu do amu, nug Hegai, nug kingnu danab hipab qak ele, nug king wauud dilag gumak danab, nug maittom amu aakkuib ah makkun Esta, nug amunuib oo heum. Anam he, laa oh ag nug anidppig amu, ag nuhignu enaib dooppig. Esta nug am Mordekai aɗeg; nug Mordekai mameg nakok Abihailnu nid, amge Mordekai nug taegmawom.

¹⁶ Akku kalam ebqak eblaih tanig ele, onig Tebet, kalam amuppa ag Esta aon, king laug enanagnabppa, King Ekserksis toppa goppig. King Ekserksis nug king abenab awa, nuhig king dayaknu maɗ eblaih aɗitppa amu, ag Esta omalna goppig.

¹⁷ King nug Esta antta, nug nuhignu, ah bau laa oh eɗattak, nug nuhignu oo mauhom. Nug nuhignu enanagnab doya, Wasti abenab awa, kuin daakkunu king nug kuin haɗ igippa aɗuitte no he, nug kuin beum.

¹⁸ Esta kuin beumnu gamag ahak daakkunu king nug ee naɗi ha, Esta binag okkai mettom. Nug he, kingnu anuqak danab, amu nuhig ehanittak anuqak danab ele ag uɗin, ee naɗi lappig. Nug danab ah, keeke ahilag daakkunu hamu, oo qak iitta, madatta he, wan amuppa prowins ohppa uɗat ii haknu haen dayom.

Mordekai nug laa aa king hepeɗ mauhkkunu maidpiɗ ele, nug ahilah dabmak doyom

¹⁹ Amu ah makkun laa, Esta ele oh daaegeg, Esta omaleg king toppa ukkom, amu dimugppa ah makkun laa oh daappig ele, ag ele king wauud daappig, ag lag amuppa gona malappig amu, haen gamag amuppa Mordekai nug king laugnu ikki danab laa ba dayom.

²⁰ Mordekai nug king laugppan ikki danab laa dayom, amge Esta nug tuɗid, nug auntai laa amegppa nug am Juda ted, nug baekkudppa ele ag Juda amu, Mordekai aum bia ii mattiom. Nug Mordekai laugppa, nuhig nai dim lamitta hettom biaib heum.

²¹ Amu deɗ laa Mordekai nug king laugppa nuhig uɗat heehe, kingnu danab aɗit hipalah aqatak ele, Bigtana, Teres ele, aa King Ekserksisnu oolah nauhe, aa nug qepeɗ mauhkkunu maidya madipiɗ. Aa am Ekserksis nug dayaya niittom ele, oo amunu od gumattapiɗ.

²² Amge Mordekai nug aa anam hekkulahnu hepiɗ amu doya, nug Kuin Esta amegppa aum. A amu, nug king amegppa amunu aum, amge nug Mordekai a doyomnu ele aum.

²³ Aria, hettoɗiak amunu be amu, ag Mordekainu nai amu genab anidna, ag Bigtana, Teres ele balal attan, danab aihaknu hak, amuppa maatna aihatppig. Ag amu heeg amu, danab keeke bukppa yaappig ele, ag amunu buk laappa, buk amuam King Ekserksis gumaknu kaya, ag nug noobppa buk amuppa amu yaappig.