Esta 1 - Nobonob Baibel

Kingnu ee hak naɗi

¹ Kaya imuppa keeke beppig ele amu, King Ekserksis nug Persia dilag king dayom haenppa beppig. Ekserksis imu, nug Persia wanppanu prowins 127 oh gumom. Prowins amuam India appanu digma ukka, Kus wanak.

² Haen amuppa King Ekserksis nug kingnu lag enanagnab, aab okkai Susa ooppa aben aɗ ɠagattagnab eleppa dayom, nug appa sia king nuhigppa dayaya, nuhig wan oh gumattom.

³ Amu Ekserksis nug king abenab awa, nuhig king dayaknu maɗ ewamppa nug nuhikkud anuqak danab, nuhikkud ehanittak anuqak danab oh ele dilagnu ee lanak hobul naɗi babaittom. Nug Midia amu Persia ele dilag daup ikkilkad oh, okkai danab laa, amu prowins oh dilag okkai danab ele onilagppa eum.

⁴ Gamag ahak haen amuam kalam eblaih laippu ele dayom. Kalam eblaih laippu ele haen amuppa king nug danab amu dabmatta auta awa, nug ee elelenab mattom. Nug anam heum amuppa nug enub ele, amu binag amahlak oppiaawak ele nuhig, nug amu ippuanattom.

⁵ Haen amu ukka male amu, nug kingnu lag enanagnab, appa danab uɗat heppig ele, nug amu dilag ee naɗi lanak hobul heum. Ee amuam laa onilag okkai ele ukka, laa onilag nakok ele batak, ahilag ohnu heum. Nug ee amu aab okkai Susa ooppa aben aɗ ɠagattagnab ele appa, kingnu lag enanagnab guguittak dad enanag laa dayom amu, dad amunu haɗap-ppa, appa ha lakkulagnu qagmaattom. Ee lanak naɗi amu deɗ eblaih aɗit ele dayom.

⁶ Haɗap amu, ag linen lamen hakkab, amu lamen ed eleppa bala medappig. Lamen qatti okkai amu ag biidod men mabelppa hak, ag amuppa silwa ringppanu mayatteg ne qakkaladppig. Ag muɗi hakkab, amu lamen perpel ele, amuppa silwa ringppa qakkaladppig. Wanppa amu, ag men geɗaɗa ele duqaeg ukke, kaala anen anen, amuam keeke dottog danab ah ippunattom. Men amuam men porpiri, men mabel, men perl anig, amu men laala, daden nob okkainab ele. Aria, men amuppa king he, danab ah daaglagnu ag sia golppa hak, silwappa hak ele maadppig.

⁷ Danab ag le lanak hobul amuppa danab ah dabmadappig ele amu, ag kap kobol kobol ele golppa hak, amuppa wain qena madappig. King nug wain lakkulagnu huananab babaittom. King nug enub okkai amunu, nug anam aakku ag lakkulagnu babaittom.

⁸ Am wain amu lanaknu ɗo am laippuib dayom. Ɗo amuam danab laa nug le lanaknu uuom, o nug le baula lanaknu uuom amu, laa nug lakkunu wagai aib meum. Amge laa ag huan lanaknu oolag dayom ele, ag am lakkulag. Ɗo anam dayomnu diig am, king nug maɗi nid nuhikkud ag danab amu uuadppeg, ag akka oolag dayom amuib dim lamidkkulagnu amelagppa anam haknunab aum.

⁹ Amu Kuin Wasti nug ele ee lanak hobul naɗi ah dilagnu kingnu lag enanagnab, appa haen amuppaib heum.

Kuin Wasti kuin dayakppanu geɗittak

¹⁰ Aria, appa amu danab eblaih aɗit ele ag hipalag aqak ele, ag king laugppa daan, King Ekserksis ehanidttappig. Danab amu ag am Mehuman, Bista, Harbona, Bigta, Abakta, Setar, amu Karkas ele. Ee lanak deɗ eblaih aɗit ele amuppa King Ekserksis nug wain nakok huana la qe, nug danab amu amelagppa

¹¹ ag Kuin Wasti kuin haɗ igippa dayebeb ele omalna nuhigppa uɗiglagnu aum. Nug am ah iɗu tuqak enanag, amunu king nug danab oh, anuqak danab ele ag kuin iɗu tuqak enanag amu anidkkulagnu dabmeum.

¹² King nug ag anam appeg dookkunu amelagppa a, ag appig, amge Kuin Wasti nug ukkaknunab anak amu dim lamidkkunu uuom. Amuam he, king nug oppoɗi be ameg kokoɗ eppe, nug oo nauhak huananab doyom.

¹³ Am king nug haen ohppa aɗi keeke bau bia be, nug danab laala ag Persia dilag ɗo, amu kobol elenu doyak okkai ele, ag nug dabmak medatteb ele amu, nug hanhan keeke bau bia be amunu oɗ madattom amunu, haen imuppa ele nug pahanab nuhikkud danab amu a uɗieg, ag ele Wasti heum, ag amunu mattiak heppig.

¹⁴ Danab amu onilag amu, Karsena, Setar, Admata, Tarsis, Meres, Masena amu Memukan ele. Ag am Persia, Midianu dilag anuqak danab onilag okkai ele. Ag anam amunu, ag king anidkkulagnu ib ele. Amu ag ɗo maɗoɗ amuppan danab okkainab.

¹⁵ Aria, king nug ag oɗ matta aum. “Kuin Wasti, nuhignu amu, da maɗi nid dahilad ag nug omalna, dahilppa uɗiglagnunab ai goppig, amge nug dahil nai ii dim lamittom. Anam amunu, ɗo am nuhigppa attem haknu atte?” awa oɗ mattom.

¹⁶ Ekserksis nug anam oɗ matte, Memukan nug king, am kingnu anuqak danab, ag ele, nug ag oh noolagppa amunu nai nob ma aum. “Kuin Wasti nug king nuhigppaib eheɗ ii heum. Iitta. Nug kingnu anuqak danab dilag, amu danab ah oh, ag prowins ohppa daatteb ele, nug danab ah amu ele dilagppa eheɗ heum.

¹⁷ Aɗinu? Am ah laa oh ele aben ohppan ag kuin heum doon, ag geha ag gamulkad dilagnu ena iinab doon, ‘Kuin Wasti nug kingnu nai haknunab anak, nug nuhigppa uɗiaknu aum, nug amu uua, ii uɗiom,’ akkulag.

¹⁸ Am kingnu anuqak danab, Persia, Midia elenu amu, ag waalkad ag kuinnu hak amu gemu dooppig ele amu, ag geha deɗ imuppaib, gamulkad amelagppa amunu mattin, anamib hekkulag. Ah oh aben ohppan ag gamulkad dilagnu am keeke hamu bia dooglag. Ag anam dooglag amunu, ag gamulkad ag ahilkad ah dilagnu oolag nauhkku.

¹⁹ Anam aakku bekku amunu, O king, na ena dookkut dayeb, na hak amunu ɗo laa mekkut. Anam dayeb, ɗo amuam Persia, Midia ele dilah ɗo nai aakku daakku. Persia, Midia dilag ɗo amu baoliaknu iinab daama. Ɗo amu ba heeb, Kuin Wasti nug baula na, King Ekserksis, nug na anidkkunu elele iitta dayeb, na kuin laa, nuhig hak Wastinu eɗittak, hak ena ele otikkut.

²⁰ Am na ɗo amu meppe ba daakku dayeb amu, danab ah oh nahip ɗo maɗoɗ okkai okkaippa na waatppa daatteb ele, ag amu dooppeg, okkai danab, o iitta okkai danab iitta, amu oh ag waalkad geha gamulkad dilagnu am keeke hamu bia ii doomna. Iitta! Ag ahilagnu ena elele dooglag,” awa aum.

²¹ Aakku king, amu kingnu anuqak danab nuhikkud ele ag ulum nai amunu ena dooppig amunu, king nug Memukannu mattiak amu dim lamittom.

²² Nug nai amu wan maha oh nug waappa daatteb, nug appa me ukkom. Nug he, prowins anen anen, ag ahilag yaaknu kobol anen anenppa, danab piɗe piɗe, ag nailag piɗe piɗe, ag nai amuppa uɗugppa nai yaalatteg, me ukkom. Yaak amuam danab ag aakkuib am ag laulkad anen anenppa ikki daaglagnu dayom.