Esra 9 - Nobonob Baibel

Esra nug Israel danab atu laihnu ah diippig ele alattom

¹ Amu dimppa Israel dilag ikki laa ag uɗin, da, Esra, ag da amelppa appig. “Danab ag gemu ig miag taliligna daatteb ag, ag kobol nau digdig, Kayak Nug kobol amunu ooppa uuaknab dootte amu, ag kobol amu hetteb. Ag Kanan danab, Hit danab, Peres danab, Jebus danab, Amon danab, Moap danab, Isip danab, Amo danab ele dilag kobol nau dim lamidna heegeg, Israel danab ah ag danab ah amu ele ouqak ii daamnanu ag akka ag awaidna ii daan, ag ele kobol nau hetteb. Israel danab ah, Lewi buɗubppan mana mettak danab, Lewi buɗubppan mana mettak danab iitta ele, ag amu hetteb.

² Israel danab ag danab laa umu aɗelkad, ahilkad ah daaglagnu diion, appanu ah diin, ag bekkalkad dilag ah daaglagnu mattanna, ib amuppa ag heeg, ig danab ah, ig Yawenu tituanak daattem, ig laa ag Yawenu danab ah iitta amu, ig tiinig aakku kaboliak daatte. Amu Israel dilag ikki danab, ahilag ehanittak anuqak danab ele, ag Kayak kobol amunu ippunikkomnu oo metta ii uuak kobol ii dim lamidna, amu hekkulagnu danab ah noolag aon ukkaeg, Israel laa ag amu hetteb.” Ag da amelppa anam appig.

³ Haen ag da amelppa anam aeg doyen, da dahil lamen elab, lamen nakok elab, da lamen aɗit amu aɗe patiɗaten, da ikkil uɗug, akkaɗil ele laih aɗe hiɗen, da dabmak huanaknab awen, heɗep nein daami.

⁴ Da eheɗ nau doyen, dabmak huanak awewe, da heɗep nein daaiyi ukke ukke, tueb hanhan doɗ laa main Kayak medatteb, haen amu uɗie, da eɗue ahe daami. Amge haen da heɗep nein daaiyi, danab ah laa ag Kayaknu ebehilag oh bodoetta le mette ele, ag Israel danab ah Kayak ippunikkomnu oo metta ii uuak kobol ii dim lamidna oittebnu uug doon, ag diig amunu ag uɗin, da taliliɗna daappig.

Esranu unuqittak

⁵ Amu mana mettak danab ag tueb doɗ manan, Kayak mettaglagnu haen do, da dakka onil qei ne, heɗep nein daamippanu ahen, dahil lamen patiɗak dayeye, da dup noin, gatel qaun o, da eppel humai ta, Yawe, dahil Kayak, Nug daatteppa ukke,

⁶ da unuqitten ami. “O Kayak dahil, da uɗa nak nau doottem. Da uɗa nak nau guittak ele doottem waappa dayeye, da amel hume, na neekkidkkulnu elele ii doottem. Aɗinu? Ig hipunin okkainab hemut, ikkinig eɗitta tak. Ao, ig beɗunigppa aab okkainab daatte, ⌊aab ewawa⌋ habppa tette, ⌊amubia⌋.

⁷ Ig mamenkad aɗi dilag haenppa digmeta heut uɗie uɗie, gemu ele ig hipunin hetata oittem amunu, ig beɗunigppa aab naɗi daatte. Ig hipunin kuɗum hemut amunu, wanppan wan laalappan king ag ig, ihinkad king, ihinkad mana mettak danab ele, ag ig qep elabppa iqaeg mauhmut. Ag ig aɗikkeg, ig ag eppelagppa daamut. Ag uɗin, ban hena, ihinkad keeke aon goppig. Ag heeg, ig uɗa nak nau ele daut uɗie, gemu ele ig anam daattem.

⁸ Amge gemuib, haen tutu imuppaib, na Yawe, ihinig Kayak, na ii helom bia me, na hee, ig oɗo yaak daattem ele, ig daatta, na ig nuhig mettid lag guguittak ena daagnignu ib mekkae, gemu ig danab laa waappa daattem, amge ig bau daatta, naunab nau ii daattem amunu, O ihinig Kayak, na hee, ig daagnignu elelebia doottem.

⁹ Aɗinu? Ig laa waalagppa daat, ahilag begbeg maɗi nid daamut, amge na Kayak, na ig anam daautut, ii uuigme. Na ihinignu oo mauhaknab doon hee, Persia dilag king laala ag ena heigppig, gemu king daatte nug ele anam hette. Na Kayak, na ig nahip lag eɗua daakkunu buugnignu ɠagattag mekkan ehanikke heta, gemu ig Juda wanppa, Jerusalem ippa ele guppiɗ dimugppa bia daattem.

¹⁰ Na anam ehanigme, amge O Kayak ihinig, gemu ig kobol nau eɗut dim lamidttem amunu, ig aɗi laa akkunignu elele? Aɗinu? Ig nahip ɗo tappaut ne, ii dim lamidttem.

¹¹ Ɗo amuam, na nahip propet oɗelagppa mee appig. Ag oɗelagppa na ame. ‘Wan ag tena aon daaglagnu hetteb ele amu, wan amuppan danab ah ag kobol nau digdig hetteb amunu, wan amuppa kobol dubuttid ele huanak daatteb. Wan amu ohppanab danab ah ag kobol da oolppa uuaknab doottem ele hetteb. Kobol amuam wan amuppa ambak daaeg, wan am dubuttid ele daatte.

¹² Wan amuppan danab ah ag anam ele amunu, aria ag Israel, ag aɗelkad wan amuppan bekkalkad madappeg, ahilkad ah aib daappig. Anamib, ag wan amuppan aɗelkad diin, ag bekkalkad madappeg, ahilkad ah aib daappig. Ag ɠagattag daan, ag wan amuppan ee ena aon lakkulagnu, ag wan amu aon daan, ag ag bekkalkad ag aulag hanhan daakkunu mattaglagnu elele daaglagnu amu, ag wan amuppan danab ah ele layam batan, ag ele nug tituanna nai aib qagappig; gemu, butti aɗi ele anamib.’ Propet ag ig amenigppa anam appig.

¹³ Ag ig amenigppa anam appig, amge ig mamenkad, ig ele, ig nahip nai dim ii lamidmut amunu, uug ihinigppa beum; am ihinig eheɗ hak, diig amunu beum. Ge, ig beɗunigppa aab naɗi dayom amunu, uug amu ihinigppa beum. O Kayak ihinig, ig nau anam heut, na bu eheɗ nau megakkutnu elele, amge na nob aɗae ne, ig oh ii mauhmut; ig laippu laippu oɗo yaak danab iikku daattem.

¹⁴ O Kayak, na ena anam heigme amunu, ig eɗut, nahip nai baula tabapput neeb, nahip ɗo ii dim lamidta, ig danab ah ag kobol laala, na kobol amunu ootppa uuaknab doottem ele amu, ig danab ah amu ele ewau matulak awak hekkunignu daattete? Kobol amuppanu na oot huanak nauheb heppe, ig buɗunkad iitta ele iite daagnig?

¹⁵ O Yawe, Israel dilag Kayak, na genab tutukkuib henan daattem amunu ig Israel danab ah, ig gemu oh ii mauhmut. Iitta. Ig daattem ele, ig gemu oɗo yaak danab daat oittem. Ig anam daat, ig gemu ig beɗunigppa aab okkai ele na noomppa daattem. Ig na noomppa iikku daattem, amge ig beɗunigppa aab okkai daatte amunu, ig auntai laa na noomppa genab daakkunu elele? Am laa iitta.” Esra nug Yawe amegppa anam unuqittom.