Esra 8 - Nobonob Baibel

Israel baekkudppan ikki danab anen anen ag Esra ele eɗun, Jerusalem goppig

¹ Amu Israel dilag baelkadppan ikki danab, ag Artekserksis Persia dilag king dayeye, ag Babilonnu ahaeg, da ele Jerusalem uɗimut amu, ikki danab amu onilkad, ag mamelkad anukkanu onilkad ele bukppa yaak daatte, amunu lista am iikku.

^2-3 Pinias buɗub oolagppanu am Gersom. Itamar buɗub oolagppanu am Daniel. Dawit buɗub oolagppanu am Hatus. Hatus mameg am Sekania. Paros buɗub oolagppanu am Sekaraia. Danab 150 laa ele, ag onilkad bukppa yaak daatte, ag nug ele oh uɗippig.

⁴ Pahatmoap buɗub oolagppanu am Elioenai. Elioenai mameg am Serahia. Danab 200 laa ele, ag nug ele oh uɗippig

⁵ Satu buɗub oolagppanu am Sekania. Sekania mameg am Jahasiel. Danab 300 laa ele, ag nug ele oh uɗippig.

⁶ Adin buɗub oolagppanu am Ebet. Ebet mameg am Jonatan. Danab 50 laa ele, ag nug ele oh uɗippig.

⁷ Elam buɗub oolagppanu am Jesaia. Jesaia mameg am Atalia. Danab 70 laa ele, ag nug ele oh uɗippig.

⁸ Sepatia buɗub oolagppanu am Sebadaia. Sebadaia mameg am Maikel. Danab 80 laa ele, ag nug ele oh uɗippig.

⁹ Joap buɗub oolagppanu am Obadaia. Obadaia mameg am Jehiel. Danab 218 laa ele, ag nug ele oh uɗippig.

¹⁰ Bani buɗub oolagppanu am Selomit. Selomit mameg am Josipia. Danab 160 laa ele, ag nug ele oh uɗippig.

¹¹ Bebai buɗub oolagppanu am Sekaraia. Sekaraia mameg am Bebai. Danab 28 laa ele, ag nug ele oh uɗippig.

¹² Asgat buɗub oolagppanu am Johanan. Johanan mameg am Hakatan. Danab 110 laa ele, ag nug ele oh uɗippig.

¹³ Adonikam buɗub oolagppanu am Elipelet, Juel, Semaia ele. Danab 60 laa ele, ag ag ele oh uɗippig, amge ag nakok dimppa uɗippig. Esra aɗi uɗippig haenppa ii uɗippig.

¹⁴ Aria, Bigwai buɗub oolagppanu am Utai, Sakur ele. Danab 70 laa ele, ag aa ele oh uɗippig.

Esra nug Lewi buɗubppan mana mettak danab iitta, ag Yawenu mettid lag appa uɗat hekkulagnu mattialatta anattom

¹⁵ Amu da, Esra, da danab da ele oh gokkunignu daappig amu, da ag le ippu danab buueg, Ahawa gotte amu, da le amu daugppa qagmaatti, ig appa haen tutu dayaknu aab kalat daamut; ig appa deɗ ewam daamut. Ig appa daatta, da danab, mana mettak danab ele oolagppa neekken, da Lewi buɗubppan mana mettak danab iitta, ag laa ii daaeg anadmi.

¹⁶ Da amu anidmi amunu, da Elieser, Ariel, Semaia, Elnatan, Jarib, Elnatan, Natan, Sekaraia amu Mesulam ele onilagppa emi. Ag oh am ikki danab. Amu da Joiarip, Elnatan ele aa onilahppa emi. Danab aɗit amu aa doyak danab daapiɗ.

¹⁷ Da ag onilagppa ei doeg, da ag aab Kasipia gona, aab amunu ikki danab Ido anidkkulagnu ami. Ag gona, ag Ido nug, amu laikkud nuhigppan, amu Kayaknu mettid lagnu maɗi nid appa daatteb ele amu, ag ag oh oɗ madappeg, ag oolagppanu laala, ag Kayaknu mettid lag, amuppa ag anen anen ag ahilag uɗat hekkulagnu anadna omaladna doppeg, ig ele oh gokkunignu maatti goppig.

¹⁸ Da ag maatti gona oɗ mattaeg, Kayak Nug ii helo bia me, Nug ehanikke, appan danab ag Serebia, amu nug bekkod, nug awakkud, amakkud ele, ahilag ebqak am 18 amu, ag danab amu omaladna uɗin, ig ele oh gokkunignu appig. Serebia nug am danab Kayak uɗat haknu elelenab dayom. Nug Lewi bekka Mali buɗub. Lewi nug Israel bekka.

¹⁹ Ag Serebia aɗi omaladna uɗin, ig ele gokkunignu anana, ag Hasabia, amu Merari buɗub laa Jesaia ele, aria Jesaia awakkud, amakkud, ag bekkalkad ele, ahilag ebqak am 20, ag ag ele omaladna uɗin, ig ele gokkunignu appig.

²⁰ Ag danab amu omladna uɗin, ag laa, anukka Dawit, nuhikkud ehanittak anuqak ele, ag danab amu memetalkad anukkanu ag Kayaknu mettid lagnu maɗi nid daan, Lewi buɗub ehanadkkulagnu otiadppig amu, Ido aɗi ag otiak amuppanu danab ah 220 ele omaladna uɗin, ig ele oh gokkunignu appig. Danab amu oh ag onilag yaak am bukppa dayom.

Esra nug danab ah nug ele daappig amu, nug ag kud mena, ee oh ii lanana, Kayak unuqidkkulagnu amelagppa aum

²¹ Ido aɗi ag anam heeg, ig gokkunignu daamut ele, ig le ippu danab heeg, Ahawa gotte ele daugppa daatta, ig ihinig Kayak noobppa, ig ikka ig oninig qepput nekkunu, ig Nug ehanikkeb, ig, ig bekkankad ele, ig ihinig keeke maot, ig ibppa ena oignignu oɗ mettagnignu amu, da ig oh ee ohnu kud meta daat, ig Kayak unuqidkkunignu nai ag mattami.

²² Anukka ig king amegppa inam amut. “Ihinig Kayak Nug aun aɗi laa ag nuhignu dabmena, Nug dim lamidtteb ele Nug ii helo bia me, Nug ehanatte, ag ena daatteb, amge aun aɗi ag Nug uutteb amu, Nug amu dilag oo nauhak naɗi doya, bu madatte,” aot amut. Ig anam king amegppa amut amunu, gemu da ibppa kekeɗ heigppeg nauhmatanu nug oɗ medappi, nug ban danab baelagppa oitteb, ban danab hos attan oitteb ele ag omaigppeppeg, ig Jerusalem tekkunignu am uɗal neum. Da anam doomi amunu, da ig ee ohnu kud meta, Kayak unuqidkkunignu ag amelagppa ami.

²³ Da king oɗ medakkulnu uɗal neum amunu, ig ee ohnu kud meta daat, ig Kayak ibppa ehanikkunu unuqittut, Nug ig oɗenig doyom.

Keeke ena ena danab ag aon, Yawenu mettid lag, amuppa uɗin, appa Nug medappig

²⁴ Ig kud ma dayak amu heta malota, da mana mettak danab anuqak 12, amuam Serebia, Hasabia ele, aa lailti eblaih laih laa ele amu, da ag tituanatten,

²⁵ da gol, silwa, amu Kayaknu mettid lag, amuppa uɗat haknu keeke laala ele, amu keeke ihinig Kayaknu mettid lag, amuppa daaglagnu, king, nuhikkud ulum mettak danab, nuhikkud ehanittak anuqak danab, amu Israel danab laa oh appa daappig, ag oh keeke Kayak medappig ele amu, da keeke amu oh danab 12 amu ag gumaglagnu eppelagppa memi.

^26-27 Keekenu uug da skelppa doyen, ag eppelagppa memi am inam: 22,000 kilogram silwa, 3,400 kilogram gol, silwa tappiɗ keeke, ahilag uug am 3,400 kilogram, amu gol tappiɗ 20, ahilag uug am 8 kilogram. Da amu ag eppelagppa mein, da keeke aɗit bras enanagppa hak, bras amunu daden mak am gol bia, da keeke aɗit amu ele ag eppelagppa memi.

²⁸ Da keeke amu oh ag eppelagppa meinne, da ag amelagppa ami. “Ag, keeke imu oh ele, am Yawenu tituana mettak daatteb. Danab ah ag silwa, gol amu Yawe, Nug ag mamelkad aɗi dilag Kayak, ag Nug keeke amu ɗo hamu mettaknu ofa hena medappig.

²⁹ Anam amunu, ag keeke imu atognoadnana, akkan gona, Jerusalem teig! Ag gona tena, appa Yawe laug ooppa mana mettak danab anuqak, Lewi buɗubppan mana mettak danab iitta, aria Israelnu baekkudppan ikki danab ele noolagppa keeke imu uug anidkkulagnu skelppa eɗun mena, appan danab ag amu hetteb ele amu, ag gumaglagnu ag eppelagppa meig!” awe ami.

³⁰ Da anam ai, Lewi buɗubppan mana mettak danab, Lewi buɗubppan mana mettak danab iitta, ag ele ag silwa, gol, keeke laala Kayaknu tituanak daatte ele, ig keeke amunu uug doognignu skelppa matu memut amu, ag keeke amu oh aon gona, Jerusalem appa ihinig Kayaknu mettid lag, amuppa mekkulagnu aoppig.

Danab ah ag ahan, Jerusalem goppig

³¹ Ig ahamut amu, ig maɗ amuppa kalam digmak, kalam amunu deɗ 12ppa ahamut. Ig le ippu buueg, Ahawa gotte daugppanu ahat, Jerusalem gokkunignu ahamut. Ig ahat ukkautut, ihinig Kayak Nug atognoikkekke, kekeɗ, danab nau ele eheɗ heigkkulagnu oippig amu, ag keeke laa ihinigppa ii heppig

³² Kayak Nug anam ehanikke, ig gota Jerusalem tewota, ig deɗ ewam hik aot daamut.

³³ Ig deɗ ewam hik aot malat, ig deɗ waɗeleppa ihinig Kayaknu mettid lag, amuppa teta, ig silwa, gol, amu keeke Kayaknu tituanak daatte ele skelppa mewota, ig keeke amu oh mana mettak danab Uraia bekka Meremot eppegppa memut. Haen ig keeke amu oh nug eppegppa memut amu, mana mettak danab laa, Pinias bekka Eleasar, amu Lewi buɗubppan mana mettak danab iitta, ag am Jesua bekka Josabat, Binui bekka Noadia ele, ag ele oh daappig.

³⁴ Ag keeke oh anen anen skelppa meeg te, keeke anen anen ohnu uug, ebqak ele anidna, ag bukppa keeke amu ohnu uug laippu qagmena yaappig.

³⁵ Keeke skelppa mak uɗat ha malak amu, diia ukka laih me dayak danab ah Babilonnu ahan, eɗun uɗippig ele, ag Kayaknu manaknu ofa heppig; amuam Israel oh dilagnu makau dawai 12, aria sipsip dawai 96, sipsip gaiɗ 77 ele. Amu oh am manaknu ofa daappig. Amu ag ele ib etta hipunin haknu ofa haknu, ag meeme dawai 12 ele manadna, Yawe medappig.

³⁶ Ag doɗ amu manadna, Yawe mettona, ag pas laa Persia dilag king nug Esra mettom, amuppa kingnu haknunab nai daye amu, ag amu aon gona, Persianu prowins Yupretis lenu qaban uɗitteppanu gawana madappig. Ag mattaeg, danab amu ag pasppa yaak aumbia, ag danab ah dilag, Kayak laugnu ehanittak ele ag madappig.