Esra 7 - Nobonob Baibel

Esra nug Jerusalem uɗiom

¹ Amu keeke amu dimppa Persia dilag king Artekserksis nug king dayeye, Esra nug Babilonnu aha, Jerusalem ukkom. Esra mameg am Seraia. Seraia mameg am Asaria. Asaria mameg am Hilkaia.

² Hilkaia mameg am Salum. Salum mameg am Sadok. Sadok mameg am Ahitup.

³ Ahitup mameg am Amaraia. Amaraia mameg am Asaria. Asaria mameg am Meraiot.

⁴ Meraiot mameg am Serahia. Serahia mameg am Usi. Usi mameg am Buki.

⁵ Buki mameg am Abisua. Abrisua mameg am Pinias. Pinias mameg am Eleasar. Eleasar mameg am Aron. Aron nug mana mettak ikki danab dayom.

⁶ Matu anak amuib, Esra amu, nug am nai yaak danab, nug Babilon appanu uɗia, Jerusalem beum. Nug am ippunittak danab laa, nug Mosesnu ɗo nainu sul okkai ha malom. Yawe, Israel dilag Kayak, Nug ɗo amu Israel danab ah mattom. Kayak Nug Esra ehanittom amunu, Esra nug keeke laa oh amunu king oɗ mettom ele, king nug nug mettom.

⁷ Esra nug Babilonnu aha, Jerusalem uɗiom, haen amuppa Israel danab laala ele uɗippig. Nug ele uɗippig amu, ag oolagppan laala am Lewi buɗubppan mana mettak danab, Lewi buɗubppan mana mettak danab iitta, ahiettak danab ah, od gumak danab, amu Kayaknu mettid lagnu maɗi nid ele. Amu oh ag ahaeg, Esra ele uɗippig. Ag Artekserksis, Persia dilag king dayaya, nuhig king dayaknu maɗ eblaih aɗitppa, ag ahan uɗippig.

⁸ Esra nug Artekserksis nug Persia dilag king dayaya, nuhig king dayaknu maɗ eblaih aɗitnu kalam tanig eleppa Jerusalem teum.

⁹ Nug maɗ amunu kalam digmaknu deɗ digmakppa Babilonnu ahom. Nug ahe, Kayak, nuhig Kayak, Nug ehanittom amunu, nug uɗia uɗia, nug maɗ amuppaib kalam ebqak tanig ele, kalam amunu, deɗ digmakppa Jerusalem teum.

¹⁰ Yawe Nug Esra ehanittomnu diig am, Esra nug Yawenu ɗo ippunittak am aokkunu, ɗo amu dim lamidkkunu ele anuqak doyaya oiyom. Nug amunu anuqak doya, Israel danab ah laa, ag Yawenu ɗo naippa ɗo iɗu iɗu aɗi aɗi amuppa daatteb ele ippunadkkunu anuqak ele doya, amu heum.

Pas laa King Artekserksis nug Esra mettom, pas amuppan nai

¹¹ Esra nug am mana mettak danab, nai yaak danab ele laa, ippunittak danab ele dayom. Nug Yawenu haknunab nai, ɗo iɗu iɗu ele, Israel ag doon dim lamidkkulagnu daappig amu, nug amu ohnu ippunittak okkai awa, doyak okkainab ele dayom. Nug anam daye, King Artekserksis nug pas laa nug mettom. Pas amuppa nai dayom am iikku.

¹² “Da Artekserksis, da king laa oh dilag king daattem, da pas imu na Esra, nahipnu yaattem. Na mana mettak danab daanna, na Kayak hab attan daatte, na nuhig ɗonu ippunittak danab ele daattem. Da na humidttem.

¹³ Da gemu ɗo iikku mettem. Wan da gumattemppa Juda danab ah aun aɗi, ag aabppan danab ahte, o ag Lewi buɗubppan mana mettak danabte, o ag Lewi buɗubppan mana mettak danab iittate, ag ahan, Jerusalem gokkulagnu oolag hette dayeb amu, ag ahappeg, na ele oh gokkulagnu elele.

¹⁴ Esra, da, King Artekserksis, dahilad ulum meɗak danab eblaih aɗit ele ig na gona, Juda danab oh, laa Jerusalemnu, laa Juda wanppa laih laihnu amu, ag Kayaknu ɗo waappa attem attem daan oitteb anadna doon, appe doognignu meittut gottem. Ag nai amu tutukku dim lamidtteb o iittatai anidkkutnu na ɗo nai amu buk itoɗiakppa yaappig niitte, na eppenppa daatte amu, na nai amu aɗan gona, danab ah amu ag attem daan oitteb am anidna, appe doognig.

¹⁵ Laa amu, da king, dahilad ulum mettak danab ele ig gol, silwa ele Israel dilag Kayak, Jerusalem appa daatte, ig oo qak iittappa Nug mettamut, na gol, silwa ele amu, na aon gona, Nug mette!

¹⁶ Na amu aon gona, am silwa, gol laa ele, dahilad danab ah laih laihnu ag mettaglag dayeb amu, na amu ele aon gokkut. Aria, Israel buɗub laa, ag eɗun gokkulagnu ii dabmetteb amu, na ag, am amu dilag mana mettak danab ele, ag ɗo hamu mettaknu ofa, ag amu ahilag Kayaknu mettid lag Jerusalem daatte, ag amu ehanidkkulagnu mettaglag amu, na amu ele aon gona, Jerusalem appa Kayak mette!

¹⁷ Na amu aon gona, Jerusalem appa na men doɗo amuppa makau dawai, sipsip dawai, sipsip gaiɗ ele daden mena, doɗ amu manadna, Kayak mettaknu mana mettak haknu ee aegnu ofa hekkutnu daatte, aria wain gokkaɗaknu ofa ele hekkutnu daatte ele, na ee aeg, wain amu ele daden mena, na nahip Kayaknu mettid lag, Jerusalem appa daatte, na amunu qaɗabppa manadna, Kayak mette!

¹⁸ Aria, na amu daden mewona, gol, silwa ele big dayeb, na laipad, Juda danab laa amu, na ag ele Kayak Nug oo niitte bia, ag aɗi keeke men doɗo amuppa hekkulagnu dabmekkulag amu, ag amu heig!

¹⁹ Tappiɗ keeke, mana mettak danab aɗi ag keeke amuppa ag Israel, ag Kayak noobppa dup nona binag mekkulagnu uɗat hetteb, ig keeke amu na eppenppa meut daatte amu, na keeke amu oh aon gona, nahip Kayak, Jerusalem daatte, na Nug mette!

²⁰ Amu aɗi keeke laala na Juda dilag mana mettak danab ag amu nahip Kayaknu mettid lagppa uɗat mettaglagnunab anidna, na madakkutnu, na men doɗo da, king, dahil enppanu aon, daden mena madakkutnu elele.

²¹ Anam amunu da, King Artekserksis, da ɗo imu iikku mettem. Amuam kingnu men doɗo gumak danab le Yupretis heqo laih appa daatteb ele, ag Esra, nug mana mettak danab, nug Kayak hab attan daattenu ɗonu ippunittak danab ele daatte amu, nug ag aɗi mettaglagnu oɗ matteb amu, ag yagbak doon, nug metteg!

²² Nug aɗi keekenu oɗ madakku amu, ag mettaglag, amge 3,400 kilogram silwa, 10,000 kilogram wit aeg, 2,000 lita wain, 2,000 lita olip goɗen aakkuib aokkunu elele. Nug amu eɗitta tak awaknu oɗ ii mattama. Yu kalu awaknu amu, amuam batak iitta.

²³ Kayak hab attan daatte, Nug nuhig mettid lagppa aɗi keeke daakkunu, o nuhikkud mana mettak danab ag aɗi Nug mettalagnu aum amu, ag nuhig lag amuppa keeke amu Nug mettaglagnu yagbak doon, Nug metteg! Ag amu ii hekkulag dayeb, Kayak Nug dahilnu, da bekkalad dilagnu ele oo nauhkku amunu, amu bemanu ag elele anam heig!

²⁴ Laa ele amu, ag le Yupretis heqo laihnu gumak danab ag doyeg! Ag heppeg, Juda dilag Lewi buɗubppan mana mettak danab, Lewi buɗubppan mana mettak danab iitta, ahiettak danab ah, od gumak danab, Kayak laugppan maɗi nid ele amu, ag heppeg, danab ah amu ag takis, am en takis bia ele ag ii mattamna. Ag am ahilag takis ag mattaglagnu akkulagnu elele iitta.

²⁵ Amu Esra, nahipnu amu, Kayak nahip Nug doyak dabmak ena okkai ele mettom amunu, na doyak dabmak ena ele amu dabmena, na epeɗiak danab okkai, epeɗiak danab okkai iitta ele otiadna, ag nai doya mala hettoɗia epeɗia elele mettak kobol dim lamidnana, danab ah le Yupretis heqo laih appa daatteb, ag nahip Kayaknu ɗo nai aɗi aɗi ippunigtte dootteb amu, ag danab ah amu oh epeɗiatteg! Amu laa nug ɗo amu ii dootte ele amu, na nug ippunitte!

²⁶ Auntai laa nug Kayaknu ɗo ii dim lamidtte, da, king, dahil ɗo ele ii dim lamidtte amu, epeɗiak danab ag amu anidna, ag bu mettaglag. Ag nug qeppeg mauhkkutai, o ag nug lamidppeg, wan laappa ukka daakkutai, o ag nuhig keeke oh da, king, dahil daakkunu aɗaglagtai, o ag nug maniguittakppa inaglagtai. Ag ib amu laa epiɗin dim lamidna, danab Kayaknu ɗo, da king, dahil ɗo ele ii dim lamidtte amu, ag nuhigppa anam heig!” King Artekserksis nug pas laa anam ya, Esra mettom.

Esra nug pas amu antta, Kayak binag meum

²⁷ Yawe, ig mamenkad aɗi dilag Kayak, Nug he, king nug Yawe laug Jerusalem appa daatte, nug lag amu binag mekkunu anam dabmeum amunu, ig Kayak binag metu.

²⁸ Anam, amge amuib iitta. Yawe Nug ele he, da kingnu neekkakppa, nuhikkud ulum mettak danab dilag neekkakppa, nuhikkud ehanittak anuqak danab okkai, ɠagattag ele dilag neekkakppa ele ena daaiyi, ag da ele ehaniɗppig. Amu Yawe, dahil Kayak, Nug anam ehaniɗom amunu, da oolppa ɠagattag doye, da Israel dilag danab okkai laala qagmaatti, ig ahat, Jerusalem gokkunignu bappaidmut.